Uralistica

ПОСПАНГО./ Дождевик. Эрзянь кельсэ. /На языке Эрзя народа.

ПОСПАНГО

(неень шкань эрзянь ёвкске)

Поспанго…Мезе те истямось? Мень панго? Неень шкань эрзятне ламот те валонтькак а содасызь. А эдь кодамо сон мазый! Кода эрзякс гайги! Поспанго… Поспанго…

Валонть ёвтамстонзояк марят поснома. Мезе те посномась? Посномс – те кодамояк варява, варинева, нолдамс кодамояк тюсонь эли чинень кошт. Посны якиця чапаксось, посны чапаськадозь чапамо ловсось, посны вецана рудазось, посны ичемстэ сёвонесь, посны качампаргинесь нешкень-мекшень качамосо сувномсто… Ули малавиксстэ гайгиця лия эрзянь вал: позны… Ансяк неть валтнэ малавикст ды аволь векеть. Познамо ансяк мукорось машты. Лия варинетне весе ансяк посныть. А вана судось – носки. Эйсэнзэяк улить варинеть, конатнева тей-тов лексеви коштось.

 Превеельть минек эрзянь покштятне. Парсте неильть, вадрясто марильть. Секскак ламо валт тейсть эрямо ёнкснэнь невтемга.

Теизь-арсизь васня ПОСНОМС валонть. Мейле ваныть: пиземеде мейле луга нарсонть пангинеть а покшкеть лиснить. Курынень-курынень. Ланга ваномс неявить теке чарокс кевнекс. Ды сынсь чевтинеть. Пиземесь юты, модась коськи. Коськить неть пангинетнеяк. Теевить вишка, теке кедень апак сюлмавт кескавнекс. Потсост тюжт мери челькине. Чалгават ва истямо пангиненть лангс, сон ПОС! – нолды тюжт-пиже челькень качамне. Те сон истя видьминензэ коштканть сравты. Вармась кандсы видьме качамненть ковгак лияв, ванат, тосояк мейле пиземене панго курыне касы…

Те посноманть кис лемдизьгак те пиземе пангиненть эрзятне ПОСПАНГОКС. Кона-кона эрзянь велетнесэ, эрзятне (вечкить ракамкат!) лемдить поспангонть истя: бабань познамо панго, эли овтонь тышик. Зярдо пангинесь апак кенере, лепштямстонзо эйстэнзэ лиси ашо ловсыне, конантень мерить пузни ловсо.

***

Эрюш Вежай, 2016 ие, таштамков.

Просмотров: 33

Эта запись блога закрыта для комментариев

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования