Uralistica

Степан Эрьзянь 140-це чачома иезэнзэ алтазь арсема сёрмадовкстнэнь кувалма «Руця» Лезэпаргонть мельёвтамозо.

Степан Эрьзянь  140-це чачома иезэнзэ алтазь арсема сёрмадовкстнэнь кувалма «Руця» Лезэпаргонть мельёвтамозо.

2016 иень ожоковонь 27-це чистэнть топодить 140 иеть Степан Эрьзянь чачома чистэнзэ. Те эрзянь покшчинть тешкстамга,  «Руця» эрзянь Лезэпаргось ютавтсь эрзянь ломантнень ютксо арсема сёрмадовксонь пелькстамо: «Степан Эрьзя. Мейсэ сонзэ питнезэ эрзянь раськенть туртов?»

Кинь ульнесь мелезэ ледстямс Степан Эрьзянь, ды путомс арнема те ине эрзянь ломанентень сёрмадызь те кевкстеманть коряс эсь мелест-арсемаст.

Сёрмадовксост кучнызь минек лемс.

Весе сёрмадовкстнэнь путнинек башка темас «Эрзянь вал» Интернет курос. Ютавтынек пелькстамо. Сехте виев сёрмадовкснэнь кис «Руця» эрзянь Лезэпаргось пурнась казнекс 10000 целковойть. Кинь ульнесь мелезэ лездамс те эрзянь тевентень, сеть эрзятне ды эрзянь раськень ялгатне каясть а покш ярмакт .

Пелькстамонь лововкстнэ истямот.

Эсь арсема мелест Степан Эрьзянь кувалма эрзянь кельсэ сёрмадызь ды кучизь: Жегалина Римма (Покш Игнатвеле), Рябова Людмила (Саран ош), Кудряшов Виктор (Самара ош), Боляень Сыресь (Киев ош), Эрюш Вежай (Полярной ош).

«Руця» Лезэпаргось сюкони неть эрзянь раськень культуранзо ды каштанчинзэ кис мелявтыця ломантненень. Весе сёрмадозь арсема мельтне виевть, домкат, превейть. Эйсэст ули эрзянь мель ды кемема Эрзя раськес, каштанчи Степан Эрьзянь ине тевензэ кис.

Неть сёрмадовкстнэ маштовить ловномс Степан Эрьзянь лемензэ кундамо читнестэ.

 «Эрзянь вал» курос совсиця ломантненень седе пек тусть Римма Жегалинань ды Людмила Рябовань сёрмадовксост. Неть кавто эрзянь аваломантнень ламот содасызь паро эрзянь тевест кувалма. Вейкесь эйстэст седе иев, омбоцесь – од тейтерьава. Кавонест мазыйть, превейть, талановт.

Секскак, «Эрзянь вал» курос совсиця эрзятнень мелезэст нежедезь, «Руця» Лезэпаргось сась мельс: пурназь ярмакказненть явтомс кавтов ды каземс превей ды питней сёрмадовкстнэнь кис Жегалина Риммань (5000 целковойть) ды Рябова Людмилань (5000 целковойть).

Пингеде пингес эрязо Степан Эрьзянь валдо лемезэ! Сон невти, кодамокс эряви улемс эрьва эрзянь ломанентень, кодамо виезэ ды таланозо тиринь эрзянь раськенть, кона нейгак чачтни превей ломанть.

 «Руця» Лезэпаргось.

2016 ие, ожоков, 11 чи.

 

 

 

Эрзятне, эрзякс. Ловнодо, эрзят, содадо…

Илинк максо ине Эрзянть лия раськенень. Сон мерьсь:  «Мон –Эрьзя!» Неень стака шкатнестэ ламот эрзят пелить истя мереме эстедест. Лемдить эсь пряст шабра раськень апаро валсо. Степан Эрьзя эзь пеле. Сон невтизе, кода эряви вечкемс эсь раськенть. Сонзэ эрямозо, керсевксэнзэ невтить  тенек, кодамо сэрьс касы ломанесь, зярдо нежеди эсь раськес, эсь раскелемень вечкемас. Содадо, эрзят, минь карматано кеместэ аштеме, шумбрасто эрямо Модамасторонть лангсо ансяк сестэ, зярдо кеместэ карматано аштеме Эрзя раськелеменек кис.

 

2016 иень ожоковонь 27-це чистэнть топодить 140 иеть Степан Эрьзянь чачома чизэнзэ. Те эрзянь покшчинть тешкстамга,  «Руця» эрзянь Лезэпаргось ютавты эрзянь ломантнень ютксо арсема сёрмадовксонь пелькстамо: «Степан Эрьзя. Мейсэ сонзэ питнезэ эрзянь раськенть туртов?»

Кинь ульнесь мелезэ ледстямс Степан Эрьзянь, ды путомс арнема те ине эрзянь ломанентень, инеськеть, сёрмадызе те кевкстеманть коряс эсь мелензэ-арсеманзо. Аволь кувакасто.

Сёрмадовкстнэ кучозельть «Руця» Лезэпаргонть лемс: erush2002@mail.ru. 01.10.16 видьс.

Весе сёрмадовкстнэнь путнинек «Эрзянь вал» Интернет курос. Ней ютавттано эрзятнень ютксо а покш  пелькстамо. Сехте виев сёрмадовксонть кис «Руця» эрзянь Лезэпаргось максы изницянтень казне – 10000 целковойть.

Пелькстамонь лововкстнэ-результаттнэ лововить 2016 иень ожоковонь 20-це чистэнть.

Кинь ули мелезэ путомс эсь ярмакт те пелькстамонь казнес пшкадеде миненек. Вишка мельёрмадовкстнэнь ловнодо седе ало.

«Руця» Лезэпаргось, тевветиезэ Эрюш Вежай.

 

Эрзянский фонд «Руця» к 140-й годовщине со дня рождения Степана Эрьзи.

27 октября 2016 года исполнится 140 лет со дня рождения Степана Эрьзи. Отмечая эту дату Фонд «Руця»  проводит  среди эрзян конкурс небольших заметок-эссе «Степан Эрьзя. В чем его ценность для Эрзя народа»?

 Всех, у кого возникло желание вспомнить Степана Эрьзю и отдать дань уважения великому сыну Эрзя народа, написали своё мнение и мысли по этому поводу. Не длинно.

Свои мысли-эссе по этой теме присылались на адрес: erush2002@mail.ru до 01.10.16.

Все присланные эссе мы выкладываем в отдельной теме в Интернет группе «Эрзянь вал» для небольшого конкурса. За самое сильное произведение Фонд «Руця» учредил  приз в размере 10000 рублей.

Итоги конкурса будут подведены 20 октября 2016 года.

Желающих внести денежный вклад в призовой фонд конкурса просим обращаться к нам. Присланные мини эссе читайте ниже.

Фонд «Руця», координатор Эрюш Вежай.

 

Кучозь мель-сёрмадовкстнэ. / Присланные произведения.

Римма Жегалина:

 

МОДАНЬ ЛОМАНТНЕНЬ МАЗЫЧИСТ ТОН НЕВТИ.

ЭРЗЯНЬ РАСЬКЕНТЬ ЛЕМЕНЗЭ КЕПЕДИК.

ИНЕ ЭРЬЗЯ, СОН ТЕТЬ МОДАС СЮКОНИ.

ОД ШКАНЬ ЭРЗЯТНЕ ТЕТЬ СЮКПРЯ ЁВТЫТЬ!

 ***

   Ды вана монь ютавтовксом рузонь кельстэ Ламбина Светланань валморозо:

ЭРЬЗЯ, КОНАСЬ ЭРЗЯНЬ ЛЕМСЭ

( эрзякс ютавтызе Р.Жегалина)

 

Эрьзя, конась эрзянь лемсэ?

Истятнэсэ ломанькс ловить?

Сонзэ ули ёрокчизэ?

Тевензэ ваномс маштовить?

              

А видеть  истят вановкстнэ.

Вачочиденть сон сэреди,

Якшамось сэви  эйсэнзэ...

Сон  жо тейсынзе "эйдензэ"!

 

Зяро кавтолдомат, кажот!

Видечись пелькстамсто лиси.

Эрьзянь  корось чови   мрамор,

Видестэ,  мазыйстэ чови.

 

Аргентинань  кеме чувтось

Покш уцяска  сон  Эрьзянень.

Квебрачось ды альгорробось

Ульнесть тензэ - Пазонь казнекс.

 

Эрьзя пек  вечксы  раськензэ.

Стакачитнень сон изнинзе.

Уцясканзо–теевксэнзэ

Тиринь масторнэнь  казинзе!

***

Людмила Рябова:

 Степан Эрьзя. Мейсэ сонзэ питнезэ эрзянь раськенть туртов?

 

Раськентень, кона ламо тувталонь коряс кармась стувтнеме эсь лемензэ – виензэ, инечинзэ, – эряви  к е м е м а н ь  ш т а т о л. Истямо штатол, конань валдозо ютави сехте сэрей-кеме пирявксонь-кородовксонь пачк, конань саты виезэ токамс ломантнень оймест, сыремтемс потсост каштанчинь сятко. Сятко, кона шкань ютазь касы толокс, потсо палыця толокс, кона а мадстеви кодамояк варманень-даволнэнь. Те толонтень мерить  р а с ь к е н ь  ё ж о. Сонтемензэ керяви пингеде-пингес таргавиця рисьмесь, кона вейсэнди вейке раськень ломантнень. Сонтемензэ раськенть а ули  в а н  д  ы н ь ч и з э.

Эрзятнень ули истямо штатолост. Сон палы се ломаненть оймевийсэ, кона пингензэ перть бажась изнямс масторлангонь авидечитнень, кона эсензэ шкинемасо тюрсь сы шкань валдо эрямонть кис. Сон весе модамасторонть келес верьга вайгельть яволявтызе эсь раськензэ лементь – васенцекс ды вейкинекс. Сон содавикс ды малавикс ламо раськетненень, ансяк васняяк сон – м и н е к, сон – Э р ь з я!

***

 

Виктор Кудряшов:

Степань Эрьзядо мель. 140 чачома иезэнзэ.

 

    Эрьва раськенть улить ине ломанть,конатнень эряви содамс ды кирдемс сынст кувалма каштанчи.

    Эрзя раськенть истят ломанть ламо,сынст ютксо ,васенце таркатнесэ – Стёпан Эрьзя-весемасторонь содавикс кевень ды чувтонь керсицясь.

   140 иеть топодсть чачома чистэнзе,те таланов эрзянь ломаненте,ды неень шкас аволь весе эрзятненень,кадовикс содавиксэкс.

    Мезе теезь сонзэ кедьсэ - а ёвтавить валсо..Эряви сынст марямс-неемс потмоёжосо. Ванат Эрьзянь кедьсэ теезь кев ды чувтонь рунготнень лангс ды а кемеви - сынь изнявтсть эрий ломанне, аволь менельмасторонь эрицяне.. Кодамо вечкема Эрьзя макссь ашо кевентень, чувтонтень ды сыньгак тензе максызь эсь вечкемаст ды лавшочист, макссть теемс мартост сень, мезе бажась Эрьзя,теке налксесть карадо-каршо налкшесэ. Ды те вечкемась неень шкас кадови салавичисэ

 Эрьзя.. Мекс Стёпань покштяесь саизе истямо омбоце лементь, путозь чевте рукшнанть эрзя валонтень. Арсезеви,истя сон невтизе сехте покш вечкеманзо эсензэ тиринь эрзянь раськентень, панжизе педе пес весе оймензе, сыремтизе, сонзэ сельмсэ неезь, мадиця эрзянь раськенть толпандянть ды кандызе эсензэ кедьсэ сехте верев Эрзянь Масторонь пандонть тёкшонтень, макссь тешкс весе эрзятненень - мон ЭРЗЯ, теке икелев содась "цикань Родэнекс" зярдояк а улян, кадован свал эрзянь ЭРЬЗЯКС.

   Кадык одс кирвазтезь Эрьзянь кедьсэ толось палы эрьва эрзянь кудосо ды оймесэ, максы валдочи ды валдо ки эрьва эрзянтень, истя бажась неемс эсь раськензе Эрьзя. Истя улияк. Толпандясь палы неень шкас.

                                                                                              ***

 

Боляень Сыресь:

 

Степан Эрьзя - Неиця. Содыця. Маштыця. (140 чачома иезэнзэ. 27.10.1876 -27.11.1959)

 

      Те ульнесь пек умок. Вишкиненень. Тетянень та-кие казнесь кинига. Лангакссонть ульнесь путозь  тейтерьавань бюстонь ванмо. Бюст валонть, нама, мон мееле мария, сестэ мон теде а содылинь. Ней а ледстяви, мейсь мон кувать кирдинь киниганть кедьсэнь, ды ванынь аванть чаманзо лангс, зярс авам эзизе сае книганть эстензэ.

     Ютасть иеть, мон касынь, седе тов сырединь, ансяк те чамась тешкас сельме икелем ашти. Нама, ней мон содан седе ламо чувтодонть. Марявсть-ловновсть ды теевсть содавиксэкс  эрьва кодат «превей» валт: стиль, метод, резьба, суннер… Ансяк теке, зярдо мон ванан те чаманть лангс, кепетить кевкстематне. Кода истя эряви маштомс коське чувтонть лаксемстэ "чачтамс" башка, эриця чама. Неяви - те од, аволь однэ ава. Сон соды эсь мазычиденть ды чарькуди, мейсь тонть ванновксось прась сонзэ лангс  ды  мезде тон арсят сонзэ лангс ванозь. Те чарькодемась визделгавтызе сонзэ, ансяк эзизе кежиявто, паряк тонгак сонензэ неяват мельстуицякс ды сон учи седе тов  эскельксэнть…

       А содан! Паряк те эри ансяк монь прясонть…?

  Ульнесь эйкакшпингене, ды нейгак  кадовсь тетям тень певтеме авторитетэкс. Мезе мон кевкстинь книгадонть - а лецтяви, ансяк эзть истовтово тетянь валонзо Степан Эрьзядо:

    - «Улить, цёрам, неиця ломанть. Сынь неить сень, мезесь лиятненень а неяви судо ало. Улить содыця ломанть, конатне содасызь эрямонть потмоёжос, лисьмань потмаксос. Улить ломанть маштыцят, сынест Инешкиазось максь сырнень кедть. Ды улить ломанть, конатнень Инешкипазось казни  колмоксть: сынь Неить, Содыть ды Маштыть.   Истямокс ульнесь Степан Эрьзя».

               Течи монень ули мезе поладомс тетянь валтнэс. Степан Эрьзя, конань рузтнэ кода свал салазь-ускозь лемдить «русский Роден», а стяко саизе раськелементь эстензэ лемекс. Сонзэ таланозо, ине маштомазо а касоволь истямо сэрьс эрзя раськеденть башка. Истя касы

бояр пангось. Муемстэнзэ тонть кенярдомадонть лиясто лексемаськак лотки мазычиденть. Ансяк  а весе содыть косто сон саевсь, пангось. Тосо, мода потсонть, эйстэнзэ эрьва ёнов чиить-оргодить ламодо-ламо, прячерьде седе човинеть ундокскеть, конат пурныть модастонть весе пангонь касомантень эрявиксэнть. Аламот содыть: ве бояр пангонть ундокстнэ лиясто сралить вирьганть цела гектарс.

    Истя Степан Эрьзяяк!  Сон ульнесь трязь–кастазь эрзя раськесэнть.

Ансяк учовсь «лембе пиземе шкась» ды таланозо кайсь менельс.  Эрзя раськенть ундокскензэ течи анокстыть седе тов сыцят одт эрзянь родент ды моцарт, эйнштейнт ды ньютонт, моисейть, вашингтонт ды пургазт.  «Лембе пиземесь» ютаволь! Мон кеман – те пиземесь маласо!

Эрязо Эрзянь Раськесь, вечкевикс ялгат!

***

 

Эрюш Вежай:

  

Степан Эрьзя. Мейсэ питнезэ эрзянь раськенть туртов?

 

Ламо паро валт ёвтазь Степан Эрьзядо, ине эрзянь ломанденть.  Мон чачинь 1955 иестэ, зярдо сон эрясь. Карминь содамо Степан Эрьзядо ансяк иев ломаньстэ, сестэ, зярдо тень топодсть 30-ньде ламо иеть. Мекс? Истя эйсэнек тонавтсть, истя кирдивиесь кекшсь Степан Эрьзянь лемензэ эрзятнень эйстэ.

Нейгак рузокс кортыця, эрзякс а чарькодиця ломантненень рузонь СМИ-сэ сёрмадови истя: «Степан Эрьзя – великий русский скульптор». Маньчема? Нама. Ды кодамо… Ней чарькодьтядо, эрзят, мекс эряви содамс эрзянь келенть? Арази эрзякс сёрмадови «Степан Эрьзя – ине рузонь керсиця»?  Эрзякс те маньчемась сеск неяви! Ансяк эрзянь келенть а содыцятне манявить истямо сёрмадовкссо. Эрзятне, конат содасызь эрзянь келенть, седе превейть, мекс сеск чарькодить: Степан Эрьзя – те эрзянь керсицясь, эрзянь ине ломанесь, кодамояк аволь рузонь. Нама, Степан Эрьзя эрясь Россиянь империясо, СССР-сэ. Те чарькодеви. Ансяк ломанесь, керсицясь сон васняяк ЭРЗЯНЬ, кодамояк аволь «русский». Сонзэ чачтызе эрзянь ава, эрзянь раськесь. Истя шабра раськенек салы Степан Эрьзянь ине лемензэ эстензэ, теи сонзэ «русскойкс». Терявты кадомс Эрзя раськенек эрзянь ине ломантеме.

Мейсэ ине питнезэ Степан Эрьзянь Эрзя раськенть туртов? Сеньсэяк, эрзят: сон эрзятнестэ васенцесь, кие ёртызе эсь лангстонзо «мордва» псевдолементь. Сон васняяк мерьсь эстензэ: - «Мон – Эрьзя!» Ды те минек раськень лементь гайтевстэ невтизе-кепедизе весе Модамасторонть келес! «Мордватне» маньчить эйсэнек: келя, минек Модамастор келес содасамизь кода «мордва», секскак эряви миемс-ёртомс-кадомс-стувтомс Эрзя леменек ды лемдямс эсь прянок «мордва» псевдолемсэнть. Те виськстэме маньчема! Весе Модамасторось содасы Эрьзя валонть! Пильгс-модас  тень кис сюконямка тенек, эрзят, васенце эрзянь ломанентень, кона мерсь: -« Мон – Эрьзя!» Те эрзянь ломанесь – Степан Эрьзя. Содадо теде, эрзят. Теньсэяк – сонзэ ине питнезэ Эрзя раськенть туртов. Кода Степан Эрьзя эзь пеле эсь прядонзо сёрмадомс-меремс – ЭРЬЗЯ 110 иеть теде икеле,  истя эрьва эрзянтень меремка апак пеле нейгак, неень стака шкатнестэ: - Мон – ЭРЗЯ! Сестэ раськенек а ёми…

Просмотров: 47

Эта запись блога закрыта для комментариев

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования