Uralistica

"Соин куное мыныку, мыным кык тусьты сиёно луэ. Юалоды малы? Малы ке шуоно со сугон уг сиы! А мон кыкетӥзэ тэркыез мырдэм бушатыкум, со кузёосын ӟабыльтэ, собере нокин уг шӧды, кин ке сютэм кылиз шуыса. Но со котьку, кин ке дораз бертэ ке, нимысьтыз сугонтэк кыӵе ке пыжиськем вайыны косэ!" - ӵош дышетскись эшез сярысь серекъяса вера Москваысь Щепкин нимо училищеын дышетскись Костя Никитин. "Озьы ке но, со туж умой но капчи мылкыдо адями, валась эш, учкымон дышетскись". 

Кин сярысь со озьы?

Шораз учкыса, куд-огез уз оскы, со удмурт шуыса. Юнме гинэ. Со – зэмос удмурт. Тунсыко, вераськись, котькытчы вуттӥськись, чебер, визьмо, капчи мылкыдо. Тодматске – ӝужась кизили Максим Князев.

Пияш учкисьёслы тодмо луиз удмурт-поляк «Узы-боры» киноын Алмазэз шудэмез бере. Максимлэн верамезъя, со ноку ӧз малпалля та уж сярысь. Школаын озьы пӧрмиз – дышетскон сое сцена вылэ вуттӥз. «Туж  троссэ та ласянь Балезино ёросысь Исак(ово) школаысьтым дышетӥсьёсы лэсьтӥзы:  мынам сценкаосын шудыны мылкыды чик ӧй вал, но со понна  литературая, удмурт кылъя «5»-ёс пуктылӥзы. Озьы пыриськи одӥгаз концертэ, мукетаз ужрадэ. Нош собере…  Культурая колледже пыри». Таиз образование Максимлы  зол юрттӥз. Аслаз верамезъя, со ӵапак татын усьтӥськиз, дӥсьтӥсьгес луиз. Но колледжез йылпумъян араз Щепкин нимо вылӥ театральной училищее пырон сярысь конкурс ялӥзы. Коть кыклы люкиськы: кун экзаменъёсыз но сётоно, ӵошатсконлы но дасяськоно. Максимлэн ваньмыз пӧрмиз.

 Москвае дышетскыны пыремез понна пияш бадӟым тау каре Г. С. Корепановлы: школаын дыръяз ай, «Ӟечбур!» газетлэн удмурт театрын ортчись юбилеяз Максим огаз номерын шудӥз, ӵапак соку сое элькунысьтымы дано артист но синйылтэм. Бӧрысь куддыръя отын-татын пумиськылӥллям, нош Щепкин нимо училищее конкурс ялэм бере,  Геннадий Семёнович шуиз: «Алнаш палъёсысь трос артистъёс, ми палась но луыны кулэ. Ӧд ке пыры – мон азьын эн но возьматскы». Максим тодаз вае: «Мон  умой валасько вал, со ӟеч малпанъёсын та кылъёссэ вераз шуыса, но, зэмзэ ке, пырымтэелэсь кышкай. Щепкае вуэм бере ни, огез гинэ туж паймытӥз: вань дышетӥсьёсынымы удалтӥз! Котькуд нунал жингыртэ худрукмы, юаське, мар кариськомы яке кытчы ветлыны малпаськомы шуыса, визь но ӵем гинэ тыре, но ми солы котьку шум потӥськом (86 аресъем визьмо адями улонэз милесьтым трос поллы умойгес тодэ, юнме уг ӟабыльты). Уг быгатӥськы вератэк Глафира Николаевна Никольская сярысь. Со милемлы татын анай кадь: чакла, яратэ, кулэ ке - юрттэ. Гуртын сямен соин удмурт кылын гинэ вераськиськом», - вераз Максим.

Москваын араз 10 толэзь дышетскыса, эшъёсмы гужем гинэ доразы вуо. Но куинь каникулэз пӧлысь туэ кыкетӥзэ ни Максим висъяз удмурт-поляк кино лэсьтонлы.  «Узы-борыысь» пӧяськись Алмазэз шудэмез бере, анаез мырдэм сое «Пузкарез» пуктыны лэзиз. «Бен малы, пие, тон умойтэм адямиез шудӥд? Али но сыӵе ик ролез быдэстод-а?», - тодаз вае Максим анаезлэсь кылъёссэ. «Ма, кино ук со, шуи но таяз радэ Гаян нимо пияшлэсь рользэ быдэстыны мынӥ. Али пукисько но малпасько, тазэ но, кыкетӥзэ но мукет сямен лэсьтысал шуыса. Дыр ортчыса гинэ валаны кутскисько, мае ке ас вакытаз шонертэм кари шуыса», - малпанзэ шараяз вуоно актёр. Но ӵапак кино бордын ужаса, Максим рос-прос валаз: туж потӥз ке но, зэмос улонын дубль уд лэсьты, кыкетӥзэ кыӵе ке вакытэ уд берытскы, лэсьтэмзэ воштыны уд быгаты.

 

Шуг-секытъёсыз пырпотэмезлы, улонлы шумпотэмезлы, азьланезлы ужпумъёс  пуктыны но адямиосыз бордаз кыскыны быгатэмезлы (группаяз Максим староста луэ) синмаськемысь уд дугды. Алмазэз шудэмез но алама палысен сое уг возьматы: со понна ик со актёр – аслыд тупась адямиосыз гинэ ӧвӧл, пумит луисьёссэ но возьматыны кулэ (табере, Максимен тодматскыку, тросэз, пе, юало, со бигер ӧвӧл-а шуыса). Ӧвӧл, удмурт со. Но выляз «Пузкар» киноын мукет палысен усьтӥськоз. Соин ӵош дышетскись но киноын шудэм эшез Надя Наговицына Максим сярысь трос ӟеч кылъёс вераз но тодаз вайиз соизлэсь одӥг серемес учыре ӝимемзэ: Огпол тулыс нуназеян вакытэ Максим магазинэ потэм. Мынэ но ас понназ, пе, пайме, малы ваньзы  шораз учко. Йырзэ ӝутыса ик азьлань вамыштэ. Магазинэ вуыса гинэ, зеркальной ӧс шоры учкем но валам: соку со сьӧд очкиен вылэм, нош огез пиялаез усем, ачиз пияш шӧдымтэ но сое. Эшшо Надя сӥзёнъёссэ вераз на: юн тазалык – асьме ужамы со солы одно ик кулэ луоз. Со сяна - улонысь котькуд чеберлыксэ адӟыны! Максимка, оскы аслыд но азьлань мын!

Мон Надялэн кылъёсыз борды итӥськисько гинэ. Но малпасько, матысь дыре милемлы валтӥсь каналъёсыз но сакгес учкыны яра ни, оло, отысь но эшмес адӟом? Кин тодэ, тодмо кизилиосын, кудъёсыныз та дырозь туспуктэмъёсы пуксьылӥз, куке, оло, бадӟым киноосын ӵош шудыны но кылдоз ай?

Просмотров: 957

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Декабрь 26, 2012 в 7:22pm

mon no ta pijashly sinmasjkemyn, tuzh jarkyt adjami

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования