Фин-угор калыкъёс люкаськизы Лахтие

Туннэ Финляндиысь Лахти карын усьтиськоз VII дунневыл фин-угор конгресс.

Солэн ужаз пыриськозы фин-угор но самоди калыкъёслэн 24 делегациоссы, та дырлы соос ваньзы Финляндиын ини.

Куинь нунал чоже делегатъёс но наблюдательёс пыриськозы 5 секциослэн ужазы, отын кенешон мыноз фин-угор кылъёс, иворез волмытон, калыклэн кивалтэтэн кусыпъёсыз, экономика но инкуазез утён, демография но миграция процессъёс пумысен. Конгресслэн огъя темаез - "Фин-угор калыкъёс - азинскон пала".

Секциосын огвакытэ радъяськозы мукет тунсыко ужрадъёс но: "Улэп библиотека" но "Усьтэм конгресс" проектъёс, Финляндиысь кунгожсьор ужъёсъя министрен пумиськон, коми делегацилэн возьматонэз.

Пусйыны кулэ, Дунневыл фин-угор конгресс радъяське ньыль арлы одиг пол. Азьвылэз ортчиз 2012-ти арын Венгриысь Шиофок карын.