Uralistica

Эрзянь буечешкс. / Эрзянский родовой знак. Эрзянь кельсэ. / На языке Эрзя народа.

Эрзянь буечешкс

(неень шкань эрзянь ёвкске)

Ламодо ламо пингень перть эрьва эрзянь буенть, кудораськеть ульнесь эсензэ буечешксэсэ. Буечешксэнь максомась ды улемась – эрзянь раськень кезэренде кезэрень кой. Буечешксэсь максовиль эрзянь велень промкссо. Ансяк весть. Максовиль атянтень, цёрантень, кона ушодыль-путыль эрзянь од буе. Седе тов буечешксэсь максовиль буень од цёратненень, зярдо сынь касыльть 16-18 иес, зярдо сынь урьвакстыльть ды теильть башка кудораське ды кудо-кардаз. Мейсь эрявиль эрзянь буечешксэсь? Васняяк, эрзянь раськень буень коень-илань ванстомга ды од кирдакстнэнень (поколение) максомга. Буечешксэсь путовиль: кудо коняс, утом лангс, кардос, ортас, вальма лазс, эрямопарьс, нешкес, кильдемкас, нурдс, озокс, крандайс-орабас, сокас, изамос, важодема кедьёнксос, ярсамонь-симемань кедьёнксос, кудо ракшань пилес. Эйсэнзэ тешкстыльть вирень керямо таркатне, тикшень ледема таркатне, паксятне, калонь кундамо таркатне, буентень явозь модатне ды вирьтне. Эрзянь аватне эсь буень чешксэнть викшныльть коня пангос, руцяс, покайс, панарс. Пек мазыйстэ ды неявиксстэ. Викшнезь буечешксэнть коряс эрьва эрзясь содавиль, кинь сон, кодамо велень, кодамо буень. Улема, ульнесть аволь ансяк буечешкст, арсян, ульнесь велень чешксткак. Ансяк теде те шкас кияк эзь арсе ды эзь пурна содамопурнавкст. Куломадо мейле буечешксэсь пачк путовиль калмо лангонь палманьс. Те коесь ванстовсь мик неень шкань 20-це пингес. Ней те коесь састыне ёми. Буечешксэнь ванстомась-путнемась кармась ёмамо советэнь кирдивиень шкастонть, зярдо кармась нельгевеме эрзятнень кедьстэ модась, виресь, паксятне, ракшатне. Буечешксэнь путнемась-кирдемась ульнесь аволь ансяк Эрзя раськенть. Сон ульнесь весе малавикс кельсэ кортыця раськетненьгак. Россия кирдимасторонь раськетне ёмавтыть те кокенть. А вана эсь мельсэ-олясо эриця раськетне мекевланк, пек ванстыть те мазый ды эрявикс коенть. Сеедьстэ ледстнян Sven Lokka ялгам, кона вете иеть теде икеле тусь Тоначив. Сон невтнизе тень эсь буечешксэнзэ: пенька (апак тарга мукорь). Суомитне эсь буечешксэст ней теить мазылгавтозь, стувор лангс путовиця коцткень кондямокс. Эли стенас поводевицякс. Сынь казить буечешксэст эрьва цёрынентень, кона касы цёрань иес: содамокс, коень ванстомакс, эсь буень каштанчикс. Ютасть иеть, зярдо Sven Lokka ёвлесь теде тень. Кунсолынь сонзэ мельспаросо ды саинь мелезэнь. Секскак сынь истямо мельс-арсемас: - «Мекс эрзятненень а вельмевтемс одс эсь буечешксэнь путома-ванстома коенть?» Коесь пек мазый. Эйсэнзэ – раськень вечкема, эсь раськень каштанчи. Секскак арсинь-теинь ды вешинь Алёшин Паолонь, пек паро эрзянь артыдеенть, теемс тень эсь буечешксэнь коцткес артовкс. Эсь буечешксэнть мон парсте содаса эйкакшпингестэ саезь: минек буечешксэсь – ОРТАТ. Сонзэ тень невтизе вишка пингстэ Андрей покштям. Ней мон карман ванстомонзо. Анокстас сонзэ казнекс-ванстомкакс Пичай ды Бажат ласькенстэнь (нуцьканстэнь). Кадык сыньгак ванстсызь ды мейле макссызь эсь цёранстэст. Паряк, лия эрзятнеяк теить эстест истят стувор ланкс путневиця буечешксэнь коцткеть? Сестэ Эрзя раськенек а ёми… *** Эрюш Вежай. 2016 ие, ожоков.

Просмотров: 69

Эта запись блога закрыта для комментариев

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования