Uralistica

Степань Эрьзядо мель... / Слово о Степане Эрьзе, великом сыне Эрзя народа. Эрзянь кельсэ./ На языке Эрзя народа.

Степань Эрьзядо мель...

Эрьва раськенть улить ине ломанть, конатнень эряви содамс ды кирдемс сынст кувалма каштанчи.

Эрзя раськенть истят ломанть ламо, сынст ютксо васенце таркатнесэ – Стёпан Эрьзя-весемасторонь содавикс кевень ды чувтонь керсицясь.

140 иеть топодсть чачома чистэнзе, те таланов эрзянтень, ды неень шкас аволь весе эрзятне сонзэ содасызь.

Мезе теезь сонзэ кедьсэ - а ёвтави валсо. Эряви марямс-неемс потмоёжосо. Ванат Эрьзянь кедьсэ теезь кевстэ  ды чувтосто рунготнень лангс ды а кемеви - сынь изнявсть эриця  ломаннень, аволь менельмасторонь эрицянень. Кодамо вечкема Эрьзя макссь ашо кевентень, чувтонтень ды сыньгак тензе максызь эсь вечкемаст ды лавшочист, макссть теемс мартост сень, мезе бажась Эрьзя, теке налксесть карадо-каршо налкшкесэ. Ды те вечкемась неень шкас кадови салавичисэ

 Эрьзя. Мекс Стёпан покштясь саизе истямо омбоце лементь, путозь чевте рукшнанть эрзя валонтень. Арсезеви, истя сон невтизе сехте покш вечкеманзо эсензэ тиринь эрзянь раськентень, панжизе педе пес весе оймензе, сыремтизе, сонзэ сельмсэ неезь, мадиця эрзянь раськенть толпандянть ды кандызе эсензэ кедьсэ сехте верев Эрзянь Масторонь пандонть тёкшонтень, макссь тешкс весе эрзятненень - мон ЭРЗЯ, теке икелев содась «цикань Родэнекс» зярдояк а улян, кадован свал эрзянь ЭРЬЗЯКС.

Кадык одс кирвазтезь Эрьзянь кедьсэ толось палы эрьва эрзянь кудосо ды оймесэ, максы валдочи ды валдо ки эрьва эрзянтень, истя бажась неемс эсь раськензе Эрьзя. Истя улияк. Толпандясь палы неень шкас.

Виктор Кудряшов

*******

2016 иень ожоковонь 27-це чистэнть топодить 140 иеть Степан Эрьзянень. Тень кувалма «Руця» эрзянь Лезэпаргось ютавты эрзянь сёрмадовксонь пелькстамо: «Степан Эрьзя. Мейсэ сонзэ питнезэ эрзянь раськенть туртов?»

Кинь ули мелезэ ледстямс Степан Эрьзянь, ды путомс арнема те ине эрзянь ломанентень, инеськеть, сёрмадынк те кевкстеманть коряс эсь меленк-арсеманк. Аволь кувакасто. Колмо-ниле валрисьместэ саезь конёв лопа ёнксонь видьс, аволь седе покшсто.

Сехте виев сёрмадовксонть кис «Руця» эрзянь Лезэпаргось алты изницянтень а покшке казне – 10 000 целковойть.

Сёрмадовксонк кучинк: erush2002@mail.ru. 01.10.16 видьс.

Просмотров: 109

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования