Uralistica

Кылем арняе Удмурт театрын Быдӟым Вормонлы сӥзем концерт ортчиз.

                          Концертэз нуизы Александр Бикузин но Вероника Ваулина

Ож темаен кемалась тунсыкъяськисько бере, "Быдӟым Вормонлы сӥзисько" ӵошатскон кутсконаз ик тунсыко потӥз. Арысь аре Вормон нуналэ удмурт кылын ож сярысь 3-4 удмурт кырӟан чузъяське - мукетъёсыз ӧвӧл. Нош та конкурс ож тематикалы, ветеранъёслы, ас странаедлэн историезлы саклык висъяны куриз. Туж тунсыко вал, кин вожвылъяськонэ пыриське, кыӵе кырӟанъёс вуо, трос-а соос. Сое ялэм бере ик малпай: йылпумъян концертэ вуыло.

                                                           "Шулдыр жыт"

Нош куке афишазэ адӟи, мылкыды пуксиз: отын одӥг тодмотэм нимъёс вал (мон, кылсярысь, отысь Г.Корепановез но В.Садаеваез гинэ тодӥсько), нош пумаз, серекъяса сямен, Лёшка но Серёжка гожтӥллям. Со кык муртэз адӟеме ӧвӧл ке но, нимъёссыя малпан кылдӥз, та концертлэн форматэзъя соос уз тупалэ шуыса.                                                           Раиса Князева

Вератэк уг луы, радиоын реклама умой вал шуыса, концерт сярысь нуналлы быдэ олокӧня пол ивортылӥзы. Озьы ке но, отын но шер гинэ вераллязы, кин конкурсэ пыриськоз. Нош яратоно кырӟасьёсыдлэсь нимъёссэ уд кылӥськы ке, концерт сярысь ялон огаз пеле пыре, мукеттӥз потэ.

             

                                            Роман Болтачев но Яна Байкова       

Ветлӥ концертэ. Огъя солэсь туж ӟеч мылкыд кылиз. Шумпоттӥзы шаермылэн пӧртэм сэрегъёсысьтыз пӧртэм арлыдо тодмо но тодмотэм кырӟасьёс, коллективъёс (тросэз нимъёс мон понна вылесь вал). Кин ке туала кылъёсъя, кин ке классикъёслэн кылбуръёссыя гуръёс кылдытэм.

                                       Константин, Юрий но Юлия Волковъёс

Вормисьёс пӧлы шедизы "Шулдыр ӝыт" (1-тӥ инты), Александр Леонтьев (2-тӥ инты), Елизавета Лекомцева (2-тӥ инты), "Алнаш мылкыд" (3-тӥ инты), Валерий Главатских (3-тӥ инты). Со сяна, Глаз ёросысь Валерий Главатских тужгес трос куара люказ учкисьёс пӧлын. Кун Думалэсь данъянзэ басьтӥз Богдан Анфиногенов.

                                                          Геннадий Ганьков

Кема малпаським, малы ӵапак таосыз кырӟанъёс вормизы. Ӵошатскон "Быдӟым Вормонлы сӥзисько" (Быдӟым ожлы ӧвӧл!) нимаськиз бере, озьыен, чаклазы ӵапак Вормонэн герӟаськем кырӟанъёсыз, нош сыӵеосыз трос ӧй вал (ӵемгес кырӟазы бырем ӵыжы-выжыос, бертымтэ солдатъёс, бадӟым кайгу сярысь). Со критерийя учконо ке, 2-тӥ но 3-тӥ интыосы потэм кырӟасьёс ваньзы тупало. Нош "Шулдыр ӝыт"? Мыным валантэм потӥз, кызьы со вормиз. Нимыз-данэз понна-а мар-а... (ну, мон крезьгурен герӟаськемын ӧвӧл, палэнысен учкыса верасько).

                                                         Валерий Главатских

Мыным ке туж кельшиз Роман Болтачевлэн но Яна Байковалэн кырӟамзы. Яналэн куараез туж зол, Рома быгатыса шудэ баянэн. Аспӧртэмлыко крезьгур амалъёсты кутӥзы, 2 куараен кырӟазы, адскиз, рос-прос дасяськиллям шуыса. Озьы ик пайми Елизавета Лекомцевалы но Валерий Главатскихлы. Зэмзэ вераса, нырысетӥзэ соосыз адӟи но кылӥ. Асьсэды сцена вылын туж капчи возё, Елизаветалэн кырӟанэз но кыӵе ке воксё аспӧртэмлыко вал: капчи, туала. "Алнаш мылкыдъёслэн" кельшиз трубаен шудэмзы, кырӟанзы соку ик туж торжественной луиз.

Эшшо туж кельшиз на Якшур-Бӧдьялась нылъёслэн ансамбльзы. Пичиесь на, нош асьсэды сыӵе усто возьматӥзы! Конкурсэ пыриськысалзы ке, малпаськытэк соос понна куараме сётысал!

                                                       Геннадий Корепанов

Со сяна кельшиз, "Ингур" капеллалэн кивалтӥсез Валерий Митрофанов конкурслы йылпумъян лэсьтэмлэсь азьло удмурт кырӟасьёслэсь зол но ляб палъёссэс вераз шуыса. Кулэ дэмланъёс сётӥз, вожвылъяськонэ пыриськемзы понна тау кариз.

                                                       Богдан Анфиногенов

                                                       Елизавета Лекомцева

                                                         "Алнаш мылкыд"

                                                         Марина Галичанина

                                            Якшур-Бӧдьялась нылпи ансамбль

                                                        Александр Ашихмин

                          Вероника Садаева, Галина Владыкина, Раиса Нефёдова

Просмотров: 752

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Апрель 9, 2015 в 1:39am

чебер фотоос

жаль, ваньзы георги басма нулло шуыса, али со урод символ луиз

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования