Uralistica

Алина Подгорнова, Вячеслав Гагарин. Неть эрзянь од ломантне невтьсызь Эрзя раськенть МАФУНонь промкссо. Молодёжь Эрзя народа представят на конгрессе МАФУН Алина Подгорнова и Вячеслав Гагарин.

Неть эрзянь од ломантне молить Эрзя раськенек пельде МАФУНонь Инекужов.

Алина Подгорнова ды Вячеслав Гагарин.

Пачтямо ды пшкадема эрзянь паро-кеме эрзянь ломантненень.
Эрзянь паро ломань, ялгай! Тонь мельс. Эрзянь раськень вейсэндявкстнэнь мельс.

       Эрзят, тедиде Эстэнь Масторсо, Тарту мазый ошсо, косо улить ламо тёкшшколат, ламодо ламо тёкшшколасо тонавтницят, МАФУН (Молодёжная ассоциация финно-угорских народов) од ломанень вейсэндявксось карми ютавтомо Инекужо. Те раськеютконь промксось карми ютамо медьковонь 29-це чистэ саезь умарьковонь 1-це чис.
      Васенцеде МАФУН-онь прявттнэ кучсть тердема Эрзянь Инекужонть лемс, конасонть тердсть Эрзянь Инекужонь од ломанень Куронть пельде вейке делегат ды ниле ваныцят.
       Витьстэ меремс, тердемась ульнесь тенек апак учонь. Те шкас ламо иень перть МАФУН-ось эзь тердтне эсь промксозост эрзянь од ломанть. Эрзятнень таркас тозонь терднесть эрзякс а кортыця «мордвинт». Кода сынь «представляли» тосо Эрзя раськень од ломантнень, миненек тунь эзь чарькодеве. Секскак Эрзянь Инекужонь прявткурось а весть пшкалесь МАФУН-с вешема марто: тердеде тозонь минек од ломантнень, конат кортыть эрзякс, топавтыть эрзянь тевть, кеместэ аштить эсь раськест-келест кис.
  Ламо иеть МАФУН-ось чатьмонсь. Ней, окойники, маримизь. Ней тов молить алкуксонь эрзят: мазыйть, виевть, эрзякс кортыцят ды сёрмадыцят, конат парсте невтьсызь минек Эрзя раськенть лия раськетнень ютксо, конат а келест, а оршамост коряс зярдояк а човорявить ды а ёмить лия раськень од ломантнень юткс.

Те – Вячеслав Гагарин, эрзянь таланов од цёра, кона ламо иеть важоди «Эрьмезь» эрзянь керсицянь вейсэндявкссонть, эри Вирь Тавла велесэ, ды Алина Подгорнова, эрзянь мазый од тейтересь, эрзянь валморонь содавикс сёрмадеесь,  ёроков эрзянь од сёрмадейтнестэ вейкесь, кона ульнесь «Вал» сёрмадеень куронть пурныцятнень ютксо. Теде башка, Алина – 2014 –це иень Эрзянь сёрмадома шкинемань «Эрзянь ойме» Казнень саицясь.
    Эрзят, ялгат! Ней тенек эряви лездамс неть эрзянь од ломантненень МАФУНонь промксов пачкодемасост. Весемес од ломантнень эсь ярмакост, янксемакс, а сатыть.

Ярмактне эрявить:

1. Омбомасторонь лемлопань (паспортонь) теемас.
2. Визань теемас.
3. Тов ды мекев ардомас (поездэсь+бусось).
4. Тосо максомс промксонь ютавтомас 40-нь еврот.

Секскак пшкадян тенк, паро-кеме эрзят, кинь ули мелезэ лездамс тенек те паро эрзянь тевсэнть эсь ярмаконь путовкссо, кучодо те эрзянь тевентень, зяро тенк явови. Те эрзянь тевентень эрьва целковоесь карми а онкставиця питнекс. Содадо, кирдивиесь вейкеяк целковой ЭРЗЯНЬ делегаттнэнень а максни.
Зяро ярмакт кучозь ды мезес сынь кармить ютавтозь, тенк пачтятано. Ярмаконь кучома тешкстнэнь-таркатнень коряс пшкадеде монень:  +79211510035, erush2002@mail.ru

Эрюш Вежай
Эрзянь Инекужонь тевкуронь прявтось.
2015-це ие, панжиков, 25-це чи.

Просмотров: 273

Эта запись блога закрыта для комментариев

Комментарий от: Ortem, Май 27, 2015 в 12:42am

пек паро!

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования