Паламо. Ёвтнема. - Поцелуй. Рассказ.

ПАЛАМО

    Кизэнь куншка. Медьковонь пе. Кодамо паро мелеть, зярдо те шкастонть, кизэнь куншкане, сат васолдо тиринь ошкезэть, тиринь кудозот, кувака тонавтома иеденть мейле… Ушосонть лембе-паро, эрьва мезесь кецни эрямонтень…

    Удало кадовсть лекциятне, семинартнэ, практикась, нарядтнэ… Удало кадовсь колмоце тонавтома иесь! Удало кадовсь ковонь пель марто иневедьга укшномась, конаньсэ прядовсь колмоце иень тонавтнемась. Иневедьга укшномань содамчись-навигациясь ней теть теевсь содавиксэкс… Кода эно, Европа модамастор пертька укшномась а стяко ютась. Штурманонь вахтатне ульнесть чинь трокст… Те вахтасонть саят пеленгть-невтьналт тешттнень лангс, маяктнэнь лангс, валгиця-кепетиця ковонть ды чинть лангс… Ней парсте содат, мезе те истямось: крюйс-пеленг, обсервация, обсервациянь тарка…. Лексят иневедень шожда-ванькс коштсонть, ванкшнат певтеме кевериця, лымбиця сэнь-пиже иневеденть лангс… Вахтадо мейле празь прат кубриксэ-венчнупальсэ эсь коникеть лангс ды сеск матедеват, ваязь ваят домка, од ломанень онс… Ушмовенчень баягатнень дирьнемась, маряви, сеск пувтаттдызь, теке эзить удояк… Неть шкатнестэ потмо мелеть вейкине – зярдо те весе прядови ды, окойники, нолдатадызь омсемковс, кудов… кудов…

  Неть мельтнень превсэнзэ тапарязь, Кията, кевейксэе иесэ цёра, весе мештьсэнзэ лекстизе вагононь панжадо кенкшстэнть лембе, кизэнь, тиринь ёнксонь коштонть, сюконясь вагононь ветиентень, ды седеень киторкс марто чалгась тиринь ошкенть моданть лангс. Сон кудосо! Икелепеле ней – оймсема ков…

Вайгельпешка ютась чугункань кинть кувалма, пурдась витев, эсь куринканть ёнов, ды вана  кардазонь ортынетне, чикор-лакор сынь тейсть ды сон кустимпесэ, кудыкельсэ (синьдерьксэсь секе!), кудосо: авазо ансяк «- Вайк!» тейсь ды кутмордызе Киятань кирьганзо… Киятанень марявсь, авазо вишкиньгадсть та-кода, кедьсэнзэ кутмордызе аванть рунгинезэ, кона лавшинестэ сорнось ниреждемадо… Учовсь тензэ цёразо!

  Ютасть колмо чить. Авась каванясь цёранзо мейсэ маштсь, кудонь ярсамкатнесэ. Тензэ пачк марявсь, цёразо сакшны тонавтнемасто берякадозь… Аватне пачк истя эсь цёраст неить куватень а неемадост.

  Кията кундась кудоютконь тевс. Пире пирявксось витнемка, мацт курго лангось веши кедть, кудо прянь латось артомка…. Кодамо мазычи неят, зярдо кудо прясто, артомсто, ванат перть пельга! Умарь пиреть, кальть, умаринат, латот ды кудопрят… Теке менельга ливтят нармунекс, тонськак пельтнень ютксоят…

  Таргось ютась, сельмсэнзэяк цёрась эзь кенере кончтамо. Ялганзо содавтомосткак шказо эзь сатно. Тошнакадсь кудо ютконь тевтнень кисэ. Сындест таштавсть иень перть сатышка. Ялгатнеяк те киззэстэнть весе срадозельть кие кува. Кона практикасо, конань сессиязо те шкас эзь прядово.

   Окойники Киятань кудосо улемадонть оймезэ та-кода витевсь, седей кенярксось оймась, кона-кона тевтне топавтовсть. Шлямочистэ пурнась молеме кинов, РДК-в. Арсесь тосо вастовомс кияк марто, кинь марто вейсэ тонавлесь школасо. Иневедьломанень форманзо эзизе орша. Сон кизэнь, ашо голландка (венчломанень ланга панар) марто, пек ва карми сельмс кайсевеме буе ошкень ульцятнесэ-куринкатнесэ. Нама, мелезэ ульнесь эсь прянзо формасояк невтемс, теке марто эзь орша истя. Мусь мелянь панарнэ, чопода понкст.

  Кинос совамодо икеле малавикс ялгатнеде киньгак эзинзе нее. Ансяк васол ялгат. Сынь ёвтасть, келя, Числав ялгазо – шабра велесэ педпрактикасо, Ёвга – кудовачкамонь практикасо лия ошкесэ. Келя, курок сыть. Паро эно.

  Кинодонть мейле, коната мелезэнзэ эзь туе, Кията лиссь ванома нупальстэнть меельцетнень ютксо. Капшамс тензэ а ков. Колмо тейтерень вакска ютамсто тензэ марявсь: - Кията! Тон? – Кията аламодо абунгадозь варштась вайгеленть ёнов. Суньдерьсэнть пачк неизе Виянань, шабра куринкасо эриця тейтерненть. Киятань сельмезэнзэ каявсь: - Вай, кода тейтернесь кайсь!-, секскак эзь содавояк тензэ сеск.

Тейтересь таго: - Мекс а шумбракстнят мартонок?

  Кията лоткась тейтертнень каршо, конат муст-муст пеедькшнезь эсь ютковаст, мизолдозь ванкшность цёранть лангс. Неть тейтерень варштавкстнэде аламодо визделгадозь, Кията, виздеманзо кекшезь, мерсь: - Нама, мон! Кие эно? Шумбрачи, тенк, тейтерть! Эзить содаво тень, Вияна. Нолдык чумом…

 Тейтересь каршо: - Маринь, тон таргошка, кода сыть кудов. Мекс прят косояк а невтнят? Мекс ськамот? Оно зяро тейтерть ськамост якить…, - ды невтьсь ялганзо лангс.

  Паро ульнесть чопода сундерькст, Киятань чамванзо ютасть якстертьгадомат, улема тейтертне а несыть сынст… Прянь виздемадо апак невтне, Кията теке тёхмадсь валтнэнь кирьга парьстэнзэ: 

 -  Кудоютконь тевть топавтынь, аютко тень ульнесь, ды ялгамгак зярс кияк арась, секскак ськамон… Тейтертне таго пейдезевсть. Мезе лия меремс, Кията эзь сода. Мекс истямо виздема саизе? Вай… А ён та-кода…

   Сон содась, Вияна Числав ялганзо - седей ялга. Маны, Числав васня теде сёрмадсь сёрмасо, мейле, телень каникулатнестэ, содавтызе вечкень тейтерензэ марто. Виянанень сестэ ульнесь ансяк кеветее, ды Киятанень сон неявсь тунь вишка тейтернекс. –«Кода вадрялгадсь-мазылгадсь тейтересь!»...кивчкась Киятань пряванзо ды сон сеск терявтсь ёртомонзо те виськсэв меленть… - «Ней тензэ кемсисьмее….»

Тень пингстэ Вияна простясь лия тейтертнень марто, конат кедьте-кедьс, та-мезде карадо каршо пеедькшнезь, ношкстасть ве ёнов, сынь эрясть ошкенть лия ёно.

- Тон ков? - Кудов?-, кевкстизе Вияна Киятань.

Вай, вайгелезэяк тейтерень та-кода, марявсь Киятанень, полавтовсь. Сон чевте, домка, токи седейс… Кията тунь талакадсь… Кода истя? А ён кортнемс кувать ялгань тейтерень марто… Ков тееват, эряви каршо мезеяк меремс: - Кудов…

- Адя вейсэ. Мон аламодо пелян ськамом чоподаванть молеме, - поладсь тейтересь.

Ков тееват истят тевтнесэ? Ковгак… Понгить цёра….

- Адя…, - соркстазь вайгельсэ мерезевсь Кията.

Вайгельпень турошка кись ютавсь, марявсь, та-мекс пек курок. Мезде а мезде кортнемат, кевкснемат:

- Косо Числав? – Практикасо.

– Курок сы? – Курок…

- Кода тонавтнемась? – Вадрясто.

– Косо истя киськеть пись чинть ало? – Модакуншкань иневедь куншкасо…

- Оно косо! – Мезть тосо тейниде? – Штурманонь практика ульнесь…..

Вана Киятань кудокуринкаськак. Сон пачкодсь. Лоткасть. Виянанень молемка седе тов, шабра куринкав. Кията теке пупордясь. Оймень кундазь: - Ильтямат кудот видьс?-, тейтереськак та-кода а чарькодевикс талномань пачк, састо: - Ильтямак….Нама…

Кинь киртямга ютасть шабра пирень трокст. Пачкодсть Виянань кудо кардазонь ортанть видьс. Мастумарень тарадтнэнь-лопатнень пачк неявсь кудосонть палыця вальма. Комськавтово част шказо. Авазо учи Виянань, а уды.

 Нурькине чатьмонема. Киятань теке сонсь опаня менелесь лепштызе модантень. Туи тейтересь… Арасель мелезэ явомс мартонзо истя куроксто… Тейтересь, теке маринзе мелензэ: - Аштека, молян кевстьса авань, улема, мери тень аламнешка аштеме вальмало…

  Кальцькадсь кеншесь… А куш а каш… Лиси, а лиси?...

Минута, кавто, вете… Кирвайсь кудосонть омбоце вальмась… Эзганзо тей-тов ювкадсь сулей. Толось мадсь…. А лиси, таргизе оймезэ Кията…. Аламнешка аштесь, сыргакшнось ва туеме, кода таго кальцкадсь кудыкельксэнь синдерьксэсь… Марявить тейтеренть шожда эскельксэнзэ… Киятань седеезэ теке гувк тейсь.. Вияна таго икелензэ. Лавтовонзо вельтязь лембе пацясо. Ушосонть экшендясь…

- Озатано?- невтсь тейтересь пирявксонть ёжосо ашти оймсема эзементь лангс. Тештне теке вадомгадсть чопода менельсэнть…

- Монень пельчасошка авам мерсь…, - поладсь тейтересь.

Озасть вейкень-вейкень эйстэ аволь маласо. Таго мезде а мезде кортнемат, кевкстнемат, ёвтнемат. Ушосонть а куш а каш. Зэхель. Лембе. Тешттне каштордыть менельсэнть, липнить, ципельдить, теке тошксить та-мезде эсь ютковаст… Парсте неявить тештекуротне, Кечетне, Озязтнэ, Каргонь кись…. Кодамо тантей чинесэ качадыть Виянань черензэ, шожда-тантей никсем веднень тансть маряви эйстэст, кона чаракавты Киятань превензэ… Вияна витни лавтовсонзо пацянть, шкань-шкань ванкшны Киятань чамас. Ёвли музыкас тонавлемадонзо, Пенза ошов тонавлеме туеме арсемадонзо….

    Каршо палманьсэнть палы лампа ды эсь валдосонзо валдомты Виянань ашинька черензэ, ванькс чаманзо, валдо-сэнь сельмензэ. Кутмордамс? Киятань теде покш мелезэ, ансяк пели, тандавтсы ва тейтеренть. Ды кода кутмордамозо? Сон аволь сонзэ тейтерь-ялгазо….

- Вияна! Кудов! -, марявсь вальмаванть аванзо вайгелезэ. Кията теке пувтась эсь ойме потсонь, салавань мельстэнзэ, конатне, нама, тензэ кирдемат ды кардамат!

Тейтересь стясь эземстэнть. Шождасто лекстясь…

- Мезе? Туян…. Шказо талай… Ды авам учи… Моньтемень а мади…

Венстизе кедензэ. Кедьлапушказо лембине, чевте… Кията а нолдавлизе те лембе кеденть валскескак… Ды сави нолдамс… Ансяк аламодо кирдизе кедьсэнзэ ды каршо марявсь, кода чова, чевте тейтерень сурнэтне састыне, теке а марявиксстэяк, лепштизь сонзэ суртнэнь. Кедтне менсть, явсть, теке, марявсь, мелест каршо…

- Сак ванды...Мон карман кудосо, ковгак а молян…, - тошкстась тейтересь састыне, велявтсь ды сеск ёмась ортыненть экшс.

- Сан.., - ансяк кенерьсь корсякадозь вайгельсэ мереме Кията.

Омбоце чись ульнесь кувакадо кувака, таргавсь ды таргавсь… Зярдо сон прядови? Зярдо сы учонь чокшнэсь? Кията прядызе кудо латонть артоманзо. Тосто, верде, яла ванкшнось, косо чизэ, учось, кода сон карми новолеме чивалгомав. А весть варштнесь тоёнов, косо ульнесь Виянань кудось… Чокшнэнь сундерькстнэ тензэ эзть учово. Оршась ванькс панарнэ, аванстэнзэ мерьсь, келя, ялганзо эйсэнзэ учить, ды капшазевсь тоёнов, ков тердсь эйсэнзэ седей кенярксось. Чизэ ульнесь зярс вере. Киятанень марявсь, сонзэ весе несызь, весе содыть, ков ней сон моли ды мейсь, ялатеке пильгензэ сынсь ветизь се эзементень, косо сынь ульнесть исяк чокшнэ Виянань марто. Кудо вальматне пельс панжадот. Тосто марявсть пианинасо налксемань гайтть… - «Кудосо…!», - кивчкадсь кецявты мелесь Киятань превганзо. Аштейсь-тейсь аламнешка, кунсолось мазый гайттнень. Варштась перькаванзо, кепедсь апокшке кев покольне, метясь-норовась, ды састыне ёртсь эйсэнзэ валмантень… Понгсь!… Марявсь, кода кевнесь кеверезевсь кияксканть…

  Вальма ёнкстнэ панжовсть седе келейстэ, ёлганя тейтернесь варштась ушов, чиремтизе рунгинензэ вальмалксонть трокст, неизе таймаскадозь аштиця Киятань, теке казизе валдо кецнемань мизолкссонзо. –«Сыть, Кията?!»- …. Тона аволдась, талакадозь, прясонзо. –«Мон нейке!»-, тейтересь ёмась вальмастонть.

Лиссь шожда валдо платиинесэ, кона парсте невтсь ёлганя, теке човазь, рунгинензэ. Черензэ пурназь пулынес, кона лыйк тейсь ортыневанть ютамсто. – «Тесэ чить а ён тенек аштемс», - невтсь сон эзементь лангс, - «Весе несамизь… Адя тов», -аволдась сон сынст кудонть маласо од кудонь срубонть ёнов.

Срубось пельсчапозь, кенкштэме, вальмавтомо, прявтомо. Ашти тикше потсо, ашо ды сэньшт цецине потс ваясь…

- Мон а куватьс, - венстизе Вияна Киятанень кедензэ, срубонь поровтонть трокст чалгамсто. – Улить апак прядо кудоютконь тевть… Паро?-

- Нама, паро!-, Киятанень эрьва минутась Виянань неемстэнзэ марявсь ней питней кенярксокс. Вияна нежедсь стенань лаксезь чувтнэнень, кепедизе чаманзо… Сельмензэ – домка валдо эрькеть, иневедень тюсонь эрьгть… Кода тантейстэ качадыть кизэнь лембеденть инзэдезь чочктнэ. Вирень танстьсэ, пичеойсэ, лопасо ды цецянь арвосо… Эли истя качадыть Виянань прячерензэ, мазый кирьгань ванькс-ашо киськезэ?

Сонсь эзь чарькодеяк, Кията, кода сон эзь кирдевть, венстявсь Виянанень ды палызе та козонь вить пилензэ алов, ашо кирьгазонзо, косо неявсь сеньшт чова верь саннэ. Вияна эзь айге эйстэнзэ. Аштесь, теке таймаскадсь, ансяк сельмензэ седеяк пек сэньшт мерсть чивалгомань валдосонть. – Мейсь? -, тошказевсть валдо якстере турванзо састо-састо… - А содан…, - тошкстась каршо Кията ды толсо палы турвасонзо чевтьстэ-састо палынзе Виянань чевтине-тантей турванзо… Теке тол ютась Киятань верь санганзо ды сон кеместэ кутмордызе тейтеренть виев кедьсэнзэ. Тейтерень рунгинесь сэрьга нежедсь Киятанень, Вияна кекшизе чаманзо Киятань лавтовс… Аштесть, кунсолость пилесэ бийниця седеень токномаст, марясть вейке-вейкень рунго лембест… Теке пельсть, ва илязо прядово зярдояк те рунго лембень марямось, илязо прядово те танстенть кецявт шказо…

  Чочктнэнь экшстэ марявсьть та кодамо эйкакшонь цихельдемкат, кашторкст ды мейле дуборсо ве ёнов чиемка. Кията явсь тейтерьстэнть, кирнявтсь кенкш варянтень, колмо вейксэшка-кеменьшка иесэ тейтернеть ды цёрынеть чийсть срубонть эйстэ ве ёнов… Пижнесть: - Цилинь, цилинь, тапавкс! Алужт ичить чапакс!… Сынь, улема, чочко ютконь лазкскетнева ванкшность, вода Кията палсесь-кутморясь Вияна марто…. Вай… Весеменень ней теде ёвтнить….

  Вияна визделгадсь, витинзе прячерензэ, а неявикс сормавкскетнень платиянь подолсонть… - Мон кудов, курок авам сы, минек течи инжеть, эряви анокстамс.- Кията укставсь… Арасель мелезэ истя куроксто явомс тейтеренть марто. Турвасонзо нейгак палозь палсь паламонь псись-танстесь. Ды мезть теят, эряви нолдамс тейтеренть.

 - Ванды вастовдано минек лисьманть вакссо?-, кевкстизе тейтеренть соркст теи вайгельсэ.

- Вастовдано, паро. Тосо седее ён..,- казизе цёранть сэнь валдосо селмсэнзэ Вияна. Вадяштызе лембе кедь лапушасонзо Киятань чаманзо-сельмензэ, прянзо ды сонсь кутмордызе ды тантейстэ палызе Киятань турвас…

Кията пильгензэяк эзь маря кудов молемстэ. Кецнема ёжось чадозь чадыль оймесэнзэ. Ванды сон таго вастови Виянань марто? Мезень кис Инешкипазось казизе сонзэ истямо кеняркссо?!

Авазо вастызе кудосо: - Ков чийнить?,- улема, сонзэ пштистэ мариця седеезэяк чарькодсь, мень орма стардызе цёранзо, ды косто сон сась истямо якстердиця чамасо…

 Сы чистэнть Кията сундерькс шкастонь вастовома таркасоль. Куватьс учось. Вияна эзь са. Кията чарькодсь, мекс. Чить, марясь сон, велявтсь Числав. Кията ялганзо уцяскань трокст а чалги, юткозост а эци…. –«Те апаро, а ён, виськс… Истя а тейнить…»-, сялдсь эсь прянзо Кията.

 Кадовозь оймсема читнень Кията ютавтынзе кудо ютконь ды кардазонь тевсэ. Кизэсь курок юты, аванстэнзэ эряви анокстамс телес, седе шождат улест тензэ тельня кудоютконь тевтне. Анокстась палыкев-уголия, канднесь сонзэ ведрасо кардо удалов. Лазнось пенгть, колмо покш костёрс сынст вачкинзе. Эрямось тусь эсензэ киява… Весе юты те менельксэнть ало… Сеяк, мезе ульнесь-теевсь Киятань-Виянань марто.

 Ламо иень ютазь, та-кода весть, одпингеде лецтнемас ваякшнозь, Киятанень сёрмадовсь:

Мон аволь тонь…

Тон аволь монь…

Эрямо кинек вейс а недить,

Сельме варштавксот васолонь

Менель тештинекс тень пеедить.

Учинь эйсэть…

Учить эйсэнь…

Ансяк ютксонок ули ломань,

Монень – ялга, тонеть – вечкень,

Колмонек вейсэ а улема.

Тон аволь монь…

Мон аволь тонь…

Вечкеманк трокст мон эзинь чалга,

Эстень меринь: - «Сон аволь монь,

Саик уцясканть эстеть, ялга…»

Мон аволь тонь…

Тон аволь монь…

Эрямо кинек вейс а недить,

Менелень тюсонь сельметь тонь

Иетнень пачк монень пеедить…

   Кинень алтазь неть ойме потсто саезь сёрмадома кикскетне, морорисьминетне, чарькодеви, кода валморонь сёрмадейтне тешкстнить – (В-нень)…. Кие соды, кие те истямось,( В-нась)? Теде содыть ансяк кавто ломанть ды Инешкипазось….

Эрюш Вежай, 2014 ие, ацамков.