Uralistica

Тиринь эрзянь веледе ды ломаньде авань ёвтнемазо. - Рассказ матери о родном эрзянском селе и родных людях.

Тиринь веледе ды ломаньде авань ёвтнемазо.

    Кортыльть сыре ломантне, келя, Захарка велентень эрзятне састь эрямо Равонть томбальде, Чивалгома ёндо, Пенза ёнкссто. Секскак Захарка велесэнть вейке куринкась лемдязь Пенза. Те кемексты, те куринкантень озасть эрзятне, конат састь Пенза ошонть ёндо. Кургсто кургс, кельстэ кельс ёвтнесть, келя, васенце сыця эрзятне те тарканть муизь-кочкизь ванна мезень кис: маласо ули виресь, коната максы эрзятненень уштомапель, тарканть перькава улить ламо ванькс ведьсэ чавиця лисьмапрят ды лейнеть: Карго лей, Пекше лей, Эрьке лей, Касым лей ды таго кавто лейнеть, конатнень лемест стувтовсть.

  Маласо вирьсэнть тумотне, пойтне, пекшетне ульнесть истят эчкть, мик кавто ломанень сэльсэ карадо каршо аштезь а кутмордавить, а тапардови чувтонть эчкезэ. Монь вишкапингстэяк мик, 1920-1930-це иетнестэ, лецтневи тень, ульнесь Кенерь пакарь куринкасонть сявордозь пек эчке чувтонь мукорь. Пряшникень кардаз удало, кона тосо ашттесь ламодо ламонь иень перть. Ташточинзэ-сыречинзэ невтнесть ламо лазнотксонзо, раужкадозь тюсозо. Ваксканзо ютамсто апак абунгале мик а ютаваткак, истямоль сон эчке, секскак саккшнось прязот мель сонзэ седее пштистэ-парсте ванкшномс.

 Аволь весе лисьматне коськсть.  Улить нейгак паро-ванькс лисьмат Захарка веленть маласо. Те Иневанькс (Святой) лисьма, Ранги лисьма. Сыре ломантне ёвтнильть, келя, Ранги лисьмась истя виевстэ чавсь-чудесь, мик марявсь велесэнть дорномазо-жольнемазо. Теке яла рангиль, секскак ломантне лемдизьгак сонзэ Ранги лисьмакс.

 Иневанькс (Святой) лисьмасонть, келя, та-кие несь иневанькс (святой) ломанень чама. Истямо ванькс ведезэ ульнесь те лисьманть. Секскак эрзятне лемдизьгак сонзэ Иневанькс лисмапрякс. Весе Захарка веленть эрямопингензэ перть эрзятне яксильть Иневанькс лисьмапряв озномо, Инешкипазонтень пшкалеме. Васняяк сестэ, зярдо кувать арасельть кизэнь перть пиземеть, пиземень вешеме.

Захарка велестэнть 1922 иестэ минек кудораськесь, монь покштям-сырявам, Илюшкань Михал, тусь эрямо явозь велинев, конань лемдизь – Беднота. Те ульнесь стака иесь. Тонавтнеме Беднотасто якилинек Захаркав. Школась ансяк тосоль.

Пек якшамо читнестэ кадовилинек удомо эсь буень малавиксэнек кедьга. Монь истямо совамо-удомо кудом ульнесь Богданынь, косо эрясь содамокс монь тетянь ялаксозо, Серьгу лелям. Сонзэ поланзо, Дунянь, ульнесь сырепокштязо, лемезэль Богдан атя. Сонензэ сестэ топодсть 105 иеть те шкантень. Атясь ульнесь тунь ашо. Теке марто сонсь неявсь виевекс, якась видестэ, кортась весемень марто паро ладсо. Кудораськесенть сонзэ кирдсть-ловсть кудонь азорокс, эрясь сон покш арнесэ.

Омбоце Захарка велень пек сыре атя, текеяк 105 иесэ, ульнесь Несько (Нефёд) атя. Сонзэ цёразо, Анисим Нефёдыч (Онися), важодсь вельсоветэнь конёв тевень ветицякс-секретарекс сыредемазонзо. Улема, лияткак ламо сыре ломанть эрясть велесэнть, дым он те шкас конань стувтынь, конань, паряк, эзинь содаяк. Велесь покш ульнесь.

Сехте пек кадовсть лецтнемасон Богдан атянть карсемапелензэ – лембе кемензэ, кендень кемензэ. Сон сынст эзинзе кайсе пильгстэнз тельняяк, кизнаяк. Кендекемтне ульнесть ашот, ашо понань, мазый тешкске марто. Кемень верькстнэсэ ульнесть мазылгавтозь колмо тюсонь чирьке керькске. Чирькетнень ало – якстере-ожо тюсонь умарьть.

  Кой-мезе ёвтнян тетянь ёндо буеденть. Тетям – Андрей Михалыч (Илюшкань Михалынь Андрей). Покштям – Михал Захарыч (Илюшкань Михал). Сырепокштям – Захар Ильич (Илюшкань Захар). Сырень сырепокштям – Илья Дмитриевич (Илюшка). Сырень сырень сырепокштям – Митё атя (Дмитрий). Улема, сонзэ лемстэ мтнек буелемесь-фамилияськак тусь. Велесэнть тенек мерильть аволь Дмитриевть, мерильть – Илюшкань буень эрзят.

Тетянь ёвтнеманзо коряс, покштям ды сонзэ покштятне ульнесть тевс маштыцят-мастеровойть ломанть. Винадо а симицят. А таргицят.

Тетям, Андрей атя, эзь тарга цигаркадо. Ульнесь паро сокицякс-видицякс, кудонь чапицякс, чувтосто эрьва мезень тейницякс, калонь кундсицякс.

Таргась ансяк Иван лелям (Борзя). Сон ульнесь ярмак конёвонь тевветицякс-бугалтерэкс.

Яшу лелям (Яков) чавовсь торпингень шкастонть, 1943 иестэ. Сон ульнесь ярмак конёвонь тевень ветицякс-бугалтерэкс.

Серьгу лелям (Сергей) кулось Владивосток ошсо. Ульнесь стуворонь, озамкань-мезень тейницякс.

Клим лелям (Климент) кулось Казахстансо, Кокчетав ошсо.

Алекса лелям (Алексей) гражданской торпингенть шкасто чавовсь ашотнень марто тюремстэ, ульнесь В.И.Чапаевень дивизиясо.

Ванё лелям (Иван) – кулось 1943 иестэ тюрьмасо. Сон важодсь сестэ колхозонь предэкс (председатель колхоза). Сась районсто, Серьгоскойстэ, ломанень пекстницят, «хлебная тройка», особистт, начальникть. Ванё лелянть низэ, Анюка, пеняцясь тенст мирдензэ лангс. Ванё лелянь сеск саизь ды пекстызь. Судизь пекстамонзо тюрьмас.

Покштям, Михал Захарыч, весе од пингензэ эризе Казахстансо кудораськензэ марто. Тоско эрясь покштянь ялаксозо кудораськензэ марто. Тосо сынь рамсесть ды сивелесть од модат. Казахстансо сокасть, видсть сюрот, трясть ракшат. Модадост ульнесь ламо. Эсь вийсэ тевест эзть топавтово, секскак сивелесть важот, стадань ваныцят, седее ламо казах раськень ломанть. Сокасть, видсть, нусть сюротнень, ледсть тикшеть лишме виень машинасо, алашань вийсэ, аволь ломанень кедь вийсэ. Кирдсть скалонь стадат. Ловсонть нолдасть сепараторсо, конань велявтнесть кедьсэ кавто важдыйть. Виднесть чиньжарамот, арбузт, дынат. Нетнень – ансяк эстест, кудосо ярсамонь кис. Бахчатнень кенеремстэ эйкакштнэ ванстасть сынст эрьва кодамо нармуньде. Эрьва цёрынесь лакшторка марто чийнесь паксянть кувалт мекев-васов. Истя тандавтнильть нармунтнень, иляст сынь кола касовкстнэнь. Мукшнокшность цёрабайтне шка калс якамояк. А васоло ульнесть эрькинеть, конат пешксельть калдо. Вечкильть цёрынетне пурнамо нармунень алткак, конань пуштылизь толпандясо. Оенть, ракшань сывеленть, сюронть миилизь масторкирдивиень таштавксос.

 Сась берянь шкась. Кепететьсь рузонь-япононь торпингесь. Покштянь, сестэ сон ульнесь од, кеме цёракс, саизь торпингень паксяв. Сырявам, Мария Карповна, кадовсь кудоазортомо, ламо тяка марто. Учось, ознось Верепазнэнь мирдензэ кис. Ды велявтсь кудов сонзэ мирдезэ шумбракссто-эриксстэ!

Маря бабам кармась рангозь энялдомо мирдензэ икеле, кодаяк ды туемс те од масторстонть мекев кудов, Захарка велев. Мезть тейнемс паро мирдентень? Нинзэ меленть ванызе цёрась. Истя, вейке кизэстэ пурнызь-сэрнизь улест-парост, онкстизь-кильдизь лишмест, озавтызь улавтнэс тякинест ды сыргасть васоло ки лангов. Весе кардазтевень ули-парост, сбруест, сокамо-видема-пурнамо машинаст кадызь важотненень. Сыненст кадызь-казизь кудотнень-кардазтнэньгак. Састь эсест Захаркас, косо аволь пек учость сынст велень прявтнэ. Эрявсь тенст одс сыцятненень явтамс мода, кона те шкас весе явшезель. Покштянень, цёранзо марто, макссть-явтасть та-кодат васолонь, церькувань а эрявикст кадозь модат-паксят. Истят таркат, косо ульнесть аволь чаво модат, седе ламо – вирень колкат. Неть чувто марто модатнень савсь васня урядамс-сандемс, таргсемс мукорьтнень-ундокстнэнь. Иень-кавтонь ютазь неть кадозь модатнестэ-паксятнестэ покштям сайсь паро норов. Улема, секс, мекс модась ульнесь апак видьне, апак токше. Аволь ламо шкань-иень ютазь покштянь кудораськесь стясь кеместэ пильге лангс. Велень промксось монь покштянть, Дмитриев Михал Захарычень (Илюшкань Михалынь) кочкизе Захарка велень прявтокс-старостакс.

Покштям ульнесь кедьсуров кудонь чапиекс-плотникекс, ульнесь паро вирьпачань кундсицякс-ледницякс, калонь кундсицякс. Пек вечкиль пангонь, вирьмарень пурнамот. Пек вечкиль яксеме вирьга. Виренть содылизе педе пес. Сонсь сустыль-кройсиль оршамот. Эстензэяк, эйкакштнэненьгак. Стыль-кодыль сонсь весе карсемапельтненгак: кемть, котат, карть.

 

Эрямопингесь мольсь-шаштсь эсензэ кияванзо. Кепететьсь од торпинге – Германиянть марто, сась 1914 иесь.

Тетянь, сестэ сон ульнесь кемкавксово иесэ цёракс, саизь торпингень паксяв. Тосо сон ульнесь весе торпингенть перть, окопсо. Печтясь контузия, ледема керявкс-томбавкс. Велявтсь тосто революциянть теевемадо марто. Немецтнэнь марто ульнесь братания. Ды сонзэ тосто нолдызь кудов.

Тесэ кепететьсь гражданской торпингесь. Покштянь, кода велень прявтонть, Советэнь властень ломантне саизь, пекстызь ды панизь-ускизь Соловецкой усиятнень лангс. Тетянь, Андрей Михалычень – раскулачили. Саекшнызь весе ракшанок, скалонок-лишменек, тувотненьгак, реветненьгак. Скалтнэ, лишметне а маштыть пижнеме-рангомо, а маштыть сеереме, мекс сынст ней лия та-кодамо а содавикст тенст азорост, конат сынст саить. Саемстэст-панемстэст молить чатьмонезь…. А вана тувотне истя пижнить-цирьнить! Зярдо сынст сюлмсить пильгест-серькаст ды путнить улавс….. Минь патят-ялакст Миша марто истя рангтано пиже-ожо вайгельсэ вейсэ цирьниця тувотнень марто…. Пек жальть тенек марявсть саезь-нельгесь минек кардазонь ракшатне…. Тетянь чамазо раужкадсь сестэ…. Авам тюрьсэ аварьдсь…. Кода седее тов карматано эрямо…. Кадовсь ансяк вачодо куломс… Те ульнесь 1927-1928 иетнестэ…. Монень ульнесь кото иеть. Ялатеке те апаро тевесь пек мелезэм совась, теке пись тосо. Сестэ минь эринек Беднота велинесэнть.

 Тамашакс тенек марявсь Соловкасто покштянь самозо-велявтомазо. Содылинек, тосто ломантне а велявтнить. Ёмсить-кулсить тоско… Идизь тетяст превей цёранзо-эйдензэ. Сынь пурнакшность истят тевконёвт, конат невтизь тетяст чумонь аразьчинзэ. Сон ульнесь паро-виде велень прявтокс. Зярдо сивелесь ломанть сокамсто-видемстэ-нуемстэ, парсте тенст пандсь ярмаксояк, сюросояк. Парсте андсь сынст паро ярсамопельсэ. Сёрмадозельть конёвтнэсэ весе паро велеютконь тевензэ, кода сон лездась лиянень, вансь ломанень мелест, кода весе велень тевтнень топавтсь видечисэ, ды кода сонзэ арнесть велень эрзятне. Лисни, сеть конёвтнэ алкукс понгсть паро ломанень сельме икелев, ды покштянь нолдызь Соловкасто кудов.

Ансяк, Михал атясь велявтомадо мейле эзь карма эрямо тиринь кудосонзо, конань тензэ мекев велявтызь. Пек покордавсь покштям стяконь кис, чумовтомо, пекстнемасонзо. Стака мельсэ пурнась-тейсь ды тусь Модамасторонь чирев – Владивосток ошов, косо урендясь рузонь-япононь торпингенть шкасто флотсо, косо се шкастонть эрясь Серьгу цёразо. Ансяк эзь саво тензэ кувать эрямс те васолкссонть, ормалгадсь ды кулось курое берянь-стака ормадо – сибирень сыявкс ормадо-сибирень язвадо.

Наста патям, тетянь сазорось, монь креснавам, ульнесь оршамопелень пек паро сустыця. Лиссь мирдене Адлякува велень Данила цёрань экшс, кона ульнесь кендень кемень валяиця, пек симицяль. Сынь кастасть тейтерька ды цёрыне. 1928-30 иетнестэ сынь тусть Хабаровскоев, косо эрить сынст пакшаст Анна ды Гавриил семияст марто. Наста патям нейгак эри тосо цёранзо кедьсэ, ваны нуцьканзо мельга.

Авань лемезэль Федай (Федосия). Сынст буесь а покшоль, аволь раськев ульнесь. Варка бабам (Варвара Давыдовна) ульнесь Каляжинь. Мирдене сон лисекшнесь Яким (Аким) экшс, конань ульнесть колмо сазоронзо. Тетязо Якимень, Петра, саезель трянь эйкакшокс Сарбай рузонь велестэ секс, мекс арасельть эсест тякинест, Верепазось тенст эзь максо эйкакшт. Кассь Захаркасо эрзянь ломанекс. Петра атясь ульнесь пек важодиця ломанекс. Кирдсь сибирень племань лишметь. Те тевенть косомстонзо поладызе Петра атянь трязь цёразо, Яким, монь покштясь авань ёндо. Ансяк эзь саво тензэ кувать ветямс неть кардаз ютконь тевтнень. Сась покш апаро шка, конасонть кадовсь Варка бабам ськамо, ниле пакша-эйде марто. Весть кизна, таргочинь чокшнэстэ, озадоль кудораськесь стуворонть перька, чокшнэнь ярсамос. Тесэ ушосто кармасть марявомо пижнемат-сееремат. Тердсть куд-азоронть, Яким Петровичень. Вейке сибирень племань айгорось кирнявтсь кардазонь пирявтонть трокс ды азарьстэ ардозь ардсь куринкань кияванть молиця ридванс кильдезь эльдень мельга. Улавонь ветицясь тандадсь, талакадсь. Ломантне тандадсть, серить: - Вай! Якимень айгорось секень вант ва тапи-мерьки эйкакшт! Тень марязь, Яким сеск ношкстась стуворонть экшстэ кардазов. Каподсь панст тулосто ды ношкстась чиезь ушов, айгоронть сасамонзо, стардомонзо. Ды чийсь истя капшазь, истя эрязасто, мезес виензэ сатотсть. Чиемадонть оймезэ пись, седеезэ лоткась чавомодо, сон прась ды сеске кулось, од цёракс… Истя Варка бабам одсто кадовсь ниле пакша марто довакс. Эрясь атявт-ававт марто оды мирдень сазортнэнь марто. Истяня эрясть-тейсть вейсэ, вейке покш кудораськесэ. Вейке чистэ сась ававтонтень апаро мель, ды мери Варка урьванстэнзэ: -«Варка, зярдо сюро видьмесь ёмась, сестэ чаво олгонть а жаль толс ёртомс…». Ды те мелесь ульнесь топавтозь. Варка бабам пакшанзо марто ливтезельть эрямкудостонть эрямо кардаз кудов. Истя, кардаз кудосо, кастынзе-кепединзе сон весе ниле пакшанзо, покшось ульнесь цёрыне, вишкинетне ульнесть тейтерькат.

Ды таго важадсь Пазонь сюдовкс эрямо шка…. Кепететьсь Германия марто торпингесь. Саизь торпингень паксяв Варка бабань касозь цёрынензэ. Чавовсь цёрась торпингень паксятнесэ. Те шкас сон урьвакстозель. Ды таго кадовсть урозокс  ней сонзэ колмо эйкакшонзо, бабань нуцьканзо. Варка бабань тейтертне кайсть-кепететьсть, весе лиссть мирденень. Катя сыре патянь максызь мирдене Адлякува велев, Гришанень, пек сюпавсто эрицянь цёра экшс. Сон сонсь, ламо иень ютазь, ёвтнекшныль, келя, сон пек эзь вечке те сюпав Гриша мирденть. Зярдо чиямстонзо кирвайсть штатолнэ пазавань икеле, Катя, чиявтонь тейтересь, каштом лангсо рангозь, мезе понгсь капоесь кедезэнзэ ды ёртнесь эйсэст штатолонть ды пазаванть лангс. Арасель мелезэ лисемс мирденень се цёранть экшс. Ялатеке авазо эзь вано те мелензэ лангс, максызе Катянь мирденень Гришанень. Сынст чачсть-кайсть ниле эйдест. Кавто цёраст ды кавто тейтерест. Васенце цёрась, Ёгор, чавовсь торпингень паксясо 1941 иестэ. Вишкинесь, Иван, ней эри Исакла велесэ. Даря тейтерезэ кармась симеме, ирецтэ ваясь Сургут лейс. Олда эри Подбельской чугункань кинь станциясо. Дарянь цёразо нейгак эри Адлякувасо.

Варка бабань омбоце тейтерезэ, те ульнесь самай монь авам, Федай (Федосия). Авам лиссь мирдень монь тетянть экшс омбоцеде. Васенце мирдезэ, Егор Николаевич Разумишкин, чавовсь Германия марто торпингестэ, 1915 иестэ. Авам кадовсь однэ довакс Аню тейтерензэ марто. Монь тетясь, Андрей, кадовсь нивтеме, кона кулось пек одсто, та-кодамо пеке ормадо, улема стакалгадсь аволь парсте. Тетям велявтсь Германия марто торпингестэ ды урьвакстсь омбоцеде авань лангс. Минек кастымизь тетям-авам ниленек. Покшось Анюка, тетянень сон улнесь трязь эйдекс, Вася, ёмась кулявтомо омбоце торпингесэнть, 1941 иестэ Литвасо, Вильнюс ошонть маласо, Ново-Вилейка таркасонть. Торпингеде икеле сон важодсь школасо, тонавтыцякс, прядызе Вишка Толканонь эрзянь педучилищанть. Монгак прядыя те педучилищанть, важодинь тонавтыцякс. Миша ялаксом прядсь Куйбушовасо мединститут, урендясь Советэнь Ушмовийсэнть хирургокс. Эрямонзо прядызе Майкоп ошсо.

Ёвтнеса, мезе лецтневи, вишка пингень шкадом. Сестэ, тюрьмас а понгомадо, кинень-кинень малавикстэнек савкшнось мик полавтнемс Дмитриев буелементь лия буелемс. Лететькшны мелезэм, зярдо веть, вень куншкане, сыль минек кудов вирьстэ тетянь кавтонькирдань ялаксозо, сонзэяк лемезэль Андрей. Сонзэ андсызь-симдясызь, шлясызь, полавтсызь алга оршамонзо, мартонзо вачкить ярсамкат ды сон таго туиль та-ков вирь потс. Сонзэ кудораськензэ «раскулачили», сонзэ панекшнызь та-кодамо лагерев, косто сон оргодсь ды кекшнесь вирьсэ.

А лия кавтонькирдань лелязо, полавтокшнызе буелемензэ, кармась Селивёрстов, кувать важодсь бугалтерэкс коштвенчень нолдыця заводсо, Куйбушов ошсо. А Захаркасо важодсь предэкс Пименов Николай, сон следясь те инженть мельга, кона сакшнось Захаркав, Беднотав, ды чарькодсь, те аволь Селивёрстов, те алкукс Дмитриев, ды пачтясь «торйкав» теде. Састь ружия марто ломанть, саизь се цёранть ды пекстызь тюрьмас. Зярдо вармасть се цёранть кевкстнеме-киведеме ды чавомо, се цёрась витькстась, ёвтызе алкуксонь буелемензэ – Дмитриев сон. Ды мекс кекшнесь лемензэ «раскулачиваниядо» мейле. Ёвлизе весе эрямонзо, кодо сон теевсь Селивёрстовокс. Судось кемсь тензэ ды нолдызе чумонзо. Цёранть нолдызь кудов тюрьмасто. Велявтсь важодеме авиазаводов. Важодсь тосо прявт бугалтерэкс. Истя «сюпав» эрзятнень, ламо важодицятнень пансизь тюрьмава, озавтнизь, вачодо куловлизь се васоло шкатнестэ, 20-40 иетнестэ, Советэнь властень васенце иетнестэ.

Истямо сёрмав эрямось минек эрзянь велень эрицятнень, минек буень ломантнень срамтынзе весе масторонть келес…

Сахалинсэ эрясь монь кавтонькирдань патям-сазором Дмитриева Акулина. Сонзэ тиринь ялаксозо, Тимофей, эри Казахстансо, Кокчетав ёнкссо, Фёдор леляст чавовсь 1941-1945 иень торпингестэнть.

Иван лелянь кадовсть кавто цёранзо, Коля ды Илюшка. Сергей лелянь кадновсть колмо тейтерензэ, сынь те шкас кулость, те Татьяна Сергеевна, конань кадовсть цёранзо Сергей ды Коля, конат ней эрить Захарка велесэ.

Яков лелянь кадовсть цёразо, Сергей Яковлевич, эри Захаркасо, Шура тейтерезэ, эри Захаркасо, Клавдя, эри Адлякувасо, Лена, эри Самарасо….

Сёрмадовкстнэ сезевсть 2004 иестэнть. Авам тусь Тоначив, косо, улема, Инешкипазось валдо оймезнэ вейсэндизе весе малавиксэнзэ ойметнень марто. Ульнесь тензэ малав 82 иеть… Калмазь Жигулёвск ошсо.

                                                                          ***

(Авань, Илюшкань Михалынь Андреинь Наськонь сёрмадовксонзо ды лецтнеманзо коряс, сёрмадыя мон, Эрюш Вежай).

Просмотров: 249

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования