Uralistica

Настя Петрова - туж аспӧртэмлыко удмурт нылаш. Школаысен ай (мон но, со но Алнаш шоръёзо школаез йылпумъямы) шӧдскиз солэн эшъёсыз пӧлысь висъяськемез, азьветлӥсь луэмез. Со понна кин ке котыраз биниськиз, но тросэз палэнтӥськизы, шораз кырыж учкизы. Милям озьы ук: адями мукетъёсызлэсь висъяське ке, со алама, вӧзысьтыз пегӟоно.

Али Настя Удмурт кун университетысь удмурт филология факультетын дышетске. Быдэс Элькунлы со тодмо луиз кылем арын "Мисс Удмуртлык - 2011" ӵошатсконын вормемез бере.


- Настя, кыӵе огъя малпанэд кылиз "Мисс-Удмуртлык" конкурс сярысь? Оло, маиз ке ӧз тырмы яке мултэс вал?

- Та ӵошатскон мыным кельшиз. Вераськонъёс, споръяськонъёс купальникъёсын этапез кельтоно яке куштоно мыным мултэс пото. Со конкурсын, кытын нылъёслэсь вылтырзэс, мугорзэс учко, купальникъёсын потаны кулэ. Визьзэс викторинаосын но возьматэмзы луэ. Вератэк кельтэме уг поты, ӵапак сыӵе конкурсъёсын адями усьтӥське, аслыз золгес оскыны кутске (ваньмыз азьын ассэ возьматэ, солы чабо, шуныт пумитало ук!), залысь атмосфераез но умой.

- Нош мар верасалыд интернет-голосование пумысен?

- Сое ортчытъяно, но куараослэн лыдзыя учконо ӧвӧл, дыр. Зэмзэ вераса, мон та конкурсэз ӧй поты вал. Со этапын тужгес трос куара люказы соос, кинлэн эшъёсыз интернетын ӵем пуко, кинэ нылъёс асьсэ понна голосовать карыны куризы. Мон нокинэ номыр сярысь ӧй куры. Кин сётӥз мон понна куаразэ - ас мылкыдызъя озьы лэсьтӥз. Озьы ке но, жюри монэ ӧтиз. Валаллям, лэся, аспӧртэмлыко, тунсыко луэмме.

- Маиз конкурсын тужгес кельшиз?

- Ас киын лэсьтэм арбериосын аукцион но Алексей Ложкинлэн юанъёсыз! Аукционын мынэсьтым куро мунёме 500 манетэн басьтӥзы, солы туж пайми. Нош Алексей Арсентьевич оломар но юаськиз - огласянь, серем кадь, мукет ласянь, малпаськытэк валэктон уд сёты. Кылсярысь, азьтӥз яке бертӥз мерседесэз котыртод? Мон мое уг котыръя, пушказ пуксё, шуи.

- Туэ малпаськод на-а та ӵошатсконэ пыриськыны?

- Уг ни, мон со пыр потӥ, будӥ. Зэмзэ вераса, чеберлыкъя ӵошатсконъёсы мон 3 пол пыриськи ни. Кыӵе ке выль этапе, кудаз мон ӧй на ветлы, асме ӧй на возьматы, ӧтизы ке, шумпотыса мыно. Нош ортчемаз кукетӥзэ - уг. "Мисс-Италмас" титулме вылезлы чеберайлы сётыны дась.

- VKontakte-ын али та ӵошатсконлы сӥзьыса, нимысьтыз бам усьтэмын. Отын Марина Галичанина ӵектэм кыӵе ке выль этап малпаны, маин ке кылем конкурслэсь тазэ висъяны. Кызьы тон малпаськод, мар ке кулэ на-а?

- Чеберъя ӵошатскон, мон малпамъя, классической луыны кулэ. Али со туж умой, номырзэ йылтоно но кулэстоно ӧвӧл. Таӵе конкурсъёсын "изюминказэ" асьсэос пыриськисьёс малпаны кулэ. Кылсярысь, мон кылем арын ӵошатсконлэн котькуд этапаз выль образэн потай, азьвыл пӧртэм дӥськут аслым дасяй, нош дасяськон комнатаын нимысьтыз ӧтем парикмахер йырсиме тупатъяз, причёскаме вошъяз. Одӥг дизайнерлэсь дэремъёссэ радъяськись адӟытонъёсын но учкыны луэ. Нош таӵе конкурсъёсын мае ке мукетсэ возьматоно, усьтӥськоно. Ӵапак татын пӧртэм нылъёс адӟисько, возьмато калык азьын висъяськемзэс, яркыт луэмзэс. Финалэ пото тужгес чеберъёсыз.

Кин меда туэ "Мисс-Италмас" ним басьтоз? Ӝоген тодом. Нош Настялы выль вормонъёс но азинсконъёс сӥзём.

Просмотров: 436

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования