Uralistica

2014 иень эрзянь сёрмадома шкинемань Казнень максомань анокстамось. = Подготовка к вручению эрзянской лературной премии 2014 года.

2014 иень Эрзянь сёрмадома шкинемань Казнень максомас анокстамодо

«Руця» эрзянь вейкс Лезэпаргось Эрзянь келень Чистэнть Саран ошсо ютавты 2014 иень Эрзянь сёрмадома шкинемань Казнень максома.

Тень коряс «Руця» Лезэпаргось кемекстась истямо мельссавкс:

«РУЦЯ» эрзянь Лезэпаргонть

эрзянь  сёрмадома шкинемань коряс эрьва иень Казненть коряс

 

1.            «Руця» лезэпаргось карми эрьва ие макснеме казнемат эрзянь сёрмадейтненень.

2.            Ярмактнэ казнетнес пурнавить  ансяк эсь мельсэ эрзянь ды лия раськень ломанень, тевкуронь ды вейсэндявксонь пельде.

3.            Казнень максомась карми ютавтневеме эрьва ие, Саран ошсо, чадыковсто,  Эрзянь келень Чинть ютавтомасто.

4.            Казнес арсевиця ломанень кочкамось ды сынст шкиневксэст, конатнень кис карми максовомо казнесь, ютавтневи-невтневи «Эрзянь Вал» Интернетсэ вастнема-кортнема куросонть.

5.            Казнетне кармить истят:  Прявтказне ды кавто Шнамоказнеть.

6.            Казевть ломантненень карми максовомо эрзянь  шнамо конёв - Арневкс.

 

Эрюш Вежай

«Руця» лезэпаргонть прявтозо

2013 ие, сундерьков, 30 чи.

 

Те мельссавксонть коряс «Эрзянь вал» Интернетэнь кортнема куросонть ды Uralistica Интернет вальмасонть ульнесть невтезь сеть сёрмадома шкиневкстнэ, конат ванкшновсть Казнес.

 

 «Сятко», «Чилисема» журналтнэнь, «Эрзянь Мастор» кулялопанть редакциятнестэ миненек кучозелть колонькеменьде ламо сёрмадеень шкиневксэст, кода содавикс сёрмадеень лем ало, истя од сёрмадеень лемень ало.  

     Сынст ютксо: Числав Журавлёв, Татьяна Разгуляева, Юрий Пальтин, Людмила Рябова, Татьяна Мокшанова, Алина Подгорнова, Алексей Лежиков, Нуянь Видяз, Виталий Картышкин, Дригань Толай, Татьяна Маторкина, Тамара Баргова, Ольга Сусорева, Александр Доронин, Любовь Дергачёва, Мария Ерёмина, Александр Шаронов, Василий Брыжинский, Боляень Сыресь ды ламо лия од лемть.

 

   Ванкшновсть ансяк сеть сёрмадовкстнэ, конат нолдазельть ломанень сельме икелев 2013 иенть перть.

 

   Интернет вельде эрзятне теевсть содавиксэкс неть од ёвтамотнень, ёвтнематнень, ёвкстнэнь, арсемёвтнематнень ды валморотнень марто. Истя неень шкань эрзянь сёрмадома шкинемась-литературась теевсь эрзянь ломантнень туртов седе содавиксэкс ды мельс саевиксэкс, эрзятне кармасть седе парсте содамо мезень кис палы эрзянь неень шкань сёрмадейтнень оймест-седеест.

 

  Сехте вадря сёрмадовкстнэнь кочкамось – тевесь пек стака. Зяро ломанть – зняро мельть. Ды эрьватась эйстэст, нама, виде.

 

    Секскак, «Руця» Лезэпаргось саинзе тедидень Казнень кочкамос ансяк сеть сёрмадома шкиневкстнэнь, конатнень кис ёвтызь шнамо мелест седе ламо ломанть, сеть сёрмадовкстнэнь, конатнесэ палозь палыть Эрзянь раськенек  кис неень шкань  мелявкстнэ, ризнэматне, конатнесэ седе виевстэ маряви эрзянь оймесь ды сонзэ талноматне.

 

    Пильгс-модас сюконямот те сёрмадома шкинемань Казнес анокстамонть кис ёвтатано сеть ломантненень, кить явить тензэ эсь мелест ды шкаст. Те Николай Ишуткин, Татьяна Разгуляева, Людмила Рябова, Нуянь Видяз, Вирень Инзейне, Татьяна Ковалёва, Ледяень Видяз.

  Те тевесь миненек – од. Улить сонзэ топавтомсто асатыкст, стакачить. Зярыя валт неть стакачитнеде, аволь пеняцямонь коряс, ансяк эрзятнень содамочизэст.

 

    Васняяк, зярс пек аламот ульнесть тенек эрзянь ломантнень ютксто паро лездыцят, конат лездавольть тенек путнемс максозь шкиневкстнэнь Интернетс. Зярс ансяк сурсо ловозь эрзят каясть эсь целковойнест те паро эрзянь тевентень. Ульнесть истяткак, конат васня алтасть лездамо ды мейле эсь алтамост стувтызь.

 Неть стакачитне ды асатыкстнэ, арсеви, изнявить. Кемтяно тенень вана мезень кувалт: вейкеяк ломань те минек эрзянь тевенек кис зярс эзимизь сюдо, эзимизь сялдо. Кода мерить эрзятне, «Ансяк чуди ведесь муи эстензэ ки», истя миньгак, мусынек те од эрзянь тевентень паро, нардев кинть.

 

 

Пштистэ ваннозь-ловнозь весе максозь-кучозь тенек сёрмадовкстнэнь, «Руця» Лезэпаргось сась истямо мельс, 2014 иень Эрзянь сёрмадома шкинемань Казнес кочкамс вана неть сёрмадовкстнэнь-шкиневкстнэнь эйстэ:

 

Боляень Сыресь. «Оймень пшкадема».

Дергачёва Любовь. «Масторава – покш космосонь пелькске». Арсемёвтнема (Новелла).

Журавлёв Числав.  «Пингень цецине». Валморо (стих).

Мокшанова Татьяна. «Зярдо вень чоподась срады-солы». Валморо.

Подгорнова Алина. «Тюштя». Валморо. Корязонзо сёрмадозь моро.

Разгуляева Татьяна. «Чувтонь Койме ды Парь». Ёвкс.

 

 

Те шкас Эрзянь сёрмадома шкинемань Казнес каясть ярмакт: Петрянь Андю, эрзя (Санкт-Петербург ош), Моисеева Надя, эрзя (Казахстан), Грунин Максим, эрзя (Полярной ош),Эрюш Вежай, эрзя (Полярной ош).

«Руця» Лезэпаргось  арси пурнамс ярмакт колмо Казнес: Прявтказнес – кемень тёжат целковойть, ды кавто Шнамоказнес,  сисемень-сисемень тёжань целковойть.

    Текень марто «Руця» Лезэпаргонть пельде некеть Казнетнень марто карми максовомо Эрзянь сёрмадома шкинемань Арневкс (Диплом).

 

Инеськеть, эрзят, ёвтынк эсь меленк неть од эрзянь сёрмадома шкинемань-литературань сёрмадовкстнэнь-шкиневкстнэнь кувалма.

Мелень ёвтамось карми течистэ саезь 2014 иень эйзюрковонь 31-це чис.

 

Эрюш Вежай,

«Руця» эрзянь вейкс Лезэпаргонть тевветиезэ.

2014 ие, эйзюрков, 11 чи.

Просмотров: 155

Ответить на это

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования