Uralistica

                                              "ЭРЗЯНЬ МОРО-2013"

                                          (Лемпутома. = Номинация)

 

"Эрзянь вал" курос совсиця ломантнень мелест.

Мелест ёвтызь вейксэнькемень веете ломанть. Моротне, ломантнень мелест коряс сайсть истямо таркат:

 

"Авай" (Е .Самаркин) - 52,1% http://www.youtube.com/watch?feature=player_detailpage&v=kjuF2t...

«Тюштянень пшкадема" (Анастасия Старостина) – 14,6% http://www.youtube.com/watch?v=qm8owzSK3o8

«Оймень пшкдема" (Боляень Сыресь) – 9,7% http://www.youtube.com/watch?v=RHMNUd79bcs

"Весь весе опаня" (Мирослава) - 8,3%  http://www.youtube.com/watch?v=iNjtKi3xGEI  "Сюк сюк, Ковава" (К. Громова) - 8,3% http://www.youtube.com/watch?feature=player_detailpage&v=ter4H1...

«Чевгель» (Олёш) – 7,0%

Морот берянть а эрсить… Эрьва эрзянь моросонть – эрзянь Ойме, Эрзянь Ёжо, эрзянь Вечкема, эрзянь Мелявкс. Эрьва эрзянь моросонть улить мельть-валт конат эждить минек эрзянь ойменек, кодамо стака шкат аволинек печтя, кодат сталмот а нежелить лавтовозонок…

Неень шкань Россия Кирдимасторсонть радиова, ваномопаргова (по телевизору) эрзянь моро а марят. Россия Кирдимасторонтень ней эрзянь моротне, улема, тунь а эрявитькак. Эрзянь раськенекак тензэ а эряви… Тензэ эрявить россиянецт ды аламнешка «мордват»… А нетненень эрзянь морось – чавонь тев.

Сюконямот Интернетэнтень, кона зярс кодаяк зярс а куродови кирдивиентень. Сонзэ вельде эрзянь раськесь састыне пурнави вейс, вансты эрзянь келенть, эрзянь культуранть, конань ютксо маней-вандола цецинекс эрить эрзянь моротне. Ды мезесь паро, аволь ансяк кезэрень эрзянь моротне ванстовить. Эрзянь раськесь нейгак эсь вийсэнзэ рашты од эрзянь морот, одт эрзянь моронь сёрмадыцят, одт эрзянь моронь морыцят.

  Те минек ине эрзянь уцясканок.!

Вана 2013 иестэнтькак Инешкипазось казсь эрзянь раськентень зярыя од эрзянь морот, конат теке лембе кедьлапушкасо, оймекоштсо, эждить минек стомавозь эрзянь ойменек.

  Эрзянь оймесь пек чевте, мелявтыця, тиринь авань вечкиця, самай секскак сехте пек эрзятненень вечкевсь Евгений Самаркинэнь «Авай» морозо.

Чевте вайгельсэ, оймев ёжо марто Евгений моры те пек паро эрзянь моронть, конань эрзятне аравтыть васенце таркас.

  Омбоце таркас эрзятне путызь «Тюштянень пшкадема» моронть, конань 2013 иестэнть морызе Анастасия Старостина од тейтересь.

Пек парсте морызе, пек паро валсо сонзэ сёрмадызе Алина Подгорнова эрзянь тейтересь. Те моросонть – омбоце те иень сехте покш эрзянь мелявксось – Эрзя раськенек кисэ. Морось кемевти – а ёми Эрзя раськесь Мода Масторонть чаманзо лангсто! Эрзятне кармить эрямо! Эрзянь раськесь виев! Тензэ лездыть тоначистэ минек покштятнеяк. Сынст ютксто – Тюштя эрзянь Инязорось.

  Колмоце таркасонть – «Оймень пшкадема» Сыресь Боляень од морозо.

Сон морызе сонзэ Раськень Озкссо. Валонзо-зэмезэ те моронть пек виев. Ламотне мик таймаскадозь кунсолость эйсэнзэ. Эйсэст – цёра ломанень мелявкс эсь раськензэ кис ды кемема, эрзянь цёратне эзизь стувто, кода эряви вечкемс Эрзянь Масторонть!

Нилеце таркасонть – кавто од тейтерень морост. Те – «Весь весе опаня», конань морызе эрзянь кельсэ русинэнь раськень тейтересь Мирослава,

ды «Сюк, сюк, Ковава!» - морыцясь Ксения Громова. Моротне – мазый вечкемадо ды парос кемемадо. Морыцятнеяк одт ды мазыйть! Кода а вечкемс истят морот!

  Ветеце таркасонть – мазый, чевте ёжо «Чевгель» морось, конань моры Олёш.

Морось кунды седей, кармавты арсеме… Олёш эрзянь цёрась пек ламонень вечкеви. Вечкеви васняяк моронзо кис ды эрзянь моронь пурнавксонзо кис. Одизнявкст, цёра шкинемасот ды паро эрзянь тевсэть!

  Сюконямот, эрзянь морыцят! Сюконямот од моронк кис!

Тынь пек покш тевть теиде эсь моросонк те иестэнть эрзянь раськентень. Эрзянь морось вансты-кепеди эрзянь Ойменть. Карми эрямо эрзянь келесь – карми эрямо Эрзя раськесь, кармить гайгеме мазый эрзянь мороткак!

Просмотров: 516

Ответить на это

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования