Uralistica

3 нунал куспын 3 толэзь ӵоже мында адӟим но тодӥм.

Ӟечбур, Бавлы! 

Инвожолэн зоро нуналаз ми 8 кузя сюрес вылэ потӥм. Палэнысен бешеный туристъёс выллем адӟиським, дыр: я Челныысь вокзалын отчы-татчы бызьылӥм, я бадӟым куараен, возьмано-а эшмес шуыса, споръяським,  я серекъям... Эшшо газеле шедимы на кыӵе ке пиосмуртэн - образованитэк клоун. Ялан маке вера, серекъятэ, изьыны люкетэ. Со милемыз башкиръёс но шуиз, бигеръёс но, эшшо кин ке... Удмуртъёс шуыса гинэ ялан вунэтылӥз. Дышетӥз, гуртэ кыльыны уг яра, пе, Челнызэ весь ушъяз. Акыльтӥз ук сюрес кузя! Но ми золэсь - чидам.

Син азяды пуктэ гинэ: 8 мурт потэ автобусысь но ӟыгыртэ пияшез, нош соиз ымныртыр пальпотэ. Озьы ми, удмурт егитъёс, вуимы Бавлые, бигер удмуртъёс доры.

Палэнысь удмуртъёс, соослэн культуразы, кылзы удмурт филология факультетэ пыреме бере тунсыко потыны кутскиз. Соин Виталик Пронин эше куное отемез бере, ветлоно кариськи. 

Дярам ини - куазен ӧз удалты ке но, нунал удалтӥз

Сьӧрамы зорез но нуиськеммы: Бавлыын кема дыр ӵоже куазь кӧс возиськем, нош ми отын дыръя жаль-жаль кисьтӥз. Солы луыса Гырон быдтонэз но клубын ортчытоно луиз. Но гурт калык та понна сокем ӧз жӧжомы.

Клубазы ӵукна ик калык лачак люкаськиз, ваньзылэн концерт учкемзы потӥз, лэся. Нош кырӟазы но эктӥзы Татарстанысь удмурт коллективъёс но Удмуртиысь кырӟанъя но эктонъя "Айкай" театр.

Та нуналэ тужгес трос тодэ ваёнъёсы ӵапак "Айкайлэсь" кылизы кадь. Мон дышемын соосты сцена вылысь адӟыны, тодмо чебер кырӟанъёссэс кылзыны. Нош Бавлыын Гырон быдтон бере ми соос вӧзын сиськимы, вераськимы. М. Ворончихин егит дыръяз ми сямен ветлэмъёсыз сярысь вераз. Нош кошкон азязы "айкайёс" ваньзы ӵош "Улон" кырӟанэз быдэстӥзы.

Эшшо Маша Игонина ты ӝытэ тыллэсь шоу возьматӥз. Люкаськемъёс, ымъёссэс усьтыса, учкизы. Нош ми, бешеной туристъёс, зол-зол чабимы но кырӟанъёсты, кудъёсызъя со номеръёссэ пуктӥз, кырӟамы. Маша туж усто пӧрмытӥз, паймытӥз. 

Нош эшшо та нуналэ ик мон тодматски Паша Александровен - туж синмаськымон пияш, ӝужась кизили. Гырон быдтонэз но со нуиз, кырӟанъёс но со гожъя но быдэстэ, крезьгур инструментъёсын шудэ, адямиосын огкыл шедьтэ... Азинсконъёс тыныд, Паша!

Десь луэ, бигер удмуртъёс!

3 нунал ӵоже ми эшмылэн трос ӵыжы-выжыосыныз тодматским, соос доры куное вуылӥм. Котькытын туж дуно куноосты сямен пумитазы. Ӝӧк сьӧрысь ӝӧк сьӧры ветлӥмы. Вуылӥмы 4 пӧртэм интыосы: Бавлые, Урустамаке, Николашкиное но Бугульмае, ӝужыт гурезьёсы тубамы - уйин. Нырысь ӝытаз, дэрие коласькыса, гылӟылыса, мырдэм гурезе тубим, озьы ке но ӧм чигналэ. Малпалоды, вот шузиос. А вот и ӧвӧл. Бавлы, уйин кадь, ноку сокем чебер ӧвӧл, дыр - синмаськи уно югыт тылъёсызлы, пильмо ке но, пумтэм-йылтэм инбамлы. Эшшо, зэмзэ верано ке, мон котьку малпалляй, Айкай гурезь Башкириын интыяськемын шуыса. Нош ми Урустамакын гурезе Айкай вылэ шуыса тубам... Табере тодо, кытын со.

Та 3 шутэтскон нуналъёс понна туж бадӟым тау шуэме потэ... шонергес ке, баддьым ракмат (отын дыръям бигер удмуртъёслэсь вераськемзэс но валаны кутски ведь, нош гожъяськыны - ӧй, соин ик янгышъёсылы вождэс эн вае) Виталик Пронинлы, анай-атаезлы но Вероника сузэрезлы, солэн Урустамакысь но Бугульмаысь ӵыжы-выжыосызлы, Паша Александровлы но солэн семьяезлы. Табере тӥ Удмуртие вуылэ!

 

Просмотров: 242

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования