Uralistica

Селфи сярысь тодод удмурт Википедиысь!

Алигес Эстониын фин-угор Википедиослы сӥзем семинар ортчиз. Отчы пыриськизы Удмуртиысь, Мордовиысь, Комиысь, Мускоысь, Санкт-Петербургысь, Финляндиысь но Эстониысь азьветлӥсьёс.

Алексей Шкляев удмурт проектъёсын тодматӥз

Википедия – эрико энциклопедия. Тросмы понна со тодмо: отысь котьма сярысь ивор шедьтыны луэ. Интернетэ пырыса, бугыръяськиськод ке, эрико энциклопедиысь статьяос вылӥ чуръёсаз ик пото. Википедиын ӵемысь луо сыӵе иворъёс но, кудъёсыз мукет энциклопедиосы сюрозы ай, кема дыр ортчыса, яке воксё уз но сюре. Шуом, Википедиын али ик бадӟым статья вань ни селфи сярысь (ушъяськыса йылто на, удмурт кылын но табере со сярысь лыдӟыны луэ).  Малы со кулэ? Малы ке шуоно улон азинтӥське, выль арбериос кылдо, выль кылъёс пото, вераськонамы пыро, нош ваньмы соку ик ум тодӥське, мае соос возьмато.      

Озьы ик тросэз уг тодо, Википедиез котькин азинтыны быгатэ шуыса. Кылсярысь, мон студент но гожтӥ реферат вордскем гуртэ сярысь.  Дышетӥселы сётэм сяна, мон сое быгатӥсько Википедие но интыяны, мед  гуртэ сярысь мукетъёс но тодозы шуыса, бордаз туспуктэм ватсай ке, эшшо но ӟеч луоз.  Одӥг гинэ бадӟым курон: гожтэм материал но, туспуктэмъёс но аслам луыны кулэ, муртлэсь басьтыны уг яра. Секыт ӧвӧл, нош вордскем интые сярысь, гуртоосы сяна, мукетъёс но тодыны быгатозы, гожтэм материалме пӧртэм кылъёсы берыктыны луонлык кылдоз.

Ӵапак та сярысь вераськонъёс мынӥзы Эстониын. Вань люкаськемъёс мадизы асьсэ кылъёсын Википедиос сярысь, тодматӥзы шуг-секытъёсынызы. Соос милям огвыллемесь вылӥллям: ӧжыт гожъясьёс, эскерымтэ (ӵемысь фактической янгышъёсын) статьяос. Нош карелъёслэн но вепсъёслэн эрико энциклопедизы воксё бӧрдон калын – соос «инкубаторысь» поттэмын ӧвӧл на: Википедизы вордскем кылынызы вань, но отысь статьяосыз лыдӟыны уг луы на, соос уг адӟисько. «Инкубаторысь» потон понна соослы тужгес ӧжытсэ 2 сюрс статья гожтоно. Трос ӧвӧл кадь, но гожъясьёс ӧвӧл.

Удмурт Википедия кӧня ке умойгес югдурын. Туннэ нуналлы отын 3600-лэсь уно статья. Сомында гожтэмын 10 ар ӵоже! (туэ 4-тӥ шуркынмонэ Википедимылэн юбилеез луоз). Шорлыдын 360 статья пала одӥг ар понна.  

Нимаз гожтэме потэ AlnashPiyash сярысь. Ӵапак та никен пияш берпуметӥ дыре тужгес трос гожъя Удмурт Википедие, солэн тусыз, дизайнэз бордын ужа. Кемалась ӧвӧл AlnashPiyash отын администраторе быръемын вал (нош отчы кинэ сюрем уг быръё). Кыӵе пайми, куке тодӥ, со Алнаш ёросысь огаз школаын дышетске шуыса. Нырысь малпай вал уго, со дышетӥсь яке дышетон удысысь ужась шуыса. Янгышаськем. Тросгес мед луысалзы таӵе визьпогъёс.   

Докладъёс кылзэм сяна, фин-угор Википедиосъя семинаре пыриськисьёс тодматскизы translate.keeleleek.ee сайтэ интыям Minority Translate программаен. Со капчиятэ пичи кылэ берыктон ужез (кылсярысь, удмуртэ). Семинарез радъясьёсын ик ми дышетскимы та программаен ужаны, Эстониен герӟаськем кӧня ке статьяез асьме кылъёсамы берыктӥмы, со сяна ӵектӥмы мукет фин-угор Википедиосы удмуртъёсын но Удмурт Элькунэн герӟаськем темаосъя статьяос гожтыны. Нялтас верало на, номыр секытэз ӧй вал шуыса. Программаен ужан инструкция пушказ интыямын, со вылэ пыкиськыны луэ.

Йылпумъян интые гожто на: вань ке тӥляд асьтэлэн гожтэм ужъёсты, туспуктэмъёсты, кудъёсыз «тэк» кыллё, интыялэ соосты Википедие (удмуртэзлэн адресэз - udm.wikipedia.org). Темаос туж пӧртэмесь луыны быгато: бадӟым кунысен пичи нымы-кибыозь. Кыӵе ке валантэмъёсты яке шуг-секытъёсты кылдӥзы ке, эн ӝожоме: администраторъёс яке мукет авторъёс юрттозы, валэктозы, тупатозы. Ӵошен гинэ ужмы мыноз. 

Просмотров: 189

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования