Uralistica

2014 иень эрзянь сёрмадома шкинемань Казнень вешнемас. = На соискание эрзянской литературной премии 2014 года.

2014 иень эрзянь сёрмадома шкинемань Казнень вешнемас. = На соискание эрзянской литературной премии 2014 года.

Тееведе содавиксэкс, эрзят. = Знакомьтесь, эрзяне.

Эсь шкинемксэнзэ невти Татьяна Мокшанова. = Свои произведения представляет

Татьяна Мокшанова:  

 

КУДОВ КИСЬ

Косо учить эйсэть, вечкить, кемить,

Косо сех мазыйстэ чачни чись,

Косо мелень ванозь ледстнить леметь,

Тов таргави свал тердиця кись.

 

Сон ламо маней мельть-ёжот рашты,

Иди эйсэть, зярдо оймесь пись.

Оймавтомо тиринь авакс машты

Лавсесэ нурсиця кудов кись.

 

Вадрядо-пародо арсевтицясь

Седеень эждий таркасто лиссь.

Китнень ютксто сех а налкставтыцясь

Ды свал вечкевицясь – кудов кись.

 

ВАЛСКЕ

Чилисемань толось

Валдонь сятко верьгедсь.

Вень чоподась колавсь,

Нармунь моро серьгедсь.

 

Сыргозсь минек модась,

Корштась валскень танстте.

Сон вадрясто содась:

Весе ули парсте.

 

ЧИНЬЖАРАМО

Мазыйкине чиньжарамось

Ожолды пиресэ.

Кона ёнов чинь чарамось,

Велявты принезэ.

 

Лиянь эйстэ тунь а кекшни,

Паро мельсэ ракси.

Цецянь азор пондакш мекшесь

Мартонзо ялгаксни.

 

А ёвтавияк, кодамо

Ёжонь витий пелькске!

Прок бажи ламонь содамо,

Ванны пирявкс велькска.

 

Чиньжарамось чинзэ ёнов

Ожо прянзо венсти.

Минек туртов мазый оясь

Чипанят кенерсти.

 

ЛОМАНЬ ЁНКССО

Ломань ёнксось аволь истя эжди,

Куш варштан нусманясто – а кежди.

Сонсь а кирди эйсэнь, сонсь а пани.

Ломань ёнксось а истямо маней.

 

Эриялгам кудов капши само.

Лавтовонзо тодовкс путсы прялом.

Кода тесэ мелем иляст вано,

Кияк а чарькодьсы эрзянь валом.

 

Ванан, кода уить пондакш пельтне,

Кадык кудов пачтясызь монь мельтнень.

Тесэ ськаминезэ вишка эйдем

Тиринь валом каршо яла пейди.

***

 

Ванан лангозот –

Ойминем эждян.

Меште ёжозот

Псакинекс неждян:

Кунсолан, кода

Седееть чави,

Лембеде кона,

Кеман, а чами.

 

Лексемань ялтот

Тапари лавтовт.

Ёжотнень мартот

Явтано кавтов.

Вечкемнем, удок.

Теть – сюкпрянь валом:

Ёжосот кудом,

Вакссот оймамом.

 

ШКАЗО

А цидярды сёксесь теленть каршо,

Ялатеке потамс тензэ сави.

Полавтсы тюсонзо кельме ашо,

Тарьксэсь коштонь коцтонтень керьксави.

 

Курок масторс ацамков пачкоди.

Аволь инжекс сы сон, ули азор.

Весе кенкштнес кеместэ вачкоди.

Учить кирдевтементь – шказо! шказо!

 

Секс а касы ойме потсо сталмось,

А тандавты теленть од мелезэ.

Эрямосонть, кода сонзэ самось,

Эсь шкастонзо весемесь улезэ!

Просмотров: 164

Ответить на это

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования