Uralistica

Эрзянь цёрынетнень телень налксемаст. - Зимние игры эрзянских мальчиков

Телень налксемкат эрзянь цёрынетненень.

Курок каникулат. Эряви муемс паро тевть цёрыненк туртов. Минь вишка пингстэ налксилинек "жарсо" (эрзянь хоккей), кирякстнинек сазазкесэ, сокссо. Вечкилинек "лов гювонь" (гуень) нолднемеяк. "Лов гювось" теевиль истя. Саеви тумонь эли селеень чувто пелькс. Неть чувтнэ вадрят эсь скакачисэст ды парсте валакавлевить. Кувалмозо гювонть улезэ- ломанень кедьсэ. Эчкезэ пря песэ - саевель кедьс - 5-6 см. Пря песь сювови петькелень кондямокс, ансяк седе пштикс улезэ аламодо. Пуло песь (3/4 пелькст) састыне човиньгавтови пес. Кувалмозо тееви истямокс: зярдо сайсак кедезэть (вить кедьсэ) гуенть прязо лиси кедьстэть икелев 8-10 см-ка, пулось, зярдо сон боказот лепштязель кедеть ало, аламодо лисевель кавалалдот удалов. Гювось парсте лаксеви-валакавтневи.
Чокшнэ, ярдо якшамось экшэнди, гуесь валнови ваканкасто кельме ведьсэ, эеви-эевгады. Пезнавтови ловс ды валнови. Валнови кавто пестэ. А весть, зярыяксть. Сестэ седе валанясто эенди.
Омбоце чистэнть эйкакштнэ лисить ушов, пирев-паксяв, ды нолднить гювтнэнь. Нолдневи гювось истя: вить кедесь - мендязь кенерьпакарьсэ, гювонть кирдят прянзо аламодо удалга, икелев лиси кедьстэть 6-10-нь см. Пулозо лепштяви кавалалга, аламодо седе ало.Теят ахолкс, ды виевстэ нолдасак гювонть валаня-кавшаня лов ланга. Нолдамка сонзэ ансяк варьгасо!
Нолдамодо икеле гювось ёзави ловсо, улезэ седе валаня.
Васов, ёзмолсо туи, ловганть те эрзянь "лов гювось"! Теи ловсонть варинеть, кирнявтни, мекев ловс чопавтни! Муеви кадозь киванзо вельде. Пек паро мельсэ нолдневи. Чийневаткак мельганзо пек парсте. Кие седе васов нолдасы?!
Эрзянь цёрынетне ,те эрзянь налкшкесэнть налксезь, ансяк седеяк шумбралгадыть, кеняркшныть телентень, телень читненень, касыть шумбра-виев эрзянь цёракс.

Эрзянь тетят, тееде истят гювт эсь эйкакштнэнень! Терявтодо!

Эрюш Вежай

Просмотров: 127

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования