Uralistica

Авась-сех питней ломань эрьванть туртов. Сон чачтыцянок, трицянок, виде кинть невтицянок. 

Кемайкина Пелагея Игнатьевна кастызе эсензэ тейтеренть алкуксонь эрзякс. Сюкпрянь ёвтамга, тейтерезэ, Маризь Кемаль (Раиса Кемайкина),  аванзо валдо лементь ледстнемга нолдызе «Масторов нолдасынек сюкпрянок» книганть.

 

Маризь Кемаль масторонть келес содавикс эрзяванть, минек раськень коень-кирдань содыцянть, сормадыцянть марто вастовкшнынь сонзэ эрямо таркасонть.

 

Книгадо пешксе нупальсэнть эрзявась максь тень кудова якамо карсемапелпель. Маризь патясь витькстась, неть мазыйкатнень тензэ казинзе сонсь Серафима Люлякина.

 

Эрзянь журналистикасо минек, од ломантнень ильведевкстнэде кувать кортамодонть мейле, окойники, ютынек книгадонть кортамонтень.

 

Маризь Кемаль ёвтнизе, кода  сась мелесь нолдамс истямо  пусмонть.  Седе домкасто оят, кунсолынк минек кортамонть «Вайгель» радиоканалонть эфирсэ 

 

"Вайгель" радиоканалонь эфир эйзюрговонь 26-це чистэ

 

Тешкставлия нурькинестэ, важодемась книганть лангсо мольсь умонь шкасто саезь.

Материалт те пусмонтень сон пурнась-сермалесь сыре ломантнень пельде ды этнографиянь книгатнестэ.

«Масторов нолдасынек сюкпрянок…» книгасонть  зярыя пелькст: «Кезэрень койть», «Эрзянь озномат ды пазморот», « Неень шкань койть»,  «Кенярксчинь сценарийть», «Эрзянь умонь шкань морот»,  «Неизвестное о самой известной» (Л.А. Руслановадо очерк).

Сюпалгавтыть пусмонть фотографиятне; меельце шкасто сёрмадозь стихтне.

Башка мель явови вишкинетненень. «Тыненк, тякинеть» пелькскесэнть –налксемат, стихть, ёвкст.

Кортамонть перть эрзявась тешкстызе, ламот койтне ульнесть ютавтозь 1990-це иетнестэ «Ламзурь» ансамблянть марто ды невтезельть телевидениява.

Питнейчизэ те книганть а онкставиця. Литературной сценарийтне лездыть школасо тонавтыцятненень; школасо, клубсо ды эйдень кужосо важодицятнень туртов.

Моненьгак сон ули паро лезксэкс важодеман перть.

 

Книганть лангс ярмактнень авась скирясь эрьва пенсиястозо. Весемезэ нолдавсть 200 экзэмплярт.

 

Сермадыцянть валонзо коряс, сон а карми микшневеме…Те шкамс Маризь Кемаль сонзэ явши ловнома кудова, школава, музейга.

 

Маризь Кемаль ловны М.А.Втулкинэнь валморо

Ванна истя нурькинестэ книгадонть, оят, сондензэ аламо марямс, эряви ловномс! «Масторов нолдасынек сюкпрянок…» книгась сюпалгавты эрзянь раськеденть содамочинть.

Поладксокс ёвтавлинь, туинь эрзяванть кедьстэ, паро мель марто. Капшинь седе курок ёвтнемс важодема ялган туртов те ине эрзяванть марто  вастомадонть ды нолдамс тевс сонзэ превс путоматнень.

Valda

 

Просмотров: 648

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования