Uralistica

2015-тӥ ар пумозь 1967-тӥ арын но солэсь бергес вордскемъёс быгато вал бырйыны: вуоно пенсизы страховой но накопительной яке страховой гинэ луоз.

Пенсиосъя кун фонд ӵектӥз страховойзэ гинэ бырйыны (малы ке шуоно сое со ачиз чакла, арысь аре, инфляциез лыдэ басьтыса, индексировать каре). Нош кун луисьтэм пенсиосъя фондъёс асьсэ доры чортӥзы: милям инвестировать кареммылэн тужгес бадӟым процентмы, вань кун луисьтэм пенсиосъя фондъёс пӧлын вылӥ чурын сылӥськом, ми доры олокӧня миллион мурт накоплениоссэ выжтӥз ни...

Нош кудӥз зэмзэ но умойгес, кудзэ быръёно, пенсиосъя фондъёсын ужзыя герӟаськымтэ муртъёс воксё паймизы, дыр. Соин тросэз номыре ӧз вошты, кельтӥз, кызьы вань. Эшшо югдур валантэм на, малы ке шуоно 2013-тӥ арысен ини пенсилэн накопительной люкетэз «кынтэмын», соин ужсётӥсьёслэн вань страховой взносъёссы страховой пенсие мыно, адямиос накопительнойзэ ке но бырйизы. Но 2013-тӥ арозь люкам накоплениос нокытчы уз ыше, оскыто Пенсиосъя фондын. Соос али но инвестироваться каро но, пенсие потыса, соосыз басьтыны луоз.

Студент дыръям ай огзэ кун луисьтэм пенсиосъя фондэз бырйи вал агентъёс пелям «лапша ошылэмзы» бере. Договор соосын гожтӥ. Нош 2015-тӥ арын тулыс со фондысь гожтэт вуиз, мон, пе, соос дорысь 2013-тӥ арын мукет кун луисьтэм фондэ выжи, малы ке шуоно соин огкыл гожтӥ!

Вот зол! 2013-тӥ арын мон вань «лапшалы» уг ни оскиськы вал, дауре шорысь пӧртэм документъёсы кинюртэмме ӧй пуктылы, нокыӵе договоръёс ӧй гожъя. Воже потӥз ук, асме юатэк, накоплениосме кытчы ке выжтӥллям шуыса, со нуналэ ик жингыртыны малпай кун луисьтэм фондэ, кудӥныз олоку договор гожтыны вуттӥськем. 3 нунал жингыртыны моктӥськи — трубкаез нокин ӧз куты. Воже потыса, сайтазы пыри но ӝожтӥськон кельтӥ. Электрон почтаям гожтэт вуиз, соос 30 нунал ӵоже валэктон ыстозы шуыса. Толэзь ортчиз, 2, 3, ӝыны ар... нош валэктон ӧвӧл но ӧвӧл. Тӥни соку Пенсиосъя кун фондын ӵектӥзы судэ вазиськыны. Бр-р-р! Нырысь кышкыт потӥӟ судъёстӥ ветлэм ӧй вал на но мылкыды но ӧй вал. Но собере вазиськи ук, угось туж ӧз кельшы, договоре, мон интые, асьсэос гожтӥськиллям шуыса. Пусйиллям на Ижын вордӥськемме, но со чик озьы ӧвӧл.

Судэ иск сётыкум, шуизы, 5 нунал ӵоже определение гожтозы но почта пыр келялозы. 5 нунал ортчиз, 10, толэзь... Мыни судэ, юаськи. Соку ик киям повестка сётӥзы, ӧтизы заседание. Ох, малпасько, верало ай та кун луисьтэм фондын ужасьёслы, мар соос сярысь малпасько!

Но суд дорозь уж ӧз вуы. Со нуналъёсы ик жингыртӥз ответчик — пӧяськись кун луисьтэм фондлэн кивалтӥсез. Вераз, со олокӧня пол депутат вал ни, али но вылӥ должносте пуксьыны малпа шуыса, соин ымнырзэ чик саптамез уг поты. Ойдо, пе, ваньзэ судтэк кенешом. Мон пумит вал. Шуисько, мыным кулэ дыръя телефондэс но ӧд кутэ, ӝожтӥськонэлы валэктон но ӧд келялэ, нош табере мон тӥледыз валаны кулэ?!

Олокӧня пол жингыртӥз. Воксё акыльтӥ. Ассэ адӟонтэм но кылонтэм вылысь соглаш кариськи искме судысь басьтыны. Со кылъёсылы ӧз оскы-а мар-а, Ижысь вуыса, сьӧрам судэ мынӥз. Нош отысь потэммы бере куриз заявление гожтыны, мынам кун луисьтэм фондэз вылэ нокыӵе ӝожтӥськонъёсы ӧвӧл шуыса! Эшшо мар ке ӧвӧл-а?! «Татчыозь ми вылэ ӝожтӥськонъёс ӧй вал на, тӥ — нырысетӥез (ма, ваньзэс, монэ кадь, акыльтытӥзы ке, кыӵе ӝожтӥськонъёс луозы?)! Тӥ валалэ, ми - адямиос, машинаос ӧвӧл, ми но быгатӥськом янгышаны (но сураськыса, дыр, мон интые кӧня ке азе гожтӥськыны)! Мар Выль Ар азьын ог-огмылы мылкыдмес быдтом? Фондмы уг кельшы ке, мукетаз потэ, ми думыса ум возиське ук!» - шуэ со мыным.

Нош мон тодӥсько, кысык мукет фондэ потыны малпай ке, берпум аръёсы инвестированилэсь басьтэм вань доходэ ышоз шуыса. Али заявление гожтӥ ке, мукет кун луисьтэм пенсиосъя фондэ монэ 5 ар ортчыса гинэ выжтозы ай. Нош кин тодэ, мар луоз накоплениосыным со дыр ӵоже, отысь ужасьёс, номырлэсь кышкатэк, мон интые кинюртэм пукто ке?

Заявление ӧй гожты. Озьы ик кошкиз. Ма, та понна туж уг сюлмаськы, дыр — тодэ ук, ужасьёсыз мон интые договоре гожтӥськылӥзы ни, мар соослы кыӵе ке заявление эшшо огпол гожтӥськонтэмез?

Просмотров: 127

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Март 21, 2016 в 2:16pm

Оли, эн но вера.

Комментарий от: Oli, Март 21, 2016 в 1:29pm

со пенсиосын калыкез воксё суразы ни. 

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования