Uralistica

Арысь аре, Вормон парадъёсы потаса, малпалляй «Кызьы меда та нуналэз пусъё бадӟым каръёсын?». Туэ йырме тӥяно ӧз ни луы: билет басьтыса, Москвае но Санкт-Петербурге вуылӥ.

Нырысь Москвае мынӥмы. Юбилейлы дасяськон азьвыл ик кутскиз ни бере, адӟеммы потӥз, кызьы воштӥськемын Горд площадь но Йыбырттон гурезь – ӵапак отын ортчо Вормонлы сӥзем бадӟымъёсыз ужрадъёс.

Нырысь мынӥмы Йыбырттон гурезе. Метроысь милемын ӵош туж трос адями потӥз. Паймим: 9-тӥ май ӧз на вуы, нош калык дыртэ ни Быдӟым ожлы сӥзем музей но мемориал пала. Мукет дыръя та интыын буш луэ, али ке – пыдэз нокытчы лёгыны. Азьлань мынэммыя валамы ни, адямиос музей пала уг вамышто  – Йыбырттон гурезьысь черк доры дырто. Ӵапак 6-тӥ мае отчы Георгий Победоносецлэсь десницазэ вайиллям, сое пумитаны вуылӥзы Москвалэн йырыз Сергей Собянин но Кирилл патриарх. Ужрад йылпумъяськем бере, Кирилл патриарх нимысьтыз литургия ортчытӥз.

Черк азьысь калык кошкыны ӧз вутты на, Быдӟым ожлы сӥзем музей азе но туж трос адями люкаськиз. Тодӥмы: отын кадетъёслэн парадзы ортчоз. Сое адӟыны Россилэн шоркарысьтыз ӝыныез улӥсьёс лыктӥллям, кожалод: Йыбырттон гурезь палэнысен кузьыли карлы укшаз. Быдэс Москваысь вань кадетъёс – сьӧд но, лыз но, вож но формаосын – йырзэс выллань ӝутыса, сэзь вамышъязы.

Ужрадэз учкеммы бере, Горд площаде шонтӥмы. Отын но калыкез макемында вал. Но солы ӧм ни пайме: Вормон нунал матэктэ ук. Озьы ке но, соку ум на тодӥське вал, кӧня ке минут ортчыса, площадьын Вормон парадлэн репетициез кутскоз шуыса. Куазь шулдыр кариськиз, соин но, дыр, калык ялан лыктӥз но лыктӥз, площадьлэн борддоръёсыз кузя люкаськылӥз (пушказ пырыны пыриськисьёсыз гинэ лэзизы).  Кыӵе но техника ӧз ортчы азьтӥмы, кыӵе формаен ожгарчиос но кадетъёс ӧз вамышъялэ! Туж йӧноесь, чебересь! Соос шоры учкыса, пушкын кыӵе ке данъяськон мылкыд кылдӥз. Куд-огез учкисьёс синвуаськизы но.

Репетициез учкыны лыктэмъёс пӧлын кунгож сьӧрысь туристъёс но трос вал. Кин мар лабыртэ – уд вала. Но тани ми ӟус вылэ пуксимы, берамы немецъёс интыяськиллям. Котьку тунсыко потэ вал: кызьы соос парадъёсмы шоры учко, мар со сярысь малпало? Сак кариськыса, соосыз кылзӥсько ни ай. Огез шоро-куспо арлыдо немец кышномурт вера вӧзаз пукисьёслы: «Кыӵе дуно усе, дыр, та Парад! Сомында адями отчы пыриське, техника! Кыӵе зол дасясько!». Мукетъёсыз соин соглаш луэмзэс верало. Та вакытэ площадьын чузъяськыны кутске «День Победы» кырӟан. Со ик кышномурт шуэ: «Мыным туж та кырӟан яра, уг ке но валаськы кылъёссэ. Чебер со, сюлме пырись». Нош вӧзаз пукись пияш – мынам огъёзэ, дыр – чик кепыратэк, нокыӵе акценттэк, бадӟым куараен кырӟаны кутске: «День Победы, как он был от нас далёк…». Ми выныным нырысь паймыса ог-огмы шоры учкимы, собере – немецъёс шоры (зэмзэ но немец пияш кырӟаз – ӧм суралэ!), собере – нош ик ог-огмы шоры но кема пальпотыса пуким ай.

Москватӥ калтыртэммы бере, мынӥмы Санкт-Петербурге. Шоркарын Парад зол вал, луоз, но отчы вань мылкыд карисьёс шедьыны уг быгато: Горд площаде ваньзэсты уг лэзё, нош борддоръёсыз кузя инты быдэс городлы но туристъёслы уг тырмы. Соин Москваын улӥсьёс Парадэз учкыны ӵемысь Санкт-Петербурге ветло, пе. Эшшо но ӵемгес - доразы, телевизор пыр.  

Санкт-Петербургын но Вормон нуналлы дасяськон но солы сӥзем ужрадъёс азьвыл ик кутскизы ни. 7-тӥ мае Балтийской вокзал вӧзысь кадетъёсыз адӟимы, соос нимысьтыз шествие потӥллям, «Вахта Памяти» радъяллям. Нош 8-тӥ мае бадӟым ужрад ортчиз Пискарёв шайывылын – ӵапак отчы котыртэм Ленинградын тросэз кулэмъёс но та городэз утем бырем солдатъёс ватэмын. Куазь туж зоро но тӧло вал ке но, калык туж трос люкаськиз. Санкт-Петербургысь кивалтӥсьёс но ожгарчиос «Мать-Родина» мемориал доры уно сяськаос понӥзы, вань быремъёсыз буре вайизы. Нунал ӵоже Пискарёв шайвылэ пырон дорын Быдӟым Атыкай ож сярысь документальной киноос мынӥзы, музей но архив ужазы.

Вуиз кема возьмам 9-тӥ май. Ураме потӥм гинэ, соку ик шодӥськиз ни быдӟым праздник. Отчы-татчы пӧртэм арлыдъем, пӧртэм выжыысь адямиос ветло, тросэзлэн гадь бордазы георгиевской лента  ошемын, ог-огзэс ӟечкылало, пальпото.

Парад кутскытозь 2 час ай, нош Дворцовой площадьын умой интыос быро вал ни. Азязгес шедён понна адямиос Санкт-Петербурглэн но Ленинград улослэн пӧртэм сэрегъёсысьтыз ӵукна 5-6 часлы ик лыкто ни, пе, нош кин ке быдэс уйзэ но отын ортчытэ.

Калык люкаськемъя, «человек-паукъёс» потӥзы: соос писпуос, ОМОН машинаос, светофоръёс вылэ, матысь коркаослэн подоконникъёсазы кечырскизы, липетъёсы тубазы. Парад кутскон азьын люкаськемъёслы «концерт возьматӥзы» соос.

Шуак крезьгур чузъяськиз, площаде пӧртэм взводъёс, полкъёс, дивизиос потӥзы. Соос пӧлын танкистъёс но, десантникъёс но, морякъёс но, артиллеристъёс но – котькинэз вал. Ваньзы ик, вылэ ӝутыса, Россилэсь флагзэ но оже пыриськем армиослэсь, дивизиослэсь, батальонъёслэсь знамяоссэс нуизы, ож кырӟанъёсыз быдэстӥзы (Парад йылпумъяськем бере со флагъёс но знамяос Санкт-Петербургысь пӧртэм юртъёс борды шедьытъямын вал). Люкаськем калык соосын огымысь кырӟаз. Милемлы тужгес яразы барабанэн шудӥсь солдатъёс –соос Парадэз йӧногес, золгес каризы кадь. Ӟечкылан кылъёс чузъяськем бере, ожгарчиос туж чебер котырскизы на, собере, люкиськыса, кӧняез ке Дворцовой выж, мукетъёсыз – Исаакиевской площадь пала вамыштӥзы. Люкаськемъёс синмаськыса соос шоры учкизы. Мӧйыос – бӧрдыса.  Парад 2 час пала кыстӥськиз, но кӧня сюрс муртлэсь со сюлэмзэ бугыртӥз меда, кӧняез данъяськыса «Ура!» яке «Спасибо деду за Победу!» черекъязы.  

Та вакытэ ик Нева вылын Балтийкой флотысь корабльёслэн, нош Садовой ульчаын – трамвайёслэн парадзы ортчиз, но, жаляса верано, огвакытэ ваньмаз вуттӥськыны уг луы.

Дворцовой площадьысь вамыштӥмы Петропавловской крепосте, отын ож вакытысь техникаен адӟытон луыны кулэ вал. Но, зэмзэ вераса, со техника учкисьёс азе радэн-радэн султытъямын ӧй вал, со быдэс нунал ӵоже Санкт-Петербург урамъёстӥ отчы-татчы ветлӥз, отысь кылӥськизы ож гуръёс.

Городлэн пӧртэм люкетъёсаз концертъёс ортчылӥзы, пӧртэм площадкаос ужазы, котькытын туж трос адями вал. Кин ке кырӟа, кин ке соосты учке, кин ке ветеранъёслэсь мадемъёссэс кылзэ, ӟечкыла соосыз. Ми тодӥськом: Удмуртиын ож аръёсы вордскемъёс но будэмъёс войнаез ас вылазы зол шӧдӥзы, нош Ленинградысьёсыз - адӟизы но. Соин отысь улӥсьёс понна Вормон нунал – зэмзэ но «праздник со слезами на глазах».    

Городысь уно адямиос оже пыриськизы но улонзэс Родиназы понна сётӥзы, со сяна котыртэм Ленинградысь улӥсьёс нуналлы быдэ сютэм улонлэсь сюрсъёсын кулылӥзы. Соосыз буре вайыса, Санкт-Петербургтӥ 3 час котыр вамышъязы «Бессмертный полк» акцие пыриськисьёс  (иворъёсысь кылӥ: соос 70 сюрс пала вылӥллям). Синме тужгес йотӥз, тросэз соос полысь 3-4 туспуктэмен ортчизы шуыса. Пӧлазы боды вылэ пыкиськиса мынӥсь пересьёс но, 2-3 аресъем нылпиос но вал. Юнме уг шуо ук: Вормон нунал вань поколениосты огазея.

Ӝытпал Дворцовой площадьын бадӟым концерт кутскиз. Тунсыко потӥз: быдэс площадьын адямиос трос ке но вал, сценалы матэгес кариськыны, нош собере отысь берен кошкыны туж капчи вылэм (Ижкарын сцена доры мыныны секыт, нош отчы сюриськод ке, котькуд ласянь паськато). Вань люкаськемъёсыз шумпоттӥзы тодмо кырӟасьёс Игорь Скляр, Людмила Сенчина, Надежда Бабкина, Александр Малинин, Николай Расторгуев но «Любэ» группа, нош ӝытбыт концертэз нуизы Людмила Вербицкая но Дмитрий Дюжев. Кизилиос но ми вискын ог 30 метр вал!

   

10 часын ӝыт салют кутскыны кулэ вал. Ми вазьгес мынӥмы – нош ик умой инты шедьтон понна. Нева доры потӥмы, нош отын - копак-копак баржаос, лодкаос но мукет уясь арбериос! Кӧня меда соос вал? Паймоно, кызьы ог-огзы борды ӧз шуккиськылэ. Нева но лодкаосын уясьёс шоры синмаськыса учкыкумы, пыд улысь быдэс музъем дыректӥз кадь. Олокӧня сюрс люкаськем адямиос маке шыпыртыны, ог-огзы шоры учкыны ӧдъязы. Та вакытэ Нева вадьсын яркыт салют пазьгиськиз. Лэзьязы сое Петропавловской крепостьысь пушкаосысь. 10 но ӝыны минут адямиос выллань учкизы, дугдылытэк «Ура!» черекъязы. Огез черектӥське но котырысьтыз ваньмыз азьланьто.  

Вормонлы сӥзем вань ужрадъёс йылпумъяськем бере но, Санкт-Петербургын чалмыт ӧз луы. Адями нуназе но, уйин но урамъёсысь ӧз бырылы: ваньзы поръязы, кырӟазы, шумпотӥзы. Быдӟым Атыкай ожлы сӥзем вань синпелетъёс дорын тросаз сяськаос но сяська керттэтъёс тыремын вал. Со нуналэ унояз лавкаосын но сиськон интыосын георгиевской лентоаос сётъязы, Вормон нуналэн ӟечкылазы.

Ог-огдэ медад ышты шуыса, быдэс нунал китӥ кутӥськыса ветлӥськод, вӧзысь адямидэ кылон понна, бордаз ик кариськиськод – озьы луэ вылэм зэмос калык праздникын.

Просмотров: 177

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования