Uralistica

ФИНН ФЕСТИВАЛЬ 2011. Кино. Перформанс. Туспуктэм. Пӧранни.

21-27 оштолэзе 2011, г. Ижкар, «Дружба» киновозьматонни, "ГАлереЯ" Ижкар адӟытон шоринты

Ижкар киновозьматоннилэсь "Скандинави тулыс" но 2010-2011 арысь фестиваль вакытэз йылпумъя кыкетӥ финн лулчеберетъя возьматон. Со тужгес яркыт фестиваль луоз. Возьматонэз дасяны юрттӥськиз Россиысь Финн посольство.

Кино. Туала финн кинолэн шер возьматосъёсыз но озьы ик тодмо Аки но Мики Каурисмяки агай-пуктӥсьёслэн ужъёссы. Инты: "Дружба" киновозьматонни. Дыр: 21-27 оштолэзе котькуд ӝыт 19.00 часын. Фестивальлэн берпуметӥ нуналаз - юри удмурт кылэ берыктэм "Корка, кудаз будэ яратон" кино.

Перформанс. Фестивальлэн куноез - скандинав перфоманслэн кизилиез Рой Ваара, кудӥз Ижкаре мастер-классэн но возьматонъёсын лыктэ. Инты: "ГАлереЯ" Ижкар адӟытон шоринты. Дыр: 21-24 оштолэзе покчиарня-удмртарня 17.00 часын, кӧснунал-арнянунал 14.30 часын. Пырон дунтэк.

Туспуктон. "ГАлерея" Ижкар адӟытон шоринтыын ортчоз Хельсинкиысь ульча модая возьматон. Валтӥсь интыын тодмо вотэс-туспуктонпроект «HEL LOOKS». Нош со дыре ик пичи залын луоз асьме «IZH LOOKS»
возьматон, кудзэ фестиваль понна юри дасязы Антон Сергеев, Ольга Прохорова но Андрей Смирнов. Кыказ ик туспуктонпроектын Хельсинки но Ижкар урамъёсысь пумитам адямиос но соослэн дӥсьсы возьматэмын. Котькуд фото бордын адямилэн ас арбериез сярысь вакчи гожтэмез ватсамын. Дыр: 21-27 оштолэзе ялан возьматон кадь луоз. Билетлэн дуныз: 50 манет.

Пӧраськонни. "Хмель но Солод" копейняын - юри дасям меню. Нош огаз кино возьматон азьын "Дружбаын" утыны луоз кык муртлы финн ӝытсиськон.

22 оштолэзь, удмуртарня
«Дружба» киновозьматонни, 19.20
ШУЗИ СЕМЬЯ / ДУРНАЯ СЕМЬЯ / PAHA PERHE
пуктӥсь. Алекси Салменперя, 2010, 95 мин.
шудӥсьёс: Вилле Виртанен, Лаури Тилканен, Пихла Виитала, Вера Киискинен,Ники Сеппала, Исмо Каллио но мк.
Микаэль - огназ кылем атай, кудӥз кузпалэныз люкиськемез бере кык быдэ вуэм нылпиосыныз улэ. Солэн пиез Даниил синмаське. Но Микаэль тырше лэсьтыны ваньзэ озьы, возьытэ та учыр медаз вутты шуыса. Куке со вала, номыр каремез уг луы ни шуыса, Микаэль крестовой походэ мыныны ӝтске. Сьӧраз со кутэ нылпиоссэ но кышнозэ. Со вие та учыр эшшо но воштӥськонтэм луэ. Лыдэ басьтоно на сое - Даниил синмаське ас сузэрезлы.

23 оштолэзь, кӧснунал
«Дружба» киновозьматонни, 19.20
СЮЛЭМТЭТЧАН / СЕРДЦЕБИЕНИЕ / KOHTAAMISIA
пуктӥсь. Саара Кантелл, 2009,
шудӥсьёс: Аннели Саули, Мери Ненонен,Дженни Банерджи, Роза Саломяа но мк.
Фильм пуктэмын кышномурт-пуктӥсен сизьым нылкышноослэн улэмзы сярысь. Марта ӵыжы-выжыосызлэсь ватыса возе лушкемвизьзэ, Норалы акыльтӥз, сое котыр чакласа возё шуыса, Мери кышка азьпал улонлэсь, Ольга но Фардуса дорзылэсь палэнын утчало улонлэсь пуштроссэ, Нора уг быгаты кулэ быръён лэсьтыны, нош Анна машина пуктонниын пумиське ишанэн. Пумиськонъёс но ас быръёнэд сярысь фильм - со сярысь, мар быгатэ воштыны тынэсьтыд улондэ.

24 оштолэзь, арнянунал
«Дружба» киновозьматонни, 19.20
ВЫЖЫЫСЬТЫЗ БЕРПУМЕТӤЕЗ / ПОСЛЕДНЯЯ В РОДУ / SUKUNSAVIIMEINEN
пуктӥсьёс. АнастасияЛапсуи, Маркку Лехмускаллио, 2009, 80 мин.
шудӥсьёс: Анастасия Лапсуи, Надежда Пирерко, Радик Анагуритси, Людмила Занникова но мк.
Пичи ненец нылашез келяло кыдёкысь ӟуч гуртысь школа-интернатэ. Неколэн уг пот отчы мынэмез. Отын солы дышоно мукет сям-йылолъёслы, нош Неко ӟучомонлы пумит султэ. Кӧня ке керетон учыръёс бере нылаш ӵош дышетскись ненец эшеныз пегӟыны малпа. Озьы Неко турттэ берытскыны семьяез но азьло улонэз доры. Пиналъёслэн нюлэсъёстӥ пегамзы ӝог йылпумъяське. Соослы нош школа-интернатэ выль ӟуч улонэ берытсконо луэ.

25 оштолэзь, вордӥськон
«Дружба» киновозьматонни, 19.20
ЯКОБ БАДӞАТАЙЛЫ ГОЖТЭТ / ПИСЬМА ОТЦУ ЯКОБУ / POSTIA PAPPI JAAKOBILLE
пуктӥсь. Клаус Хярё, 2009, 74 мин.
шудӥсьёс: Каарина Хазард, Юкка Кейнонен, Хейкки Ноусиайнен, КайяПакаринен, Эско Ройне но мк.
Дас кык ар тюрьмаын пукем Лейла Стенлы эрик сёто, нош солы нокытчы мыныны. Семьяеныз со кемалась ӧз вераськы. Но солы дэмлало уж - чаклано синтэм гурт бадӟатаез, кудӥзлы кулэ гожтэтъёсты лыдӟыны но валэктон гожъяны юрттыны. Лейла мылкыдтэк басьтӥське та уж борды: со ӧз дышы юрттыны мукетъёсызлы, ачиз но нокинлэсь юрттэт уг витьы. Но дыр ортчемъя со азе усьтӥське паймымон Яратон, Жалян но Зоук сярысь учыр. Фильм - 2009 арын Финляндилэсь Оскарлы дэмламын вал.

26 оштолэзь, пуксён
«Дружба» киновозьматонни, 19.20
УТЬ ЙЫРКЫШЕТТЭ, ТАТЬЯНА / БЕРЕГИ СВОЮ КОСЫНКУ, ТАТЬЯНА! / PIDÄ HUIVISTAKIINNI, TATJANA
пуктӥсь. Аки Каурисмяки, 1994, 65 мин.
шудӥсьёс: Кати Оутинен, МаттиПелонпяя, Кирси Тиккилайнен, Мато Валтонен, Элина Сало но мк.
Финн йӧскалык Юсси кинопремия, 1995: Тужгес умой фильм, тужгес умой туспуктон уж.
Кык эшъёс Рейно но Валто шутэтскон нуналъёсы лымшор Финляндие "Волга" машинаен шонто. Рейно, механик, яратэ бренди. Валто, яратэ кофе но анаезлэн каблук улаз ветлэ. Сюрессы кузя эшъёс пумитало эстон Татьянаез но Казахстанысь Клавдияез. Ог-огзэс пӧртэм кылъёс понна валамтэзы шугомытэ улонзэс. Но талэсь но тунсыкоез, егит муртъёс ог-огзы дыръя ыштӥсько.

27 оштолэзь, вирнунал
Юри удмурт кылэ берыктэм кино.
«Дружба» киновозьматонни, 19.20
КОРКА, КУДАЗ БУДЭ ЯРАТОН / ДОМ, ГДЕ РАСТЕТ ЛЮБОВЬ / HAARAUTUVAN RAKKAUDEN TALO
пуктӥсь. Мика Каурисмяки, 2009, 102 мин.
шудӥсьёс: Элина Книхтиля, Ханну-Пекка Бьоркман, Антти Рейни, Томми Эронен, Кати Оутинен но мк.
Удмурт субтитръёсын финн кылын кино.
Огезлэн финн агай-пуктӥсьёслэн комедизы. Озьыен, финн люкиськон. Та кузпалъёс акыльтӥзы ог-огзылэсь, ыштӥзы яратонзэс. Шузиос ук? Нош ты дорысь корказы али но кыкназэс висьтэммытэ . Нокудзылэн но уг поты кельтэмзы дорзэс, но ӵош улэмзы озьы ик уг луы. Соин ик кузпалъёс малпало огъя возетъёс, кудъёссэ асьсэлы ик одно быдэстоно луэ. Ӝоген ваньмыз йырин-чукин берытске. Семьяысь "Горд но тӧдьы розалэн ожез" мукет ӧре выже, воштӥськонъёс вае, паймымон но серемес учыръёсы вуттэ. Та кино пуктӥсьлэн ужъёсыз пӧлысь тужгес тодмоез луэ.

Views: 253

Replies to This Discussion

RSS

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования