Uralistica

Котьку но тунсыко потэ вал, кызьы диаспора улэ мурт калык пӧлын. Валамон, тужгес трос юанъёсы кылдӥзы палэнысь удмуртъёс пумысен. Та нуналъёсы быдэсмиз бадӟым малпанэ - вуылӥ Марий Элысь Мари-Турек ёросысь Бадӟым Карлыганэ.

Азьвыл малпалляй, та гурт пичи гинэ, нимазгес сылэ (историысь тодӥськом, удмуртъёс нюлэсъёсы интыясько вал шуыса - ӵапак озьыгес ик малпанам суредай Карлыганэз). Нош со бадӟым вылэм и даже нюлэскын но ӧвӧл, нош вӧзаз эшшо кӧня ке удмурт гуртъёс интыясько. 

Удмурт кыл
Жаляса верано, тросаз удмурт семьяосын нылпиос анай кылзэс тодытэк будо ни. Озьы ке но, вань на удмурт сямен вераськисьёс но. Удмурт культураез утьыны юрттэ "Ӟардон" ансамбль - отчы школаысь тросэз дышетскисьёс ветло, пе. Пиналъёс дышето кызьы удмурт кырӟан-эктонъёсыз, озьы ик поръёссэ, бигеръёссэ, ӟучъёссэ но мукетъёссэ.

Кыл сярысь ик - Карлыганысь удмуртъёслэн вераськемзы асьмелэнлэсь висъяське. Но! Мон соосыз уг валаськы ке но, соос монэ валало! Школаын литературной удмурт кылэз дышетэмзы туж пайдаё.

Ватсало на, нырысетӥез удмурт школа ӵапак Карлыганын усьтӥськиз, сое кылдытӥз удмурт югдытӥсь Кузьма Андреевич Андреев. Солэсь нимзэ ик нуллэ Карлыганысь шор ёзо школа.

Оскем потэ, удмуртлык Карлыганын уз быры шуыса.

Егитъёс
Мыным потӥз, Карлыганын соос трос. Ма, гуртсы но пичи ӧвӧл, валтӥсь урамлэн пумозяз ик ӧй вуы. Туж тунсыко: гуртын уло кызьы удмуртъёс, озьы ик поръёс, бигеръёс но ӟучъёс. Дышетско одӥг школаын, ветло "Ӟардонэ", дэмен шутэтско но шулдыръясько. Клубазы, дискотекаосысен, огкадь зол тапырто удмурт но, пор но, бигер но кырӟанъёсъя. Пичи дырысенызы ик вӧзысь калыклэсь культуразэ адӟыса, кылзэ кылыса, соин эшъяськыса будо. Та ласянь Карлыган - туж паймымон инты.

Паймымон отысь удмурт егитъёс но. Соос милесьтым висъясько - туж вераськисесь, капчи мылкыдоесь. Поръёслы матынгес-а мар-а.

Интыез
Гурт интыяське Марий Элысь Мари-Турек ёросын. Бускельёсыз - Татарстан но Киров улос. Географ мынэсьтым ӧз пӧрмысал: ноку ӧй малпа, балтаси но карлыган удмуртъёс ог-огзылы матын уло шуыса (соин диалектъёссы но матын, луоз).

Куное Карлыганэ дасяськиды ке, транспортэн куд-ог шуг-секытъёс кылдыны быгатозы. Но мылкыд ке бадӟым - шуг-секытъёслэсь кышканэз ӧвӧл.

P.S.: туж бадӟым тау дуно эшелы Марина Романовалы, солэн анай-атаезлы но вынызлы, Виталик Пронинлы но Дима Кузнецовлы, Карлыганысь выль тодмоосылы шутэтскон нуналъёсме выжыкыллы пӧрмытэмзы понна, туж шуныт пумитамзы понна!

Просмотров: 743

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Май 5, 2014 в 6:28pm

вот тазэ секыт вераны. юано Мариналэсь) со кылзэ, мукетъёсыз сярысь но, оло, маке вералоз

Комментарий от: Ortem, Май 5, 2014 в 6:26pm

Нош интернет пыр кылзо-а? Трос-а?

Комментарий от: Лена Рябина, Май 5, 2014 в 6:23pm

"Удмурт дунне"  уг вуы - со Марий Эллэн каталогаз ик пыртэмын ӧвӧл. Радио но телевидение интернет пыр.

Комментарий от: Ortem, Май 5, 2014 в 6:19pm

Удмурт газетъёс но радиопередачаос соос дорозь вуыло-а?

Комментарий от: Лена Рябина, Май 5, 2014 в 6:19pm

фонетика ласянь ке, соослэн ӧвӧл аффрикатаоссы, зато ӱ-зы вань. но мукет пӧртэмлыкъёс, кылсярысь, вал интые воу

Комментарий от: Ortem, Май 5, 2014 в 6:19pm

ну лексика котькытын висъяське. Аскы но зок гинэ басьтоно ке

Комментарий от: Лена Рябина, Май 5, 2014 в 6:15pm

соослэн диалектсы мукет, честно-честно. фонетика ласянь гинэ уг висъяськы, лексика но пӧртэмгес (кылсярысь, ӧй вала, мар со чукиндэр - диалектологиын ортчи вал, нош улонын кылэме ӧй на вал)

Комментарий от: Ortem, Май 5, 2014 в 6:12pm

Малы соослэн вераськемзы тыныд сокем валантэм потиз? Маин со портэмъяське лымшор удмуртлэсь?

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования