Uralistica

«Вӧтаса но медам адӟы ни со вакытъёсыз»

100 ар но ӧз на ортчы колхозъёс кылдытон сярысь пуктэт кутэм дырысен. Историкъёслэн пусъемзыя, коллективизация ласянь выль кат, Столыпинлэн яке крепостной правоез палэнтон реформаос сямен, рос-прос малпамын ӧй вал. И. Сталин азяз огзэ тужгез бадӟым ужпумез гинэ пуктӥз: быдтоно кулакъёсыз. Соин улосъёсын, ёросъёсын быдэстэм ужрадъёс трос валантэмъёс кылдытӥзы, 1932-33-тӥ аръёс туж секытэсь, сютэмесь луизы. Колхоз пуктон аръёсыз быдэс ожен ӵошатыны луэ адями улонъёсыз, корка-юртъёсыз, пудо-животэз быдтэменызы. Мынэсьтым семьяме но со секыт вакытъёс палэнтӥ ортчиллямтэ.


Пересь песятае Гаврил Иванович Рябин вордскемын 1903-тӥ арын Алнаш ёросысь Шадрасак-Кибья гуртын. Пичи дыръяз ик пал синмыз адӟемысь дугдэ, со йырин ужакуз секыт вал. Берлогес, кулак ӧз лыдъялэ ке но, вань юртъерзэ талазы, тус-тас каризы, нош улонэз чигиськиз ни 40 аресаз Украинаысь одӥгаз ож лудын.


Коммунизм вакытэз ушъясьёс трос ке но, пумит луисьёсыз тросгес. Кылыса-лыдӟыса, шонер дунъет сётыны уг луы. Песятае, Иван Гаврилович Рябин, будон аръёссэ веракуз, синкылиоссэ кутыны ӧз вормы. Сокем мур яра кельтӥллям со вакытъёс. Алнаш ёросысь Шадрасак-Кибья гуртын улӥсь Рябинъёслэн семьязы, гуртысь мукет 7-8 семьяос сямен ик, единоличник лыдъяськиз. Юртъерзы соослэн бадӟым вал: корка, лапас, 2 кенос, коргид, бакча. Асьсэлэн тӧлӥськонзы вылэм. Пудо пӧлысь вал, 2 скал, ыжъёс, парсьёс, тылобурдоос вордӥллям.


Коллективизация кутскем бере, Рябинъёсыз кужмысь колхозэ пырыны косо вал. Но пересь песятае пумитъяськем. Шонер шат со, куке тон гижысь-пиньысь тыршиськод, ӟеч улыны выриськод, быгатэмедъя юртъер пуктӥськод-выльдӥськод но аслэсьтыд ваньбурдэ кыӵе ке азьтэм Пешкаен люкыны кулэ? Колхоз кылдон вакытэ кӧняез ке гурт калык шумпотыса выльдӥськонэз пумитаз. Валамон, таӵеезлы тужгес шумпотӥзы азьтэмъёс: ваньбурез огазеяса, бадӟым колхоз кылдытыны нырысь ик ӟеч улӥсь гуртоослэн ваньбуръёссы инъет сётӥзы. Пересь песятае колхозэ пырымтэен, кибьяос ик люкаськыса, дораз вуиллям но пырыны дӥсьтӥллямтэ, капка азяз сылӥллям. Пӧлысьтызы огзэ сектаса, азязы лэзиллям. «Атае, лыктэмзэс тодыса, азьвыл ик дасяськиз: коргидэз ворсаз, усьтэтэныз куро люке ватӥськиз. Колхозникъёсмы кион кадесь вал. Гуртлэн шайтанэз – Пешка – санникен курое но бышкам, атайме утчаса. Ӧз шедьтэ. Озьы ке но, гидэз кесяса, сое номырлы ярантэм быдтыса, валэз поттӥллям», - тодаз вае песятае Иван Гаврилович. Бергес кеноссэс но лапассэс кесяса нуизы, коркась арбериоссэс, оген-оген поттыса, торгын гурт калык пӧлын ик вузаса, быдтӥзы. Ваньзэ налог чотын талаллям.


Семьялы улыны номыртэм секыт луиз. Озьы но 1962-тӥ арозь колхозэ ӧз пыре. «Кӧтэз тырон понна, сьӧрлось гуртъёстӥ ужаса ветлӥм. Озьы оломалы но дыши, лэсьтӥськон ужез тодӥ. Тужгес секыт йӧтӥз атаеным нэнэелы. Соосыз серекъязы, мыскыллязы, нош соос ваньзэ чидазы ук! Вӧтаса но медам адӟы ни со вакытъёсыз!», - синкылиоссэ уг вормы песятае. Сютэм улыса, Гавирлалэн анаез но пичи нуныез туж вазь улонысь кошкизы.


Колхоз кылдытонэн пересь песятаелэн курадӟонъёсыз уг быро. Кӧня ке улыса, эшшо но секыт луэ - кутске Быдӟым Атыкай ож. Гавирлаез трудовой армие басьто. Пересь песятае фронтэ куриськылэм, но, синъёсыз ляб адӟемен, сое басьтӥллямтэ. 1943-тӥ арын, быдэс войналэн историяз тужгес но трос адями бырон вакытэ, Гаврил Иванович фронтэ шеде ик. Кунмес утисьёс тырмымтэен, сое Алнашысь военкоматэ ӧтиллям. Дас кык нунал ортчыса, кыкетӥзэ лыктыны косӥллям. Сокема возьмаса улымтэ ни, ачиз войнае кошконо кариськем. Отя кузпалыз потэн нянь пыжем, огшоры гинэ котомка бичам. Гавирла кышноеныз но Ваня пиеныз сюрес вылэ потэм. Агрыз ёросысь Вольный труд нимо гурт вӧзысь нюлэс доры вуыса, семьяос пыраклы люкиськиллям. Гаврил Иванович, пельпумаз котомказэ поныса, Огырчи пала вамыштэм, нош Отя пиеныз доразы берытскиллям. Соку нокин но ӧз малпа, та адӟиськон берпуметӥ луоз шуыса.


Нырысетӥ гожтэтсэ пересь песятае лэзем военной лагерьысен Суслонгер станциысь. Ивортэм, ваньмыз умой, сюдэмзы яра шуыса. Кыкетӥ гожтэтаз верам соосыз войнае нуэмзы сярысь. Кышноезлы Гаврил вазиськем, одӥг гинэ Ваня пизэ умой, ужась будэтыны, адямие поттыны курыса. Та гожтэтэз пересь песятаелэн берпуметӥез луэм.


Жаляса верано, песятаелэн атаезлэсь одӥг гинэ туспуктэмез кылемын. Гожтэтъёсыз туннэ нуналозь ӧз возиське. Но песятае, Гаврил Ивановичез буре вайыса, вордскем гуртэз пуме 40 писпулэсь сад мерттӥз. Али со будэмын. Тулыс быдэсак сяська пӧлы вые, гужем ми татчы ӵемысь шутэтскыны вуылӥськом но емышсэ бичаськом, сӥзьыл губияны ветлӥськом. Пересь песятае ӵемысь секыт будэм аръёссэ син азяз пуктӥз. Нош мынам, верамъёссэ кылзыса, валэктонтэм юанэ кылдэ: котькыӵе пуктэт, кат кутон азьын уг луы меда солэн кулэлыкез но азьланез сярысь малпаськыны? Малы одӥг-кык адямилэн бадӟым янгышезлы луыса курадӟо огшоры адямиос?

Просмотров: 186

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования