Uralistica

Ижкарын улыкум, коми студентъёс дорамы вуылыку, паймылӥ, макем зол милям кылъёсмы кельшо. Соин Сыктывкарын дышетскыны луонлык вань дыръя, сое кельтыны уг яра, малпай. Фин-угор университетъёс вискын аспӧртэмлыко Ассоциация кылдытэм бере, отысь (фин-угор улосвылъёсысь вылӥ дышетсконниосысь) студентъёслэн но дышетӥсьёслэн луонлыкъёссы будӥзы. Кылсярысь, табере анай (финн-угор) кылэз тодӥсь дышетскисьёс быгато та ассоциацие пырись котькудаз университетын 1 семестр ӵоже воштӥськыса дышетскыны. Мон ӝыны арлы Сыктывкаре мынӥ. Нырысетӥ арняяз трос арбериос син шорам йӧтӥзы (али малпанэ вошӥськиз ни: дыши, лэся). Но ваньзэ сое гожтыса потӥ:

  • Удмурт но коми кылъёс ог-огзылы кельшо ке но, нимысьтыз созэ яке кыкетӥзэ дышетытэк, ваньзэ уд вала, уд вераськы.
  • Воштӥськон программая Сыктывкаре вуыса, асме студент уг ни кожаськы. Дышетӥсьёс монэ вань студентъёс радэ уг пукто, вылӥегес.
  • Коми шаер сокем бадӟым вылэм: куд-огез дораз кемагес бертэ мон Сыктывкарысен Ижкарозь сярысь (мыным сюрес вылэ 15 час пала кулэ).
  • Студентъёслэн общежитиязы, кудаз монэ интыязы, ваньмыз дыръя ужа: кухняысь плиткаос, лифт, душ (пӧсь вуэз кысыло). Но ӝыт 23 часозь пырыны ӧд вуы ке, 6 часозь котькытӥ ветлы: тон понна ӧсэз нокин уз усьты.
  • Куазь 2-3 градуслы Удмуртиын сярысь кезьытгес. Дорам бертакум, жаль-жаль зориз. Нош татын со вакытэ лымыен лэзьяськыса шудӥллям ни.
  • Тамак кыскисьёс Сыктывкарын тросгес! Таиз серем потоз, дыр, но Ижкарын мон шоканы быгатӥсько, татын ке котырысьтым бырисьтэм тамак ӵынлы но дыши ни кадь.
  • Автобусъёс дугдылонниосын кема сыло. Куд-ог дыръя пыдын ӝоггес вуод. Нош автобусъёс но маршруткаос сяна, мукет транспорт ӧвӧл (трамвайёс но, троллейбусъёс но, метро сярысь веранэз ик ӧвӧл). Но такси утыр ик вуттэ кытчы кулэ – город бадӟым ӧвӧл.
  • Мынам синйылтэмея, Сыктывкарын тросгес интыос, кудъёсызлэн нимъёссы ӟуч но коми кылын гожтэмын.

 

Али мон Сыктывкарын. Ӝыны ар ӵоже татысь студентъёсын параосы ветлӥсько, тодмоосыным но эшъёсыным пӧртэм ужрадъёсы вуылӥсько. Но макем тросгес кылӥсько коми кылэз, сокем умойгес валасько, со удмуртлэсь зол висъяське шуыса, кызьы азьло малпалляй, арня ӵоже татын улэме бере, коми-зырян сямен вераськыны ӧй кутскы.

Мон сямен ик, воштӥськон программая Иошкар-Олае Удмурт кун университетысь удмурт филология факультетысь 4-тӥ курсын дышетскись Оксана Кандакова мынӥз. Со верамъя, пор кыл секытэн сётӥське, эшшо одӥг кунсьӧр кылэз выллем дышетоно. Но огъяулонниын со комнатае 3 пор нылъёсын шедем. Озьыен, ӝоген вераськыны но кутскоз.

Нош мон огъяулонниын комнатаын огнам улӥсько, озьы ке но мӧзмыны дыр ӧжыт. 2 толэзь татын улыса, вуылӥ ни пӧртэм параосы (расписание аслым ачим лэсьтӥ, кельшись дисциплинаос гинэ бырйи), коми егитъёслэн «МИ» мерлыко огазеяськонзылэн пресс-конференцияз, Россиысь финн-угор драматургъёслэн конкурс-семинаразы, М. Н. Лебедев коми гожъяськисьлы сӥзем конференцие, этноконцертэ, эшъёсы доры куное ветлӥ. Озьы ке но, али но ӧй на «комиёмы» (та кылэз Дарали Лели малпаз, мыным ке со кельше). Но троссэ валасько ни, ма понна туж шумпотӥсько.

Кылем арын Сыктывкарын коми кылэз мон сямен ик Коля Анисимов дышетӥз. Ваньмыз пӧлысь тужгес трос дырзэ со Финляндиысь Нико Партанен эшеныз ортчытӥз. Коля алама тодӥз финн кылэз, нош Нико ӟуч сямен чик уг вераськы. Коми студентъёсын эшъяськыса, соос куспазы но ӝоген коми кылын ӟабыльтыны кутскиллям. Таиз ласянь, жаляса верано, мыным сыӵе ӧз удплты. Вань эшъёсы но тодмоосы ӟучез тодо, мынам соосын коми сямен вераськыны кылы уг берыктӥськы!

Али мон воксё мукет карын, шаерын, выль адямиос пӧлын. Мукет улонэз улӥсько кадь. Луонлыке вань аслэсьтым шаерме Комиен ӵошатыны, Ижкарез – Сыктывкарен, умойзэ но аламазэ пусйыны. Удмурт но коми кылъёс туж кельшо шуон дорозь азьланяз нырысь малпасько, зэм но туж кельшо-а. палэнысен ваньмыз мукетгес вылэм. Университетын «Удмурт кыл но выль информационной технологиос» группаен ӵошатоно ке, милям группамы коми кылэз чик ӧз дышеты. Али мон со сярысь жалясько, малы ке шуоно татын «Калыккуспо отношениос» люкетысь студентъёсын лыднимъёсыз но «Семья» темаез ӧй дышетысал ни, оло, коми студентъёсын ӵош пичигес курсэн параосазы пукысал, тросгес валасал.

 «Малы мыным кулэ коми кыл?» али вераны шугъяськисько. Тодэм нянь уг куры шуо ук. Кылэз тодэм – эшшо ик. Туж оскисько, сыӵе ӟеч, котьку капчи мылкыдо но юрттыны дась луись дышетӥсьёсын но эшъёсын мынам одно ик ваньмыз пӧрмоз, выль арозь «комиёмо» ик.   

Просмотров: 267

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Ноябрь 17, 2012 в 2:16pm

Андрей, тау малпандэ гожтэмед понна, тунсыко))Но берпуметӥез ласянь мон тазьы шуысал: комиез чик дышетытэк, малпалляй, со удмуртэн зол кельше шуыса. Бигерен чуваш кылъёс но палэнысен гинэ огкадь кылӥсько, дыр. Дышетыны кутскид ке, туж капчи уз поты, малпасько. Туж зол кельшысалзы ке, пӧртэм кылъёс ӧз луысалзы, диалект нимаськысал.

Комментарий от: andrewboltachev, Ноябрь 17, 2012 в 1:13pm

Сыктывкар сярысь эшшо одӥг малпан:

Мон понна Сыктывкар нырысь ик кыӵе ке «дуннелэн пумыз» кадь потӥз. Адямиос урамъёсын ӧжыт, трос буш, паськыт интыос. Карлэн шораз интыяськем аэропортысен кӧня ке вамыш лэсьтод ке — вужесь пу коркаос сюрыны кутско ини. Котькытын чалмыт. Таиз кельшиз, малы ке шуоно ноку но сыӵезэ азьло ӧй адӟы (Кировын котьку но котькытын кыӵе ке ӵашетон). Собере трос мукет синйылтымон арбериосты адӟи но.

Кылсярысь, общагаын (мон вал кыӵе ке колледжлэн общагаяз) ваньмыз озьы ик умой, но, бен, пӧсь вуэз 2 арнялы кысӥллям. Веразы — 2 арнялы гинэ кысомы, пе, но сое кысэм бере ӧй адӟы ни (али но ӧвӧл бере, иське соос али но тупатъямысь ӧз дугдэ, дыр).

Тамак кыскисьёс тросгес, бен. Уката ик туж трос нылъёс но нылкышноос кыско но.

Урамъёс не котьку чылкыт, куд интыосын туж трос жуг-жаг луылэ. Трос каръёсын вань сыӵеесь машинаос, кудъёсыз урамъёстӥ ветло но щёткаосын, кӧня ке ву лэзьыса, асфальт мисьто. Татын, малпасько вал, городтӥ ветлэ аспӧртэм машина, кудӥз асфальт мисьтон интые со жуг-жагез урамъёстӥ пазялля.

Со сяна, асьсэлэн коркаосазы, ужан но шутэтскон интыосазы комиос ярато кадь чеберлыкез, уката ик узырлыкез потӥз мыным. Автобус билетлы ик дун но бадӟымгес (15 манет), Кировен ӵошатыса (Кировын со дыръя 12 манет вал). Сыктывкарысь автобусъёс Кировысьёсызлэсь вужгес ке но. Уксёез трос мар понна уг жаляло. Уг тодкы, умой-а со яке урод.

Коми кыл удмуртэзлэсь золгес ӟучомем кадь потэ. Лексика ласянь гинэ ӧвӧл, синтаксисын вань но туж йӧспӧртэм конструкциос, кылсярысь — «Ленинлы коми йӧзсянь». Удмуртэ кылысь-кылэ берыктыса «Ленинлы коми калыкысен» луоз. Малы ке шуоно «-сянь» («-ысен») падеж ӟуч «от» предлогез котькытын воштэ, соин ик берыктон сыӵе калькалы пӧрме. Мукет пример — «удж вылын» («уж вылын» — «на работе»). Но коми тодосчиос озьы валэкто — удмурт кылын трос кылъёс ӟуч кылысь но, бигер кылысь но басьтэмын, а коми кылын — ӟуч кылысь гинэ. Соин ик солэн «ӟучомеменыз» удмуртэзлэсь коми кыл сокем трос уг висъяськы.

Коми но удмурт кылъёслэн аспӧртэмлыкъёссы но коми кылэз дышетон амал сярысь малпаськыса одӥг эшме тодам ваи. Со ачиз бигер, мусульман. Ми тодматским «Россиысь кылъёслы кылысь кылэ берыктон автоматической системаосты лэсьтон» Чебоксарыын ортчем семинарын. Нырысетӥ нуналэ ми, кулэ коркаез (университетэз) утчаса ураметӥ мынӥмы. Мон солэсь ӟуч кылын юай «А ты не знаешь, далеко ли нам ещё идти?». А со мыным кык коркаосты возьматӥз но шуиз «Корпус мында корпус». Мон номырез ӧй вала, малпасько вал, со ӟучез уг тоды, оло, Казахстанысь лыктэмын, дыр, малпай. Собере гинэ англи кылын мыным валэктӥз со, со ачиз Башкир шаерысь но «Россиын мон вераськисько бигер но башкир кылъёсын гинэ». Сыӵе тунсыко солэн анай кылэз утён амал! Зэм но, солы ӟуч кылын вазисько ке, со яке бигер кылын вера, яке уг вераськы. Одӥг пол, куке общежитиын (нылпиослы лицей-интернат) солы ӟуч кылын отысь комнатаямы лыктэм бухгалтер вазиськиз, со котьку сямен ик бигер кылын вераз. Бухгалтер ӧз вала. Но, куке со ӧжытак чуваш кылэз тодэмзэ возьматӥз, со бухгалтер паймиз но шумпотӥз. Тӥни озьы Рөстәм одӥгез тунсыко анай кылъёсты утён амал возьматӥз — ӟуч кылэз кутытэк улыны. Но, огшоры улонын озьы уз луы, дыр, уката ик финн-угор регионъёсын. Коми республикае лыктыса мон малпай — а удмурт но коми кылъёс бигер но башкир кадь ик туж матын, дыр, соку мон но ӟуч кылтэк уло. Но бигер но башкир кылъёс со воксё одӥг кыл кадь, а удмурт но коми зол висъясько вылэм, соин ик, жаль, озьы уз луы.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования