Uralistica

Котьку но тунсыко потэ вал, кызьы диаспора улэ мурт калык пӧлын. Валамон, тужгес трос юанъёсы кылдӥзы палэнысь удмуртъёс пумысен. Та нуналъёсы быдэсмиз бадӟым малпанэ - вуылӥ Марий Элысь Мари-Турек ёросысь Бадӟым Карлыганэ.

Азьвыл малпалляй, та гурт пичи гинэ, нимазгес сылэ (историысь тодӥськом, удмуртъёс нюлэсъёсы интыясько вал шуыса - ӵапак озьыгес ик малпанам суредай Карлыганэз). Нош со бадӟым вылэм и даже нюлэскын но ӧвӧл, нош вӧзаз эшшо кӧня ке удмурт гуртъёс интыясько. 

Удмурт кыл
Жаляса верано, тросаз удмурт семьяосын нылпиос анай кылзэс тодытэк будо ни. Озьы ке но, вань на удмурт сямен вераськисьёс но. Удмурт культураез утьыны юрттэ "Ӟардон" ансамбль - отчы школаысь тросэз дышетскисьёс ветло, пе. Пиналъёс дышето кызьы удмурт кырӟан-эктонъёсыз, озьы ик поръёссэ, бигеръёссэ, ӟучъёссэ но мукетъёссэ.

Кыл сярысь ик - Карлыганысь удмуртъёслэн вераськемзы асьмелэнлэсь висъяське. Но! Мон соосыз уг валаськы ке но, соос монэ валало! Школаын литературной удмурт кылэз дышетэмзы туж пайдаё.

Ватсало на, нырысетӥез удмурт школа ӵапак Карлыганын усьтӥськиз, сое кылдытӥз удмурт югдытӥсь Кузьма Андреевич Андреев. Солэсь нимзэ ик нуллэ Карлыганысь шор ёзо школа.

Оскем потэ, удмуртлык Карлыганын уз быры шуыса.

Егитъёс
Мыным потӥз, Карлыганын соос трос. Ма, гуртсы но пичи ӧвӧл, валтӥсь урамлэн пумозяз ик ӧй вуы. Туж тунсыко: гуртын уло кызьы удмуртъёс, озьы ик поръёс, бигеръёс но ӟучъёс. Дышетско одӥг школаын, ветло "Ӟардонэ", дэмен шутэтско но шулдыръясько. Клубазы, дискотекаосысен, огкадь зол тапырто удмурт но, пор но, бигер но кырӟанъёсъя. Пичи дырысенызы ик вӧзысь калыклэсь культуразэ адӟыса, кылзэ кылыса, соин эшъяськыса будо. Та ласянь Карлыган - туж паймымон инты.

Паймымон отысь удмурт егитъёс но. Соос милесьтым висъясько - туж вераськисесь, капчи мылкыдоесь. Поръёслы матынгес-а мар-а.

Интыез
Гурт интыяське Марий Элысь Мари-Турек ёросын. Бускельёсыз - Татарстан но Киров улос. Географ мынэсьтым ӧз пӧрмысал: ноку ӧй малпа, балтаси но карлыган удмуртъёс ог-огзылы матын уло шуыса (соин диалектъёссы но матын, луоз).

Куное Карлыганэ дасяськиды ке, транспортэн куд-ог шуг-секытъёс кылдыны быгатозы. Но мылкыд ке бадӟым - шуг-секытъёслэсь кышканэз ӧвӧл.

P.S.: туж бадӟым тау дуно эшелы Марина Романовалы, солэн анай-атаезлы но вынызлы, Виталик Пронинлы но Дима Кузнецовлы, Карлыганысь выль тодмоосылы шутэтскон нуналъёсме выжыкыллы пӧрмытэмзы понна, туж шуныт пумитамзы понна!

Просмотров: 738

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Май 8, 2014 в 10:40am

мон ой адзы, но Мариналэн анаез вераз, пересьёс кылъёсыз тодо на шуыса. Алигес, пе, пумиськем 2 мойы кышномуртъёсын: одигез бигер, мукетыз пор. Нош куспазы бигер кылын, пе, вераськиллям.

Комментарий от: Oli, Май 8, 2014 в 8:15am

Тау, Лена. Карлыган - со зэм ик но мон понна паймымон инты. 

Куке-соку Ар-Серги вераз вал, улонам, пе, огпол адӟи вал "идеальное сообщество"-ез. Карлыганысен. 

Карлыганысь магазинын дорын, пе, 3 кышномурт куспаз вераськыса сылэ вал. Кыдёкысен ик дӥсезъя тодмано, кудӥз бигер, удмурт но пор. Куспазы соос котькудӥз ик ас анайкылыныз, пе, вераське вал. Порез пор кылын, удмуртэз удмуртэн, нош бигерез бигерен. Киосынызы ик макесъёсазы чапкиськыса, синъёссэс золъяса. Нокудзылэн но йыраз шуккымтэ ӟуче выжыны. Вань куиньна кыл соос понна огкадь вылэм - валамон но бускеленыд вераськымон. 70-тӥ аръёсы озьы вылэм. Али сокем шаплы куинь кылын вераськисез вань на медам?

Комментарий от: Anatoly, Май 5, 2014 в 8:23pm

вераськемзы карлыганъёслэн милемлы туж матын  (лельвижлы). фонетика ласянь но лексикаеныз но. милям но аффрикатаосмы овол, "з:" куара сяна 

Комментарий от: Лена Рябина, Май 5, 2014 в 8:20pm

отын не сахарная свекла вал, огшоры горд кушманэз озьы шуизы)

Комментарий от: Anatoly, Май 5, 2014 в 8:17pm

чукиндэр = сахар. свекла

Комментарий от: Лена Рябина, Май 5, 2014 в 7:12pm

Марина шуэ, артистъёс точно ӧз ветлэ. оло, дышетӥсьёс-дышетскисьёс асьсэ понна учкизы.

Комментарий от: Ortem, Май 5, 2014 в 7:00pm

Нош "Узы-Боры" соосньын вал-а?

Комментарий от: Лена Рябина, Май 5, 2014 в 6:56pm

Артём, кинлэн интернетэз вань, кылзо, пе, удмурт радиоез. Трос-а сыӵеос - шуг вераны.

Школае вуо "Ӟечбур!", "Кизили" но "Инвожо".

Комментарий от: Лена Рябина, Май 5, 2014 в 6:40pm

Лариса, ветлыны тыршы! тыныд со, малпасько, тунсыко потоз удмурт дӥськут ласянь но

Комментарий от: Lara Dmitrieva, Май 5, 2014 в 6:30pm

Ааа, тау, Лена, пост понна. Карлыган - со мынам мечта, туж мынэме потэ. 

Жаль, удмурт кылын егитъёс ӧжыт верасько шуыса. Тае уг тодӥськы вал. Интересно, малы. Милям, Кукмор ёросысь удмурт гуртъёсын ӧвӧл сыӵе проблема. 

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования