Uralistica

Ог дышемъя малпай таяз аре но «Эль ныл» удмурт модая фестивале ветлыны. Удмурт модалэсь чеберлыксэ, аспӧртэмлыксэ, киосыным шонаса ик, дугдылтэк, ӟуч эшелы мади. «Удмуртская мода – это так интересно. Я же должна знать больше о современной культуре своей республики», - лӧптыса, со сӧрам куриськиз.


«Таяз аре ваньмыз официально, дыр, луоз», - малпаса вамыштсько Иж Музее. Зэм но, пырыку ик син шоры йӧто чебер дӥсяськем адямиос. Холлын ас арбериоссэс пӧртэм дизайнер студиос вузаса сыло. Син ик мальдэ, вань та чиборилэсь. Парадной залын подиум вӧзын пуконъёс, ярам хоть, кылем арен ӵошатыса, сылон интыез тросгес. Калык весь пыре но пыре, валаны кутскиськод, инты ваньзылы уз окмы шуыса. Бераз сылӥсьёсыз номыре адӟыса ик ӧз быдтэ, луоз. Нош кӧня журналистъёс, фотографъёс тарад вуэмын! Ужрадлэн ӟечлыкез шӧдӥське. Быдэс зал возьма мар ке паймымон, йырез поромытон. Тыл кысӥз. Шокан пытсаськиз.


Фестивалез усьтэ, шунды кадь пиштӥсь, яркыт Вика Волкова Роlina Kubistaлэн выль дэрем коллекциеныз. Polinaез тодӥсьтэмез ӧз ни, дыр, кыльы. Бордам сылӥсь ӟуч эше но шуэ: «Я влюблена в одежду Роlina Kubistы!» Зал качабонъёсы вые. Туннэ «Эль нылэз» ачиз Дарали Лели нуэ, со ик ди-джей но. Секыт ӧвӧл-а меда одӥг дыре кык уж лэсьтыны? Но Даралилэн ваньмызлы энергиез окме, лэся. Берло ми адӟиськом солэсь «Камали» кргезьгур студие ветлӥсь пиналъёслы дасям коллекцизэ но. Кыӵе шумпотыса, подиум вылын асьсэды гуртын кадь шӧдыса, вамышъяло та мусо пиналъёс!


Выль коллекциосын тодматскем сяна, учкисьёс пӧртэм мастер-классъёс учкизы. Шуом, Анна Сергеева вашкала дӥсьёсты туалаеныз нуллыны дышетӥз. Котьку дыре кадь ик паймытэ ас воображениеныз Татьяна Москвина. Огшоры кык пасё басмаез куинь пӧртэм накидкалы син азямы пӧрмытӥз. «Толон гинэ дас тямыс вариант малпам, али нош эшшо кык йырам лыктӥз на. Удмуртская мода безгранична!»- шуэ Татьяна Никитична. Зэм но, паймымон но паймытӥсь кышномурт!


Озьы ик коми-пермяк куноослэсь тӧдьы, сьӧд, горд буёлэн быдэстэм футболкаосэс адӟим. Чебер, огшоры улонын калыклэсь вӥсъськыны юрттоз. Нош «Йӧв» коллекциязы чылкыт тӧдьы но горд буёло дэремъёс, туникаос кышномуртъёслы гинэ ӧвӧл, пичиослы но нуллыны дасямын. Ненег, шуныт коми-пермяк дӥськут учкем бере, Пичи Пурга дизаёнеръёс аспӧртэмлыкенызы но задор мылкыдэнызы йырез пушкытӥзы. Зоя Лебедева кышномурт командаеныз чибориё керттэм шапкаосын, огшоры нуналъёсы ветлон но праздничной дэремъёсын асьсэос подиум вылын дефиле возьматӥзы. «Ничего не надо уметь. Надо просто взять в руки иголку и сшить платье», - озьы кужмо Пурга дизайнер ваньзэсты та ужлы бурдъя.


Пичи Пурга, кызьы шуэ Дарали, зэм но, дизайн удыслэн шоркарыз луиз ни, лэся. Малы ке шуоно эшшо одӥг дизайнер паймытӥз учкисьёсты улон шоры задор учкеменыз. Александр Пилинлэн войлокысь лэсьтэм шляпаосыз ваньзэсты мыньпоттӥзы. Сюро-а, пелё-а, кыӵеез гинэ ӧй вал! «Бураново – столица бурного настроения», - шуэ пиосмурт дизайнер. Вань та паймытӥсь, валантэм пургаосты Яна Якимовалэн лякыт, мусо дэремъёсыз небӟытӥзы. Диснеевской мультфильмъёсысь принцессаослы со дӥсен модалиос укшазы. Таин показлэн нырысетӥ люкетэз йылпумъяськиз.


Шутэтскон вис дыръя туспуктэмъёс лэсьтыны, интервью яке дизайнерской арбери басьтыны луэ вал. Модалиосын верасьемысь мон валай, соослэн туж шуныт омыр коллективазы кылдэмын шуыса, конкуренция ӧвӧл. MADEMOISELLE OUDMOURT агенствоын нош ик выль ымныръёс потэмын. Тужгес но шумпотымон, удмурт пияшъёс но мода удысэ каллен пырисько ни шуыса. Дарали куинь чебер пиосты Коля Михайлов, Артём Ермаков но Вова Широбоковез шедьтэм. Огез соос пӧлысь, Коля, таӵе модаен герӟаськем ужрадын нырысьсэ ӧвӧл. Йӧн возиськемез шӧдӥське ни. Оскисько, та куинь пиослэсь учкем карыса, мукетъёсыз но чеберлыкен асьсэды герӟаны мылкыд карозы.
Кыкетӥ люкетаз ми коми шапкаосты но рок стилен быдэстэм Елизавета Хуснутдиновалэсь коллекцизэ адӟим. Яркыт, тунсыко, бордаз золтӥсь котырез огшоры городын дӥсяд ке, ваньзылэсь вӥсъяськод! Туж ческыт коллекция. Таӵе паймымонъёс бере учкисъёсты сюрприз вите вал. Но кылем муртъёс лыдзыя кык поллы-а, куинь поллы-а учиёмизы. Ӝож. Озьы ке но, СуперЭбга перфоманс - тём пеймытын гирляндаен шудон, омырын кыӵе ке тайна кылдытӥз. Фестивальын Вера Кузнецовалэн сяськаё дэремъёсыз но Альбина Николаевалэн но 312 bags сумкаосын коллециязы берпуметӥ вал.


Нош Эль ныл быръён таяз арын туж висъяськиз. «Азбар» пу мастерской быръёмъя, Катя Ермакова, ваньзэсты мыняменыз мальдытэмез понна, пуысь чебер весь вормиз, нош Дарали удмурт магазинэзлы – пуысь ик лэсьтэм «Дарали лавка» вывеска. Юри Эль ныл нимтулын нокин пусъемын ӧй вал. Кылем арын та ужрад шуныт гурт омырен пыӵамын вал, нош туэ серьёзнойгес. Трос выль дизайнер нимъёс потӥзы.


Вань та ужрад ортчем бере мон вераськи ӟуч эшеным Даша Рябоваен. «Я будто попала в сказку. Такая пестрота, теплая атмосфера, удмуртская мода и сопровождающая её музыка, а еще куча фотографов! Мне очень понравились. Захотелось приобрести что-то из дизайнерских вещиц. Я вообще не представляла, что у нас столько талантливых и РАЗНЫХ, не похожих друг на друга дизайнеров. А Дарали удивляет своей харизмой. Меня еще обрадовало то, что модели все улыбались. Они не были похожи на худых, мрачных и серьёзных моделей из телевизора». Озьыен эшшо одӥг ӟуч адями удмурт культура борды кыстӥськыны кутскиз!

Просмотров: 394

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Женя Корепанова, Апрель 21, 2015 в 7:42pm

со,мон понна,стериотипной мнение,модали пиос зэмос воргоронъёс ӧвӧл шуыса.мынам вань тодмоосы пи модалиос.соос номаин но уг висъясько.модали ассэ возьматэ озьы ик,кызьы,шуом,кырӟась ассэ сцена вылын

Комментарий от: Ortem, Апрель 21, 2015 в 2:16pm

чебер дисяськон ласянь соглаш, нош модали луон - туж воргорон уж овол кадь, мыным потэ

Комментарий от: Женя Корепанова, Апрель 21, 2015 в 2:16pm

мкш удмуртъёс пӧлын нылкышноос гинэ ӧвӧл уг)) пиосмуртъёслы но чебер дӥсяськоно уг) 

Комментарий от: Ortem, Апрель 21, 2015 в 11:00am

валамон. умой, кык кылын ортчиз шуыса.

Нош малы удмурт модалы воргорон модалиос кулэ?)

Комментарий от: Женя Корепанова, Апрель 21, 2015 в 9:03am

Артем,удмурт но ӟуч кылын.Малы ке шуоно вал трос ӟуч учкисьёс.

Комментарий от: Ortem, Апрель 21, 2015 в 2:01am

Женя, туж тау рос-прос мадемедлы! кыӵе кылын та ужрад ортчиз?

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования