Uralistica

СЕЛЬМУКШТ валонть коряс зярыя валт-мельть. \ Несколько слов об образовании в эрзянском языке слова СЕЛЬМУКШТ (ОЧКИ). (Эрзянь кельсэ.\ На Эрзя языке).

СЕЛЬМУКШТ валонть коряс зярыя мельть-валт.


Минек покштятне-сэрдятне зярдояк капшазь-капшазь, домкасто апак арсе, эзть совавтне эрзянь кельс лия раськень валт. Превест-содамочист сатышкаль муемс-вешнемс васняяк эрзянь кельстэ валъюрт, конат маштовить од эрзянь валонь теемас. Сынь парсте чарькодсть эрзянь келенть ваньксчинзэ питненть. Секскак апак пеле тейсть од эрзянь валт сеть од улипарокстнэнень, конат сыть лия раськень пельде.
Койсэм, те превейксчись пек парсте неяви СЕЛЬМУКШТ эрзянь валсонть. Кода превейстэ сон теезь! Кода эрзякс сон теезь-арсезь. Пек кецян те валонтень. Ёвтынкая тынсь марямга: СЕЛЬМУКШТ. СЕЛЬМУКШТ! Мазый эрзянь вал.
Эйсэнзэ – эрзянь зэме, эрзянь смусть, эрзянь прев, эрзянь гайгема.
Ледстневи тень, зярдо васенцеде мария вейке паро-превей эрзянь ломанень кургсто истямо меревксэнть: - «Вай, косо «ОЧКАМ»? Мон сеск мик эзинь чарькодеяк, те мень «очкадо» кевкстни ломанесь? Пек апарсте керинзе пилень те валось. Кевкстия эрзянть: - «Те тон мезде истя кевкстнят? Сельмукшто?. Сон: - Я-а. Нама. Сельмушт. Вай, стувтовсь монень те мазый валось….»
Эрямось моли икелев. Од эрямосонть, нама, кармить эрявомо од эрзянь валт. Ансяк, а эряви тейнемс тенек истя, апак арсе: ТОНАВТЫЦЯНТЬ таркас – шабра раськень вал УЧИТЕЛЬ, ПАНГО валонть таркас – шабра раськень ГРИБА, КОТА валонть таркас – БОТИНКА, ды седе тов… Те – аволь превейстэ. Теньсэ минь ансяк колатано эрзянь келень гайгеманзо.
Паро мельсэ вастыя кулянть, зярдо, окойники, од превей ломантне кундасть эрзянь од валонь теме. Изнявкст тенк, превей эрзят!
Монськак мезе а мезе те тевентень паро путан. Прянь апак шна видькстан: КИРДИВИЙ (власть), КОВКЕРЬКС (календарь), СЕДИДЕЙ (музыкант), РАСЬКЕМАСТОР (республика), ВАСОЛСЕЛЬМУКШТ (бинокль) ды зярыя лия од валтнэнь эсь шкастонзо мон карминь совавтомост неень шкань эрзянь кельс… ВАЛМОРО (стих) валонть арсизе содавикс эрзянь валморонь сёрмадеесь Дима Таганов.
Пильгс-модас сюконян сеть эрзятненень, конат кундасть ванськавтомонзо эрзянь келенть. Васняяк Богданова Ольганень.
Велявттано одс СЕЛЬМУКШ валонтень.
Эйсэнзэ кекшезь кавто валт: СЕЛЬМЕ ды МУКШНОМС. Неть валтнэ киртявсть-вейсэндявсть ды теевсь од мазый эрзянь вал – СЕЛЬМУКШТ! Превеельть седикелень-кезэрень эрзятне. Превейстэ теизь-арсизь СЕЛЬМУКШТ валонть. Вана кодамо паро невтевкс макссть тенек покштянок-сэрдянок од валонь теемасо!
Кеман, те паро невтевксэсь кармавтсы неень шкань эрзятнень седе парсте арсемс – кодамокс улемс неень шкань эрзянь келентень? Эли шукшиявтомс сонзэ шабра раськень келень валтнэсэ, эли терявтомс тейнеме од эрзянь валт? Монь койсэ – терявтомс ды тейнемс од эрзянь валт. Те тевесь неень шкатнестэ пек эрявикс.
Сестэ зярдояк эрзяк кияк а карми кортамо «мордвакс» истяня: «Вопросось, конечна, очин интересной»….
Эрюш Вежай, ацамков, 2015 ие.

Просмотров: 167

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования