Uralistica

"Мастораванть" вечкевикс сёрмадкс кикстнэ" - "Любимые строки "Масторавы".

«МАСТОРАВАНЬ» вечкевикст сёрмадкс кикстнэ…».

 («Любимые строки «Масторавы».)

«Руця» эрзянь Ярмакпаргонть инициатевезэ.

(Акция эрзянского фонда «Руця»)

 

   Ацамковонь 21 чистэнть Эрзя раськесь, весе эрзятне тешкстыть «Масторава» морокерьксэнь (эпос) Чинть. Те Чись ютавтови 2-це Эрзянь Инекужонть Мельяволявтоманзо коряс   2006  иестэнть саезь.

      Зярс сон ютавтови вельть лавшосто. Эрзятне те паро эрзянь покшчиденть, витьстэ меремс, мезеяк а содыть. «Масторава» морокерьксстэнтькак аволь ламотне содыть.

 Тень мельсэ кирдезь, «Руця»-с совазь эрзятне ды Эрзя раськень ялгатне тердить эрзятнень седе келейстэ тедиде тешкстамс «Масторава»нь Чинть.

Тень коряс минь тердтяно эрзятнень, кить совсить Интернетс, ютавтомс истямо инициатев (акция), конань лемдинек «МАСТОРАВАНЬ» вечкевикст сёрмадкс кикстнэ…». Сон карми ютавтовомо «Эрзянь вал» ды «Вейсэ, эрзят, виевтяно!» И-куротнесэ.

Зэмезэ те инициатевенть вана мейсэ: Эрьва эрзясь кадык сёрмадсынзе ды сонсь путсынзе те темантень «Масторава»-сто сеть сёрмадкс кикстнэнь (строчки), конат тензэ седе вечкевить. Истяня седе ламо эрзят кармить содамо «Масторава»-донть ды седее парсте чарькодьсызь, мейсэ те инее эрзянь киниганть ине питнезэ. Сюконямот А.М. Шароновнэнь сонзэ кис!

Седе ламо сёрмадкс киксэнь путницянть «Руця» Ярмакпаргось арси каземензэ пек паро, превей эрзянь кинигасо.

Лездадо, эрзят, паро тевентень! Паро эрзянь тевсэ тешкстасынек «Масторава»-нь Чинть!

Эрюш Вежай,

«Руця» эрзянь Ярмакпаргонть тевветиесь.

Просмотров: 236

Эта запись блога закрыта для комментариев

Комментарий от: Erush Vezhai, Ноябрь 27, 2014 в 6:02pm

ПАЗОНЬ ПИНГЕ



Васенце ёвтамо

МАСТОРОНЬ ЧАЧОМА


ИНЕШКИПАЗ


Васня чачокшнось Инешкипазось
Весемень туртов паро тувталокс,
Моданть, эрямонть валдо ушотксокс.
Сонзэ чачомас, вийс-мельс касомас
Арасель мастор, велькссэнзэ — менель.
Ульнесь ансяк ведь вень чоподасонть.
Се иневедьганть, певтеме венть пачк
Уйсь сон састыне ашо кев лангсо.
Потмураль сонзэ сэтьме чамазо,
Нусманят ульнесть валдо сельмензэ.
Арсесь сон яла стака арсема,
Ине мель раштась ашо прясонзо.
—Мода-Мастор тень эряви теемс,
Нолдамс койть-илат, ломанть ды раськеть.
Ансяк ськамон, нать, вием а саты,
Бути сатыяк — аволь педе пев.
Арась лелям монь, арась ялаксом,
Арась ялгаяк, тевсэ лездыця.

Нуваргадсь Пазось, сонсь а соды мейс,
Апаро мельсэ сельгсь мик ведентень.
Уи састыне, мель касты кундамс
Седе куроксто арсезь тевентень.
Вана мейс-бути варштась у да лов,
Ней — мельганзо педясь покш губорь.
Те кевекс теевсь сонзэ сельгезэ.
Лоштизе кевенть сон цетмарсонзо,
Губоренть ламо пельксэс тапизе.
Яжазь губорьстэнть кирнявтсь Идемевсь,
Апарось пижнезь лиссь кевенть потсто.
Рунгозо понав, прязо вишкине,
Кургозо келей, сельмензэ кежейть.
Кармась Идемевсь капшазь кортамо,
Ушодсь эсензэ мельтнень евтамо:
— Пек тон сюмордат, Инешкипазом,
Ризнат-мелявтат яла ськамот тон,
Мекс арась лелят, арась ялаксот,
Мекс арась ялгат, тевсэ лездыцят.
Снартнят ськамот тон Мастор тееме
Ды лангозонзо койне нолдамо.
Мекс ялаксокс теть монень а улемс?
Мекс ялгинекс теть монень а улемс?
Мель явиндерят — улян ялаксокс,
Мель евтындерят — улян ялгакс теть.
Нучкань седееть сестэ витеви,
Тевтне арсевить, парсте теевить.
Ульть а ялаксокс, ульть аволь ялгакс
Ульть, бути маштат, тевсэ лездыцякс.
Нейке ушодан Мастор тееме,
Тон монень кармат човар кантнеме.
Истя муеви смусть эрямосон,
Кадса тевтеме ведьга лытамонть.
— Мейстэ Масторонть, Пазом, тейсынек,
Бути ансяк ведь ашти алонок,
Кона певтеме сравтовсь перть пельга,
Конанень арась а ушоткс, а пе,
Конанень арась, паряк, потмакскак?
Пазонть лангс пелезь ваны Идемевсь,
Учи пельдензэ валонь евтамо.
— Тень кувалт тонеть а мейс мелявтомс.
Теде а тонь прясь карми арсеме.
Веденть потмаксос азе чопавтька,
Тосо човарось ламодо ламо.
Зяро кандови, зняро сайть тосто.
Сонзэ эйстэ минь Мастор тейтяно.
Кодак тееви Масторавинесь,
Нолдан койть-илат, ломанть ды раськеть.
Ней тон кунсолок, мезе мон мерян.
Зярдо човаронть кармат саеме,
Монь лементь васня лецтик, Идемевсь,
Ранкстак «Пазчангот!» — мейле кундак тевс.
Вант, иля стувто, мезе мон меринь,
Стякос якамот иляк ютавто.
Бути тон стувтсак монь лементь лецтямс,
А ули мелеть пшкадемс «Пазчангот!»,
Веденть потмакссто човар а кандат,
Апак тееве тевесь кадови,
Уйнят лескстэме мекев-васов тон.

Комментарий от: Erush Vezhai, Ноябрь 27, 2014 в 11:18am


— Тынь кунсолодо, сисем покштинеть,
Ине Рав лангонь эрзянь атинеть,
Мон тенк евтаса содамоевкскенть,
Содамоевкскенть, ежов арсевкскенть:
Ливти истяня валдо Чипазось,
Чии истяня лейтнесэ ведесь,
Касы истяня ломанень рунгось.

Тейтерь-тякинесь евксонть содызе,
Путынзе превнес шержей покштятнень.
—Вай, тон превеят, тейтерь, ежоват!
Мейсэ каземс тонь покш превтнень кисэ?
—Сюкпря, покштинеть, ашо прячернеть!
Пазчангот тыненк яла улезэ!
Мезеяк пельденк тень а эряви.
Бути евтавлинк, покштят, пачтявлинк,
Кода Мастор чачсь, кода койть раштасть
Весемень туртов кеняркс улевель.
Кезэрь моротнень эрьга лецтинка.
Кунсолосызь сынст неень эрзятне,
Марясызь Мокша лангонь мокшотне —
Превсэ кирдемест кармить пингезэст.



Сисем покштятнень ютксо ве покштясь —
Сехте шержеесь, нама, кезэресь,
Варштась перть пельга сыре сельмесэ,



Лекстясь домкасто, кундась валбринес.
Кармась евтнеме сон пингень евксонть,
Ушодсь эрямонь моронть морамо.
Шождыне ялткесь лоткась пувамсто,
Килей лопатне лоткасть сорномсто.
— Кунсолодоя монь, эрзят, мокшот!
Пуромодоя перькан, сыреть, одт!
Ушодан моро Масторавадо —
Чачомадонзо, касомадонзо.
Мон эрзянь койненть тыненк евтаса,
Мон мокшонь иланть тыненк пачтяса.
Содадо, косто эрзят, мокшот лиссть,
Кода сынст келест ды коест теевсть.
Содадо, эрзят, содадо, мокшот,
Ки нолдыдизь тынк Масторава лангс,
Ки максызе тенк чачонк-обуцянк,
Ежонк ды превенк паро эрямос.

Комментарий от: Erush Vezhai, Ноябрь 24, 2014 в 10:41pm


Эзизь содакшно сисем покштятне,
Ине Рав лангонь кезэрь эрзятне
Содамоевкскенть, ежов кортавкскенть.
Чарькодекшнизе тейтерь-тякинесь,
Тейтерь-тякинесь, бояравинесь.

— Тынь кунсолодо, сисем покштинеть,
Ине Рав лангонь эрзянь атинеть,
Мон тенк евтаса содамоевкскенть,
Содамоевкскенть, ежов арсевкскенть:
Ливти истяня валдо Чипазось,
Чии истяня лейтнесэ ведесь,
Касы истяня ломанень рунгось.

Тейтерь-тякинесь евксонть содызе,
Путынзе превнес шержей покштятнень.
—Вай, тон превеят, тейтерь, ежоват!
Мейсэ каземс тонь покш превтнень кисэ?
—Сюкпря, покштинеть, ашо прячернеть!
Пазчангот тыненк яла улезэ!
Мезеяк пельденк тень а эряви.
Бути евтавлинк, покштят, пачтявлинк,
Кода Мастор чачсь, кода койть раштасть
Весемень туртов кеняркс улевель.
Кезэрь моротнень эрьга лецтинка.
Кунсолосызь сынст неень эрзятне,
Марясызь Мокша лангонь мокшотне —
Превсэ кирдемест кармить пингезэст. (с.10)

Комментарий от: Erush Vezhai, Ноябрь 24, 2014 в 9:32pm

Тынь марямизь монь, шержей сакалнэть,

Ашо прячернеть, коське рунгинеть.

Мон тыненк ёвтан содамоёвкске,

Содамоёвкске, ёжов кортавкске:

Ки сёлмовтомо менельга ливти?

Ки пильгевтеме масторга чии?

Ки ундокстомо чинть ало касы?

(с.9)

Комментарий от: Erush Vezhai, Ноябрь 24, 2014 в 9:19pm

МАСТОРАВА

1994 ие.

Эрзянь ды мокшонь кезэрень пингень ёвтамотнень ды моротнень коряс сёрмадызе А. М. Шаронов.

Витницянь тевкурось (Редакционная коллегия): И.А. Калинкин (прявт), В.П. Видманова, И.М. Девин, М.В. Дорожкин (содамочинь витний (научный редактор)), В.С. Ионова, Д.Т. Надькин, К.Т. Самородов (содамочинь витний), Л.В. Седова, Е.Я. Терешкина

Мелень ёвтыесь (рецензент) : А.М. Доронин.

Артыцясь: Н.С. Макушкин

Валморонь витнийтне (поэтические редакторы): И.А. Калинкин, Р.С. Кемайкина (Маризь Кемаль)

Морокерьксэнь васенце арсевксэнть ды аравксонть тесть ды кочкасть путнемапельть (материал) В.В. Горбунов, Г.Я. Меркушкин, А.Д. Шуляев, содамочинь витниесь В.Я. Евсеев.

Комментарий от: Erush Vezhai, Ноябрь 24, 2014 в 9:01pm

Весе покштятне шержей сакалнэть,

Шержей сакалнэть, ашо прячернеть.

Эйсэст кавани тейтерь-тякине,

Тейтерь-тякине, бояравине.

Килеенть прясто ваны Пазнармунь,

Ваны Пазнармунь, сон Иненармунь.

Ломань валнэсэ нармунь пшкадекшнесь,

Ломань кельнесэ нармунь кортакшнось:

- Кунсолодоя тынь, сисем покштят,

Коень содыцят, лувонь муицят,

Ине Рав лангонь кезэрень эрзят.

(с.9)

Комментарий от: Erush Vezhai, Ноябрь 24, 2014 в 3:29pm

Невтемакс, истя:

УШОТКС
Покштояк ульнесь седе покш пакся.
Се покш паксясонть – сэрей губорь пря,
Губорь принесэнть – ашине килей,
Ашине килей, мазыйне килей:
Менеленть келес срадсть тарадонзо,
Моданть пачк таргавсть-венстявсть санонзо.
Килеенть ало пурназь столь ашти,
Се столенть экшсэ покштят озадот.
Сисем велень сынь коень содыцят,
Равонь эрзятнень лувонь муицят.
(с.9)

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования