Uralistica


Даволковонь куншкачитне

Паро ялгам, Бакич Видяй, гайкстась ды ёвтась Башкирэнь масторов концерт марто ардомадо. Истя, Башкирэнь масторов, тынь эзиде маняво. Тосояк ламо эрзят эрить. Мельспаросо вастыя те кулянть, карминь учомо. Аравтозель 2.03.2013 чись.

P.S. Меельце шкасто сеедьстэ савкшны ардтнемс Видяй марто, лездамс мейсэяк (ды те ломанеськак (Витя) ламо паро тейсь монень). Видьстэ меремс – ялгат.

 

Даволковонь прядовома читне

Седе икелень кортамосто кода-бути прязон эзь сова таркась, косо карми ютамо Видяень концертэсь. Неень кортамосто карминь содамо: Фёдоровский район, Федоровка веле. Лемдсынек сонзэ буекуншка (райцентра). Сыргатано веть 1-це чистэ, косояк 3 чассто. Мельспаро ульнесь марямс паро кулянть ажиотажонть ланга. Билеттнэ миевить, ломантне пурнавить. Кортыть, мик автобуст-газельть арендас сайнить. Тувталось сеньсэ: эрзятне те буесэнть эрить аволь ансяк Фёдоровкасо, истяжо маласо 4 велетнесэяк. Ушосонтькак пек паро. Арасть ловт-вармат, чипаесть мизолды. Вадря!

 

Даволковонь 28 чи

Валске марто стинь паро мель марто. Вачтынь вальмава – вай, авакай! Ушосонть ловонть пачк мезеяк а неяви, кисэнть уски-тарги ловшушмосо (истя эрзятне лемдить «заносы», «сугробы» чарькодематнень).

Ладсия те чинть истя: молян важодеме, чокше ёнов сан кудов (стувтыя тенк ёвтамс, эрян Саранскойсэ, Химмашсэ), шлян-теян, ярсан, удан  сыргамодо икеле ды оймсезь ки лангов. Ардомась аволь вишине: малав 1000 вайгельбеть (километрат, кода седе сеедьстэ кортыть). Вадрясто шкам ладсия! Весе видестэ! Таго стувтынь: ардомась машинасо, Приорасо.

Течинь важодемась лиятнеде мейсэ-бути лия. Мейсэ? А, эврика! Течи минек паро ялганть, прявтонть, «Торамань» течинь седеензэ, превензэ ды оймензэ, Йовлань Андюнь (Ромашкин Андреень), чачома чизэ! 30 иеть те тенк аволь раксемат! Покш чи эрьва ломаненть эрямосо. Кода свал минь теинек репетиция. Морынек седикелень эрзянь ды мокшонь морот. Мейле важодинек од проектэнть лангсо. Кодамо од проектэсь? Шкась карматадо содамо. Казнекс кадык карми!).

Репетициясь мольсь талай чокшнес (талай чокшне – поздний вечер). Мейле аламодо ялгацек пурнавинек ды тешкстынек паро оянок кенярксчинзэ. Малав 22.00 чассо ульнинь кудосо. Вечкевикс козиканть (вечкеви монень истя кортамс, Сабанцелекс) марто озынек ярсамо. Тесэ сонзэ телефонозо гайгезевсь. Марявсь Йовлань Андюнь вайгелезэ, саия трубканть. Тосо капшазь вайгель монень пшкадсь: «Тонть мекс телефонот мадстезь, косат? Бакич Видяй вешни эйсэть, кодаяк а гайкстави». Вай, Верепаз! Алкукскак, телефоном «кулось».  Ёртомс сонзэ сэрей пандо прясто. Батарейказо а кирди цёкояк (цёко – фиг). Путыя виензиямо (зярядамо) ды гайкстынь Видяйнень. Кортамостонть маринь: нейке сыргамка. Сыргамось путозель 23.00 шкас.  А мон истя тайнтейстэ лёмодинь (лёмодемс – есть с аппетитом) ямдо. А удомась кода сась…

Пурнынь-сэрнинь ды килангов. Александр Торбин, Видяень продюссэрэзэ (зярс эзия арсе эрзякс те валонть) «совась» кисэнь ды сыргинек.

 

Фёдоровкав килангось

Кода икелев ёвтазель, кись стакаль: эй (покш мелем ульнесь тезэнь сёрмадомс эсень кортавкс ладсо – энге), ловшушмот. Васняяк миненек эрявс ардомс Дубенкабуев, Поваделев. Тосо эри минек тештенек,

ялганок, эрзянь моронь кепедицянок Бакич Видяй. Торбин марто кортамсто Дубенка видьс 80 вайгельбетне мезекскак эзть маряво. Ардынек Дубенкат-Поваделеть (вана косо эрзятнень пизэст), саинек Витянь ды сыргинек Ульяновск ёнов (кие а соды, Ульяновскоё ёнов минек ардтнить Дубенкабуень пачк).

Вадря миненек Видяй марто ульнесь: нувсеме карматано – мадтяно. Руль экшсэ аштицянтень свал седе стака. Яла матедевемань пачк ансяк марявсть чиньжарамонь чулксематне.  Истя седе а матедеви ломанесь  ардомсто.

Инязорокс удынек Витя марто.

А содан зярс удынь…                                                       

                                                                                                               Дубенкасо

                                                          

                                 

                  

Концертэнь чись

Сельмень панжинь – бензинэнь нуртямо тарка (заправка), весе удыть машинасонть. Весенень эряви оймсемс. Колмошка часонь лекстязь «прявтонок» стясь ды сыргинек ардомо.

Ютавсть Ульяновскоень-Самарань модатне. Тесэ ламоксть вастневсть эрзянь ёнов молиця лемтне. Нолдынк чумом (простямизь), стувтынь.

«Чалгинек» Оренбургонь моданть лангс. Тагояк стувтынь: мон ульнинь навигаторокс. Кедьсэнь Россиянь киланготнень марто картатне. Ардомсто Видяй ёвтни яла, кода морсесть тесэ, морсесть тосо. Малав весэ эрзятнень таркаст педе пес ардтнинзе. Алкуксонь цёра! Саемс Бугурусланонть. Ламо историят, раксемань тевть маринь пельдест. Эсеньгак мелем покшоль неемс, кодамо те тамашань Бугурусланось.  А содылинь, пек паро ялгам, Таганонь Дима, тосоль те чистэнть. Шкась сы – соватано.

Оренбургонь модатне – певтеме паксят… Неть паксятнестэ неявить модаверень (нефть, маряви) потямо кшнитне. Потить ды потить… А пешкедить… Теке лемзийть (клещ). Маласо эриця ломантне эрить аволь сюпавтосто: кардазт-кардт сяворезь. Минек свал ков-бути аволь тов туи сюпавчинек. Тов-тов, васолов, лия масторов, маряви… Килангось седеяк берякадсь. Асфальтось, маряви, прядовсь, кармась кевень ки. Ды косто саемс асфальтс ярмак. Тесэнь модавересь туи трубава тов, косо паро асфальтонь китне.

«Навигаторось» весть манявтызе руль экшсэ ардыцянть ды аламодо совинек аволь тов. Татаронь кавто велева ардомсто кинек прядовсь, ансяк нурдосо ардомат седе тов. Весень ёжост аламодо колавсь, шка ёмавтозь. А чумо монь, картань артыцятне-теицятне манимезь. Мезеяк, 20 вайгельбеть ансяк.

Неть 20 вайгельбетнеде сеске стувтынек, зярдо картасо мазый ды паро артозь кись прядовсь, а бензинэнек баксо лиядсь 5-шка литрат. Пачкодинек…

Витянь кургсто секень тев маряви: «А кенердтяно!». Удалов ардомс васов ды бензин арась, икелев – ки арась. Вачинек ардомс Елизаветинка веленть пачк – валязь! Бензин арась, ки арась, ломанть арась, ушосонть давол, варма, лов.

Лисинек машинасто. Вачтынек перть-пельга. Паксянть тона пеле неявсь вейке ломань. Колмонек ношкстынек тов, кумажа видьс лов потмова.

Ведьгеменьшка иесэ цёрась аламодо тандадсь эйстэденек. Кода а тандадомс. Сон пештсь олгт, а тесэ даволонть потсто лиссть асодавикс чамат. Минь карминек кевкстнеме кода-мезе, кува ардомс, косто муемс бензин. Кортамостонть  чарькодинек: ки седе тов ансяк Елизаветинка велест пачк. Превезэнь сеске сась «Поворот не туда» фильмась. Атянть бензинэзэ арасель. Ёвтась тенек, келя, Шемуляков Владимирэнь свал ули миемс. Чачсь кемема.

Веленть пачка сыргамсто машинанок ваясь.

Савсь Видяй марто тенек аламос улемс лишмекс. Мезе паро, машинась таргавсь. Веле куншкава ардынек, муинек Шемуляковонть. Цёрась, келя, свал лезды тия ардтницятненень. Маласо бензин арась косояк. Питневстэ мии (40р. литразо), ансяк текеньскак кецинек. Седе тов ардомсто весэ пелематне аламодо оймасть. Лисинек эрявикс килангонтень. Лиядсь ансяк кенеремс 19.00-с.

 

Мезеяк. Пачкодинек Фёдоровкав. Буекуншкаванть ардомсто сеске сась мель: ломантнень чамаст тесэ эрзянь. 18.30 минь пачкодинек ДК-ть икелев. Вастымезь эрзянь ава, Елена Николаевна. Нурькине шумбракстнемат ды куроксто аппаратурань ладсеме. Совамо таркасонть пунавсть ламо ломанть, маряви шалт. Тесэнь важодицятне андыксэлимезь морамдо икеле, ансяк шка арась. Ломантне ойсесть ды учость паро мельсэ. Малав 200 ломанть.                                                                                     Морамодо икеле

                                 

Клубсо

                                       

                                                                      Бензинэнь нуртямо таркасо 

Маряви, ломантне эзть учо истят од ломанень морот. Весень сельмсэ неявсь: пек тошнакадсть тиринь келест-морост кисэ. Ансяк мекс-бути пелить, пек цяпамс, серьгедемс. Аволь кувать истя ульнесь. Машты Видяй кирвазтеме залонть. Весе ютась мельспаросо. Удалце рядтнэсэ од тейтерькатне киштсть. Ды вишка эйкакштнэяк. Вай, вадря!

Вейке берянь тувтал: аламо од ломанть, пек аламо. Сакшность 40-50 иесэ ломанть. А одтнэ… Берянь тевесь. Кеман, витеви зярдояк.

Бакич Видяень умонь коензэ коряс кунсолыцятне сёрмалесть кевкстемат. Пек ламольть кевкстематне. Колмо-ниле эйстэдест ульнесть мокшонь кельсэ, мокшотнень пельде. Мейле кортамотнестэ карминек содамо вейке мокшень велень улемадо. Мокшень аватне сёрмасост лемдсть Витянь «Алкуксонь мокшень алякс», шнасть сонзэ мокшень келенть кепедеманть кис. А содан мейсэ тувталось, паряк тосонь ломантне а содыть мокшонь ды эрзянь авейкексчиде (маряви содыть). Истя, мокшонь ломантнеяк кадовсть мельспаросо малавикс эрзянь келенть кунсолозь.

Мартонок Сергей мокшонь цёрась

Сехте паро кевкстеманть кис ульнесь казязь «Штатол» од дискесь Юля од тейтерентень. Эсь сёрминесэнть Юля ёвтнесь Саранскойсэ тонавтнемадо, Бакич Видяень концертсэ а весть улемадо, шнась паро моронзо, весенень кортась тиринь келень а стувтомадо. Ваннодо Юля марто кортамонь видеонть.

Мезе меремс – мельспаро! Ламо од вийть пурнынек Башкириянь эрзятнень пельде. Сынь – минек пельде. Монгак сцена лангсто ёвтынь зярыя валт эрзянь келень ды раськень вечкемадо. Кармавтынь тонавтомс эйкакшост тетятнень-аватнень тиринь келентень, весень тердинь «Раськень Озксов».

Концертэнть мельга клубонь важодиця тейтертне тердимезь ярсамо. Эрзянь, мокшонь, рузонь аватне каванимезь эрьва мезде. Мартост кортамсто карминь содамо эрзянь келенть школасо тонавтомадо. Васенце классто саезь кемвейкеецес! Ансяк тонавтнек! Ламо кортынек культурадо, тиринь кельде, вандычиде…Чокшненть ютавтынек гостиницасо.

 Эрзянь ды мокшень культуратнень таркине

                    

Кудов

Стинек, а ушосонть седеяк давол, весе китне ловпотсот. Арсинек, кода ней пачкодтяно, эдь Башкириянь масторга китне чистязь, а томбале, Оренбург ёнксось – вай-вай! Кемемась ансяк Пазонть ды минек руль экшсэ, Александр Торбиннэнь, аштицянть лангс. Ардынек састо. Ки чирева неявсть тия-тува машинат, конатнень ёртызе килангсто. Мезеяк. Паро ветиця марто берянь кись парокс маряви.

Весе давол варматне стувтовить. Башкириянь эрзятнень марто вастовомась – зярдояк.

Кой-кона одт ды стувтозь валтнэ:

буекуншка - райцентр;

лёмзий - клещ;

лёмодемс - есть с аппетитом;

модаверь - нефть;

цёко - фиг.

                                                                                                                  Uchevatkin Santjai

Просмотров: 650

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Эрзянь Мель, Март 21, 2013 в 7:07pm

Дима,  акие лемдизе модаоекс?)

Комментарий от: Эрзянь Мель, Март 19, 2013 в 10:28am

Учеваткин корты))

Комментарий от: vijan, Март 19, 2013 в 7:15am

нефтанть эрзякс лемезэ - модаой)))

Комментарий от: Василий, Март 18, 2013 в 3:30pm

Кодаяк а чарькодян, кие корты "Эрзянь мель"-ть пельде. Учеваткин, Виктор эли кияк лия?

Комментарий от: Эрзянь Мель, Март 18, 2013 в 9:07am

Фёдоровкасо лия раськетькак эрить, арсян. Тосо неинек мусульманонь озномакудо. 

Комментарий от: Ortem, Март 16, 2013 в 10:28pm

Фёдоровкасо кить эрить? Васняяк эрзятне эли човор лия раськетнень марто?

шарьхкодян, мар гожтэмын. родо-влак) туж тунсыко. 

Мекс сынст Башкиронь масторса эрить?

Комментарий от: PaoL, Март 16, 2013 в 1:35pm

Фёдоровкасо кить эрить? Васняяк эрзятне эли човор лия раськетнень марто?

Комментарий от: Эрзянь Мель, Март 15, 2013 в 6:18pm

Сюкпря, паро валонк кис! Сынь максыть ламо вийть ды седе тов кастыть эрзянь меленть!

Комментарий от: Василий, Март 14, 2013 в 6:39pm

Шумбрат, Александр. Мельспаросо ловныя кулят Башкирияв ардтнемадонк. Паро евтнема. Мелезэм тусь. Евтак Витянень пельденень паро арсема ды покш изнямот эрзянь моротнень теемасо-ладямосо. Тонетькак арсян шумбрачи, уцяска ды вий.

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования