Uralistica

Кода эрзятненень улемс ЭРЗЯКС? \ Как эрзе быть ЭРЗЕЙ? (На Эрзя языке).

Кода эрзятненень улемс ЭРЗЯКС?

  Ламо иень перть те кевкстеманть ванкшномась кемевтимим вана мейсэ: васняяк эряви чарькодемс, кинень ды мейсь эряви эрзятнень «мордвакс» лемдямось.

Кулякспелень (СМИ) варштнезь-ловнозь, сынь мельс: «мордвакс» эрзятненень лемдемаст эряви ансяк КИРДИВИЕНТЕНЬ (власть), васняяк сеть масторёнкстнэсэ, косо седе ламо эрить эрзятнеде, васняяк Мордовиясто саезь. Мень седе ламо масторёнкссонть эрить эрзят, сень седе пек эрзятнень нарьгить-матрыть «мордва» валсонть. Сехте парсте те амазый тевесь неяви Мордовиясо, Самара ёнкссо, Нижной, Симбирь ды Пенза ёнкссо. Неть масторъёнкстнэсэ (регион) ЭРЗЯ валось, тенек эряви чарькодемс, казямосто-виевстэ кардазь. Сон кирдивийсэнть а нолдави эрямос.

Сон, ЭРЗЯ валось, арась кирдивиень ломантнень кортамосост, арась радиосо, ТВ-со, тонавтнема ды важодема тевкуротнесэ, кулялопатнесэ, шкань-шкань ловнома нолдавкстнэсэ. Эряви тенек содамс ды теде видьстэ меремс – ЭРЗЯ валось ды ЭРЗЯ раськелемесь – кирдивийсэнть КАРДАЗЬ валт. Ды те весе тееви РФ-нь Прявт масторкоенть (Конституция) колсезь.

Мезть тейнемс тень пингстэ эрзянь ломанентень?

Прамс вейс  кирдивиенть мелензэ ды амазый тевензэ марто? Те – Эрзя раськенть ёмамо ки. Улить эрзят, конат айгить Эрзя раськенть те ёмамо кинть лангс. Неть эрзятне(?) миить эрзя лемест «мордва» лементь кис. Неть ломантненень кирдивиесь теи карьера, максни казнеть, шны эйсэст. Те тевенть лемезэ – Эрзя раськенть «мордвиявтома» ды рузыявтома. Те политиканть тёкшмелезэ – маштомс Эрзя раськенть. Секскак эрзянь раськенек киремсь-киртявсь 1000000-сто – 400 тёжас.

Сеть эрзятне, конат чарькодизь мордвиявтоманть-рузыявтоманть политиканть тёкшмелензэ (цель), кундасть Эрзя валонть-лементь кепедеманзо, вельмевтеманзо, ванстомонзо.

Сынь а апак пеле мерить кирдивиентень: - Минь – эрзят! Ды вешить: - Лемдядо минек ЭРЗЯ валсо, аволь шабра раськень травамка валсо.

«- Мин – эрзят! – Мон – эрзя!» неть валтнэнь эрзятненень меремка эрьва косо, эрьва кинень, кие терявты лемдямонок шабра раськень амазый валсо.

Эрьва эрзянтень эряви васняяк лоткамс эсь прянть лемдямо шабра раськень амазый валсо.

Эрьва эрзянтень эряви апак пеле, апак визде, витемс эрьванть, кие апак сода терявты лемдямонок амазый шабра раськень валсо.

Эрьва эрзянтень эряви апак пеле кардамс се кирдивиень ломаненть, кулякспеленть, кона терявты лемдямонок шабра раськень амазый валсо.

Эрьва эрзянтень эряви васняяк эстензэ ёртомс эсь келвалстонзо, сёрмадомасто, сельмс-пилес нолдамосто тунь ёртомс шабра раськень кельстэ саезь амазый валонть.

Эрьва эрзянтень эряви васняяк эстензэ меремс: - Мон – эрзя! Киньгак арась правазо лемдямс монь лия раськень амазый валсо! Те коесь кемекстазь РФ-нь Прявт Масторкойсэ (Конституция)!

Эрзякс ульнесть покштянок-сэрдянок. Эрзят – минь. Эрзякс кармить эйкакшонок-ласькенек.

 Сестэ киненьгак а ёмавтови Эрзя раськесь.

Просмотров: 261

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования