Uralistica

Миша Боров – сехте здоров. Эрзянь вий!

Кезерень шкасто саезь эрзянь цёратне лововить виевекс ды шумбракс. Нейгак яла улить тюрьган обуцяст коряс згилямот: келя, васня тюрить, мейле ансяк кармить кортамо-вешнеме чумотнень. Ансяк ине вий мартотне свал лият – сэтьметь.

Шабра раськетне свал тешкстыть эрзятнень сэрест, шумбрачист ды сановчист. Мезе ансяк ашти Михаил Боровонь лемезэ!


Чачсь Михаил Боров 1896 иестэ Самара ёнксонь, Похвистнева райононь Красные Ключи эрзянь велесэ. XIX прядовомсто тесэ эрясть Роман ды Евдокия Боровтне. Сынст ульнесть 5 эйкакшост: Яков, Григорий, Матрена, Никита ды Михаил. Яков ды Михаил ульнесть сехте покштнэ – кавто метрадо седе сэрейть. 

Тетязо Роман Дмитриевич ульнесь сэрей (малав 2 метрат ды 15 сантиметрат), обуцянь коряс сэтьме ды арсиця. Авазояк, Евдокия Васильевна – Олда, кода эрзякс мерильть сонензэ, ульнесь тетянть коряс. Авась свал кандтнесь викшнезь эрзянь оршамот ды карксазь пулай. Олда свал морсиль эрзянь морот. Эрзянь аванть ванькс вайгеленть кунсолокшнось весе велесь…
Аванзо ёндо Бережковтнэ истяжо шумбральть. Мишань тренерэзэ Ф. Лавренов сёрмадсь: «Михаилонь дедазо тельня потпанарсо лисиль банянь уштомо ды кепе ютыль баняв парямо ды банястояк – кепе. Мон Мишанень кортан: «Сон превстэ лись?», а Миша ёвтыль: «Минек весе истя теить…
Весе Боровтне ульнесть паро ломанекс ды сеедьстэ лездыльть стака важодемасо велесэ ломантнененьгак.


Миша Боров – истя мерсть весе малавиксэнзэ. Сон ульнесь васенце изницякс СССР-нь грекень-римень бороцямонть коряс. Васенце чемпион-профессионал! Арседеяк! Эрзянь церантень савкшнось вастовкшномс XX пингень сехте виевтне марто. Истя ульнесть изнязь Иван Поддубный, Осман Абдурахманов, Кристап Вейланд-Шульц, Клеменс Буль, Феофан Лавренов, Федор Кожемяка, Василий Ярков, Сергей Алопский.
















                 Михаил Боров - Эрзянь ине бороцицясь   

        Иван Поддубный - Рузонь ине бороцицясь                                                                                                         

Якстере Армиясо Мишанень ковшка эзть муе оршамот. Сон якась карьсэ ды ансяк мейле колмо кемстэ сонензэ стасть вейке. Истяжо весень мельсэ ашти се, кода Михаил Боров лавтово лангсо пулемет марто (60-66 кг.) уйсь лей. Ялганзо неизь, кода тона берёксто Миша лись ведьстэ ды сонзэ копоренть лангсо ульнесь пулеметось, а станинась сюлмазель наразь прянтень.

Кода ледстнесь Н. Г. Жеребцов, Михаил Боров тренировкат тейнесь истя: ёртыль лавтовонзо лангс 500 кг ды истя апак кавтолдо якиль.
Содыйтне свал неильть асатыкст сонзэ бороцямосонть, анасяк свал дивасть, кода цёрась вийсэ свал изниль. Эрьва изнямонть мельга сон ёвтыль вейке вал: «Вадря». Рузонь ялгатненень свал марявиль «За зря». Ансяк эрзятне содыльть, кодамо смусть те валсонть.
Бороцямонь тевесь кандыль ярмакт. Миша Боров явшилизе велесэ ярмактомотненень. Вана кодамо алкуксонь эрзясь: виев, превей, валдо, раськень вечкиця, тиринь масторонь ванстыця. Истя 1927 иестэ Иван Поддубный лия масторга гастрольтнень мельга самсто энялдсь эрзянь цёрантень полавтомс сонзэ ды ардомс важодеме Америкав. Ансяк тиринь масторонть вечкемась ульнесь певтеме. Миша лиядсь эсензэ тиринь велес.
Эсензэ велестэ сон муизе вечкеманзо, тонавтыцянть Алаксандра Любушкинань. Иень ютазь сынь тейсть свадьба весе эрзянь койтнень коряс. Свадьбантень сакшность ломантне весе маласо велетнестэ. Паз эзь максокшно тенст эйкакшт ды паро эрзятне сайсть эстесть кавто эйкакшт ды максызь весе лембест сынст кастомантень.

                                     Истямокс неи Калаганонь Керяз Миша Боровонь


Церанть кастызь эрзянь масторось ды эрзянь койтне. Вана истямоль минек эрзянь виесь! Се шкасто саезь эрзятне кортыть: «Миша Боров – сехте здоров! Истямо шумбрачи марто ломанть мастор лангось эзь нейне ды, паряк, зярдояк а неияк. Ды сон ульнесь минек, эрзянь.

                                                        Эрзянь виенть течи тыненк невтия мон, Учеваткин Сантяй.


P.S. Материалось анокстазь http://ru.borba.com.ua/events/856/ сайтонть лангс нежедезь.

Просмотров: 2746

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Erush Vezhai, Ноябрь 17, 2014 в 9:41pm

Сюконямот, Сантяй! Пек вадрясо лиссь!

Комментарий от: Boljaenj Syresj, Сентябрь 10, 2012 в 10:18pm

Вешнинек минь сонзэ калмонть. Ярмакт алтакшнынь аволь вишкат тосо важодицятненень. Кортыть пек стака тевесь. Калмолангось 75 гектар. Книгась, косо сёрмадозь кие косо калмазь, 1941 иень калмамонь -ёмась, палсь. Кортынь калмолангонь прявтонть марто. Шкань ютазь гайневтькшнян тензэ. Арась, эзизь муе....

Комментарий от: Olesh, Май 31, 2012 в 7:10pm

Кавто метрань сэрьмасо цераломань. Мазый рунго марто. Сталмозо ульнесь 130 килот. Сон 40 иесэ шождасто чиилинзе 100 метратнень 11,8 секундас.
 Подбельск ошонь центрасо вейке ульцясь кандтни М.Боровонь лемензэ. Ладязь сонзэ ледстнемга мемориальной лаз. Эрьва ие райононь спортсментнэ бороцить сонзэ лемсэ пелькстамосо.
Эсензэ енксонь писательтне В.К.Радаев ды М.А.Втулкин пурнасть Миша Боровдо малав 100 легендат, витнизь ды анокстызь нолдамс башка книгасо.
 В.М.Пивкин эрзя ломанесь Новосибирскстэ нолдась М.Боровдо книга.
Пек ламо эрьва кодат тевконевт (документт), архивной материалт емасть минек масторсо Ине Отечественной войнань шкастонть. Ды эрзянь маралянть эрямокидензэ ламо мезе минь а содатано. Пек эряволь бу тень весе ванномс...
Кулось Миша Киев ошсо. Калмазь Байковой калмазырьсэ.
1957-це иестэ ялганзо: Ярков, Загоруйко, Леонидов, Раков, Некрасов, Арнаутов, Белявский, Петров, Точеный, Карелин, Голуб ды лиятне муизь калмонзо, витнизь ды сёрмадсть ризксэнь палманенть лангс: «РСФСР-нь чемпионось, борецэсь Боров Михаил Романович, 1896-1941 и.и.»
Бути Киевсэ эрить эрзят, инеськеть, покш энялдомам - муемс Михаил Боровонь калмонзо. Тееде фотография, невтинк миненек. Истямо ломань а эряви стувтомс. Куш кодамо информациянть кисэ евтан седейшкавань сюкпря.



Комментарий от: Кувакань Азор, Май 31, 2012 в 9:29am

Тюштянь покш цёрат пек виев! :)

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования