Uralistica

ВАЛ «МАСТОРАВАНЬ» ПОКШЧИДЕНТЬ.
  Эринь мон, кода весе лият эрзянь ломантне, ды мезеяк а содылинь эсень кезэрень раськедень, чачома мастордон. Школасо тонавтнинь – а содылинь, педучилищасо – а содылинь. Московсо тонавтнемстэ кирдинь покш виськсчама те асодамочиденть… Мейле, зярдо карминь эйкакшт тонавтомо тиринь келентень, карминь вешнеме ёвкст, морот ды лия мезе эрявикс. Ансяк аволь шожда ульнесь сынст муемс. Эрзянь книгат истят арасельть.
 Те «асодамочинь ормасонть» сэредсть се шкане пек ламот. Масторсонок теде мелявкст мекс-бути арасельть. Вана уш 40 иес чалгазян. Прям ды оймем жо раськень ёжонь коряс допрок чавот. Зярдо школасо макссть тень эрзянь класс, карминь весементь вешнеме. Ды апак сода, аволь курок мезе муят! Тонавтыцянь семинарсо Л.В.Седова фольклоронь пурныцясь ёвтась тенек «Устно-поэтическое творчество мордовского народа» эрзянь ды мокшонь фольклоронь пурнавкстнэде. Саинь минек буень библиотекастонть весементь, мезесь юткстост ульнесь. Ловнынь прянь апак кепсе, дивсинь: зяро ули пурназь раськень сюпавчи, конадонть мон мейс-бути а содылинь…
  1990 иестэнть кочказелинь делегатокс «Масторава» вейсэндявксонь инекужос. Те промостонть седе келейстэ ушодовсь раськенек вельмевтемань тевесь. А ёвтневи валсо, кодамо кеняркс ульнесь весе тей сазь эрзятнень ды мокшотнень чаматнесэ, ойметнесэ-седейтнесэ!!! Эрьва ёндо марявсть тиринь кельсэ кортамот, гайгсть морот. Раськень оршамопельсэ ульнесть аволь ламот… Зяро пштить ды мелявтовикс кевкстемат панжозельть те покш промкссонть!!! Весе марявсть вейке вейкест туртов малавикс ялгакс, раськень ломанекс.
Концертэнть ветясть эрзянь ды мокшонь кельсэ Маризь Кемаль ды Николай Лобанов. Содавикс моротнесэ морась весе залось. Те ульнесь покштояк покш кеняркс – «эйфория». Истямо «съезд» лия арасель ды ней зярдояк а ули.
Те сонзэ видьмексэнзэ понгсть ламонь оймес ды, шкань ютазь, кассть эрзянь паро тевс.
Те инекужодонть мейле кармасть теевеме эрзянь ды мокшонь тонавтнема книгат, лиссть эрзянь кельсэ ёвкст, эйкакшонь туртов книгат, альбомт раськень оршамотнеде, ярсамопельтнеде, панжовсть ды пурнавсть Россиянь келес «Масторава»( лия лем мартояк) эрзянь ломанень вейсэндявкст ды ламо лия мезе. УШОДОВСЬ РАСЬКЕНЬ ВЕЛЬМЕВТЕМАНЬ ТЕВЕСЬ… Истямокс монь седейс кадовсь «МАСТОРАВА» вейсэндявксонть инекужось, кона ютась 25 иеде икеле… Монгак сестэ ормалгадынь эрзянь тевтнесэ, мария эсь прям ЭРЗЯНЬ ЛОМАНЕКС ды, тосо кирвазтезь оймень толось, нейгак палы потсон.
Тедедень медьковонь 5-це чистэ Саран ошсо Пушкин лемсэ ловномань кудос пурнавкшность эрзянь ды мокшонь ломанть «Масторава» вейсэндявксонть инекужонзо туртов 25 иень топодеманть ды А.М.Шароновонь «МАСТОРАВА» поэтической эпосонь книганть лисема шкастонть 20 иетнень тешкстамо. Тей сакшность ламо, эрьва косто ды эрьва кодамо раськень. Промксось, кода весе эрзянь тевтне, панжозель ТОРАМА ансамблянть «Тюштя» моросонть. Сехте мельвановикс эрзятне: А.М.Шаронов, Г.Д.Мусалёв, Е.В.Четвергов, Н.С. Макушкин, П.Г.Гаврилов ды Н.И Аношкин кирдить кедьсэст «Масторава» эпосонь книгатнень.
 
Вал сайсь Александр Маркович Шаронов. Сон ёвтнесь 20 иень перть «Масторава» эпосонь книганть лангсо важодемань стака киденть.
(Шарононь Сандра - Александр Маркович Шаронов, чачсь 1942 даволковонь 18 чистэ Шокша велесэ Теньгушбуесэ) — эрзянь ды рузонь кельсэ сёрмадей, наукань келень содыця доктор.
Эрзянь ды Омбомасторонь эрицятне содасызь Шарононь Сандрань кода Ине валморонь сёрмадеекс, сон 20 иень перть тейсь эсензэ «пакшанзо» — «Масторава» морокерьксэнть. Сёрмадсь лияткак ламо книгат, монографият.
1995 иестэ казезь Мордовия Республикань Масторпельдень Казнесэ, ды 1997 иестэ М. А. Кастрен вейсэндявксонть Васенце Сёрмадеень Казнесэ)
 
Вал максови Николай Степанович Макушкиннэнь - Мордовия Республикань народной художникентень, «Масторава» эпосонь книганть артовкстнэнь теицянтень. Те сон мазылгавтызе морокерьксэнть, сонзэ ойместэ ды ёроков кедь алдо лисевть чамачачовкстнэсэ кармасть миненек содавомо «Масторава» эпосонть «эрицянзо» Николай Степанович ёвтнизе, кода важодсь артовкстнэнь лангсо. Ломанесь Макушкин аволь эсь прянь невтиця, куш пек содавикс аволь ансяк Россиясо, лия масторсояк.
 
Корты Елена Александровна Шаронова – филологиянь наукань докторось, профессорось, книганть научной редакторозо, Александр Марковичень тейтерезэ. Сон ёвтнесь «Масторавадонть», кода эрзянь героической эпосонь формадонть. Лецтнесь, кода тетязо сёрмадсь-важодсь книганть лангсо. Кунсолынь ды арсинь, кодат превейть неть тетят-тейтерть Шароновтнэ!
 
Вал сайсь Николай Иванович Ишуткин – «Чилисема» эрзянь эйкакшонь журналонь прявтредакторось. Мельспаро ульнесь кунсоломс Николай Ивановичень шнамонь валонзо эпосонть кувалма. Кортась сон ванькс ды мазый эрзянь кельсэ. Сон паро мельсэ ёвтась: васенцекс эрзякс «Масторавасто» ёвтамотне максозельть «Пионерэнь вайгель» - «Чилисемань» лопатнесэ.
 
Пек мелезэнь тусь Василий Иванович Дёминэнь, филологиянь наукань докторонть, професоронть кортамозо. Сон невтизе эсензэ варштавксонть эпосонть мазычинзэ, сюпавчинзэ ды смустень коряс домкачинзэ лангс. Кунсолынь неть превей эрзянь ломантнень, ды оймем пешкедсь раськенек кувалт каштанчиденть!
 
Вал макссть Андрей Александрович Гагаевнень - философиянь наукань докторонтень, профессоронтень. Мон икеле сонзэ а содылия. Ванат лангозонзо, мейсэяк а неявикс ломань, конань вакска ютавольть сонзэ апак редя. Кода жо кортазевсь те превейдеяк превей ломанесь, валдомгадсь-полавтовсь сонськак ды весе кунсолыцятнеяк. Зяро прев, содамочи ломаньсэнть! Сон ванкшнызе «Мастораванть» философиянь варштавкстнэнь ёндо: -"Аволь весе раськетнень ули эпосост...Сон эрямосонть а эрсияк, теемганзо эряви ломань. Эряви поэт. Эпоссонть невтема пелькстамо, ятт. Содави, те а лади политкорректностень лувонтень, ансяк яттомо эпос а лиси... "Мастораванть" лувозо - фольклоронь, рунгозо-лангозо - авторонь... "Масторавасо" ломанесь кавтолды: эйсэнзэ тюрить парось ды берянесь, ды кие эйстэст лиси изницякс - а содави"., Путызе эпосонть питнейчинзэ коряс модамасторонь лия эпостнэнь юткс, истят, кодамокс содасызь весе мирсэнть «Калеваланть», «Калевипоэг», «Лачплесис» ды лия ине эпостнэнь. Лемдизе «Мастораванть» литературасо од жанракс, конань панжизе меельце эрзянь ды рузонь эпической ёвтницясь - А.М. Шаронов.
 
Мишанин Юрий Александрович профессороськак, Мордовиянь госуниверситетэнь филологиянь факультетэнь деканось ёвтась ламо шнамонь валт «Масторавадонть».
 
Садовников Николай Владимирович - Пензань университетэнь профессороськак седейшкава шнась те ине книганть ды тешкстась: минь, эрзятне покш каштанчисэтяно сень кувалма – МИНЕК УЛИ ПЕК МАЗЫЙ ДЫ ПРЕВЕЙ ЭПОСОНОК! Сон ловнынзе эпосонь вечкевикс валтнэнь:
Бути чачиде Инешкинь эйдекс,
Инешкинь эйдекс яла уледе!
Свал ансяк эсенк кельсэ кортадо,
Свал ансяк эсенк превсэ эрядо,
Свал ансяк эсенк мельсэ арседе,
Свал эсенк коенк-иланк ванстодо,
Свал эсенк ломанть прявтокс путнеде.
Сестэ а ёми Эрзянь масторось,
Сестэ нежеди лия паро шка.
Сестэ свал карми монь пижень сюром
Вейс тынк пурнамо, меленк кастомо.
Сестэ пазчангот свал тыненк улить!


Лузгин Александр Степанович профессорось ульнесь «Масторава» эпосонь книганть нолдыцязо. Сон се шкане важодсь Мордовиянь книгань издательствань прявтокс. Ёвтнесь се шкань книгань нолдамонь стакачитнеде ды лиядо мезде. Истяжо пек шнызе «Мастораванть».
 
Мусалёв Григорий Дмитриевич – эрзянь келень идемань фондонть прявтось, эрзянь Инязороськак пек парсте кортась эпосонть питнейчидензэ, смустень сюпавчидензэ ды мазычидензэ. - ."Масторавась" - менельсэ ТЕШТЕ, кона невти, кодамо таркасо аштить эрзятне модамасторлансонть".
 
Маризь Кемаль лездась «Масторавань» авторонтень эрзянь текстэнь витнемасонть. Сонгак тешкстызе эпосонть покш питнейчинзэ.
 Малав весе кортыцятне прасть вемельс: «Масторавась» - гениальной книга, Шаронов – гений.
 
Вешинь вал монгак. Ёвтния, кода монь эрямос совась «Масторавась», кодамо тарка сайсь монь оймесэнь.
Эрзянь, мокшонь раськетнень омбоце Инекужонть ютамонь читнестэ (1995 ие) микшнесть печатьстэ лисезь «Масторавань» книгатнень (сон лиссь 1994 иестэ). Весе делегатнэ капшасть сонзэ рамамс. Эзинь кирдеве монгак. Мельспаросо ванкшнынь книгань мазый артовкстнэнь. Мелем ульнесь седе куроксто самс кудов ды ушодомс ловномонзо. Кудосо ловныя книганть 2-3 чис. Неть читнестэ мельсэнь-превсэнь ульнинь пек кезэрень Эрзянь Масторсонть, Тюштянь пингесэнть, «Мастораванть» «эрицянзо» ютксо, сынст марто кецтнинь-кенярдокшнынь, ризнынь-мелявтынь… Весе ёвкстнэ, ёвтамотне, моротне, койтне-кирдатне, конатнень марто васенцеде вастокшнынь «Устно-поэтическое творчество мордовского народа» книгань томтнэстэ, марякшнынь авань, покштян-бабан кургсто, вишкапингень лецтнематнестэ вельместь ды таго ютасть монь оймеван. Ней сынь ульнесть вельтязь мазыйдеяк мазый ванькс эрзянь кельсэ!!! Кода се шкастонть а марямс эсь прят ЭРЗЯНЬ ЛОМАНЕКС?! Кода а кирдемс покштояк покш каштанчи РАСЬКЕНЕК кис?! Модас сюконямот теть, Александр Маркович, те ИНЕ КНИГАНТЬ кис!!! Школасо важодемстэ эрзянь келень эрьва уроксто бажинь кадомс 5-7 минутат эйкакштнэнень «Масторавань» ёвтамотнень ёвтнемантень. Тонавтницятне пек учость неть шкатнестэ.

 Ней сась компьютерэнь ды интернетэнь шка! Покшнэк-вишканек ломантне чоп ёмсить тосо. Ёвтыя Александр Марковичнэнь энялдомам: путомс интернетс «Мастораванть» электронной вариантонть. Кадык ломантне мельспаросо сонзэ эйсэ ловныть ды ванкшныть Макушкинэнь мазыйдеяк мазыйть артовксонзо. «Мастораванть» авторозо алтась топавтомс монь вешеманть.

 Шнаса эсь прянгак: «Масторава» эпосонь зярыя ёвтамотнень ды сканировазь артовксонь путнеманть кис «Руця» эрзянь эсь мельсэ пурнавт ярмакпаргонть пельде монень максозель Эстэнь масторсо нолдазь А.Шароновонь «Масторава» книгась. Сон ульнесь тешкстазь авторонть, Эрюш Вежаень, Инязоронть ды Нуянь Видязонь кедьсэ сёрмадовкссо (автографсо). «Масторавань» покшчистэнть мон вешинь истят сёрмадовкст Шаронова Е.А., Макушкин Н.С., Гагаев А.А., Дёмин В.И. ды Абросимова Н.пельдеяк.
 
      Покш мельспаросо кунсолынек покшчинь омбоце пелькссэнть 1990 иень «Масторава» инекужонть резолюциянзо. Кода аволь уле нусманя, ансяк пек аламо се шкань вешематнеде топавтовсть. Мельзэнь пек тусть те инекужодонть Маризь Кемалень ёвтнемазо. Сон машты пек парсте эрзякс ёвтнеме!Сон ульгнсь те вейсэндявксонть пурныцятнень ютксо.

Нама, те покшчинтень эряволь самс седе ламо эрзятненень ды мокшотненень. Ветицятнененьгак эряволь седе кенярксовсто сонзэ теемс: кармавтомс морамо куш вейкень-вейкень моро «Ламзурь» ды «Толава» ансамблянь аватнень,конат сакшность эрзякс мазыйстэ оршазь те покшчинтень. Кунсоломаль од ломантненьгак, конат ламонест сакшность неть юбилейтнень тешкстамо. Неень шкань эрзянь ды мокшонь сы шкань тевтнень теицяст кармить од ломантне. Кеман, сынь муить од кить-янт ды а кадсызь мельтеме покштяст-бабаст сюпавчинть. Сыненст топавтома «Масторава» инекужонть вешематнень. Лездазо тенст эрзянь тевсэст Александр Маркович Шароновонь «Масторава» ине эпосонь книгаськак.

 РИММА ЖЕГАЛИНА - «Масторава» инекужонь делегатось

Просмотров: 134

Эта запись блога закрыта для комментариев

Пусъёс

© 2021   Created by Ortem.   При поддержке

Эмблемы  |  Сообщить о проблеме  |  Условия использования