Uralistica

Эрико энциклопедилэн эрикез вань, нош азьланез?

Куарусён пумын Ижкарын Урал вики-семинар ортчиз.

Кыӵеесь соос - вики-проектъёс?

Нырысь ик валэкто: вики-семинаръёс, вики-конференциос, вики-пумиськонъёс радъясько «Викимедиа» огазеяськонлэсь проектъёссэ азинтон понна. Кыӵе со проектъёс? Тужгес тодмоез - «Википедия» интернет-энциклопедия. Отысь иворез ми уроклы, параослы дасяськыкумы, учкиськомы, докладъёсы пыртӥськомы. Со сяна «Викимедиа» кылдытӥз «Викигид» - со туж юрттэ, мурт каръёсы но шаеръёсы ветлыку: одӥг интыын вань ивор учкымон интыосъя, отысь потэм тодмо адямиосъя люкамын, куддыр дась маршрутъёс но сётэмын луо. Нокыӵе экскурсовод но кулэ ӧвӧл ни. «Викииворъёс»-ысь трос выльзэ лыдӟыны луэ, соос «Викимедилэсь» гинэ ужзэ уг усьто, мукет пӧртэм ужрадъёс, воштӥськонъёс сярысь но верало. Озьы ик мукет вики-проектъёс луонлык сёто кылысь кылэ берыктыны, кылъёслэсь валатонъёссэс тодыны, тунсыко туспуктэмъёс шедьтыны, фольклорной но литературной текстъёсын тодматскыны...

Вань со проектъёсыз нуэ «Викимедиа» огазеяськон, но отын чиньыен лыдъямон ужасьёсыз, вань мукетъёсыз - пӧртэм кунъёсын но каръёсын улӥсь, пӧртэм ужен вырись, пӧртэм арлыдъем волонтёръёс. Соос ваньзы сюлмасько кылзылэн но культуразылэн азинскемез, соос сярысь иворез мукет калыкъёс доры вуттон сярысь. Валамон, ӟучъёслы та ласянь капчигес - учке ай, кӧня соос! Огазе кариськыса, соос туннэ нуналлы 1 345 980 статья гожтӥллям ни! Удмурт кылын 3 720 статья. Башкиръёс но Википедизэс асьмемын одӥг аре кылдытӥллям, соослэн туннэ нуналлы 36 373 статьязы (со милесьтым 10 поллы трос ук!).

Паймымон, но башкир Википедие тросгес гожъясько пенсионеръёс: азьвыл дышетӥсьёс, тодосчиос, эмъясьёс… Озьы соос ваньмон дырзэс пайдаё ортчыто, визьмогес луо, компьютерен но Интернетэн усто ужаны дышо. Огез википедист сьӧры мукетыз, эшез, лыктэ, гожъясьёслэн лыдзы будэ.

Чошатон вылысь эшшо кӧня ке лыдпусъёс: башкир Википедиын «Башкортостан» кыл 27 235 статьяосын пумиське, нош удмурт статьяосын «Удмуртия» кыл - 1 012 пол. Ачид ке астэ яратӥськод, мукетъёс но ярато, соин ик «Башкортостан» кыл ӟуч Википедиын пумиське 15 742 статьяосын, нош «Удмуртия» кыл - 6 197 статьяосын.

Нош ми асьмеос янгыш, энциклопедимес ум азинтӥське шуыса. Шаермы, ёросъёсмы сярысь гинэ но ум гожъяське. Башкириысь Янаул ёрос сярысь (милемлы со тодмо, отын удмуртъёс но уло шуыса) туннэ нуналлы башкир Википедиын 448 статья. Нош Алнаш ёрос сярысь удмурт Википедиын - 70, Балезино ёрос сярысь - 31 статья.

- Эрзя Википедиын топонимъёсъя трос статьяос гожтыны кутскемын, но пумозязы вуттэмын ӧвӧл, - ивортӥз Москваын улӥсь Даниил Зайцев. – Милям бадӟым шугъяськонмы – ӧжыт эрзя кылэз тодӥсьёс но гожъясьёс.

Ми но вераны быгатӥськом, удмуртъёс ӧжытэн, удмурт Википедиын статьяос трос ӧвӧл шуыса. Но озьы шуэммылэсь статьяослэн лыдзы уз буды, ужпум ачиз уз быры. Соин ик малпаськоно, кызьы та югдурез умой пала воштоно.

Али шаерамы туризм борды басьтӥськизы, та ласянь ик азинтӥськыны луэ. Чебер кунокуаос пуктылӥм, усто программа дасям ке но, куноос дорамы вуозы меда? Нырысь соослы асьмеос сярысь кытысь ке лыдӟоно-тодоно, дыр, ук. Википедия со ӧрын бадӟым луонлыкъёс усьтэ.

Удмурт Википедия - сирота

Россиысь «Викимедиа» огазеяськон юрттэ азинскыны пичи кылъёсын Википедиослы, соос пӧлын - удмуртэз но. Кык ар талэсь азьло удмурт Википедия 10 ар тырмонзэ пусйиз. Соку ик малпамын вал огзэ вики-пумиськонэз Удмуртиын ортчытыны. Кема дасяськимы, туэ гинэ со малпан зэмаз.

Шонерзэ вераса, туннэ нуналлы удмурт Википедия бордын ужась активистъёс ӧвӧл. Энциклопедимы, мукет кылъёсын Википедиосын ӵошатыса, воксё сирота кадь. Ӧвӧл авторъёс, туспуктӥсьёс, берыктӥсьёс... Нош соостэк энциклопедия пӧрмоз шат? Со вакытэ ик асьмеос уно докладъёс, конспектъёс, биографиос дасяськом. Огпол сое лыдӟыса яке оценка басьтыса, кытчы ке тузонӟыны понӥськом. Нош мукет лыдӟисьёслы соос пайда вайыны, юртттыны быгатысалзы шуыса, йырамы но ӧвӧл. Солы луыса удмурт Википедия туж трос ыштэ.

Со сярысь вераськон мынӥз семинарлэн нырысетӥ нуналаз. Соку «Викимедиа РУ» огазеяськонын ужасьёс вуылӥзы Ижысь Дышетонэз азинтонъя институтэ но Удмурт кун университетэ, мадизы проектъёссы но соослэн кулэлыксы сярысь. Нимысьтыз саклык висъямын вал Википедилэн дышетонэн герӟаськемезлы, соослэн юн кусыпъёссылы. Со нуналэ ик вуоно журналистъёс дышетскизы «Викииворъёсы» гожъяськыны, нош вуоно филологъёс удмурт Википедие статьяос берыктӥзы.

Вераны кулэ, тросэз дышетӥсьёс Википедия шоры шудон шоры кадь учко шуыса. Котькин отчы гожъяськыны быгатэ бере, кыӵе энциклопедия со луоз? Нош асьсэос сыӵе арбериос сярысь доклад дасяны косо, кудъёсыз сярысь ивор мукет энциклопедиосы ог 10 ар ортчыса гинэ вуоз ай (вуиз ке). Википедиын ке со туннэ ик вань ини. Соин та энциклопедия туала, азинскись. Но мон соглаш ӧй луысал таиныз но малпанэн: тодосчиос энциклопедиез уг кылдыто ке, со энциклопедия номырлы ярантэм.

- Википедие ивор басьтӥське мукет энциклопедиосысь но литератураысь, кудъёсызлы асьмеос оскиськом, - вераз удмурт Википедиез кылдытӥсь Денис Сахарных. - Но удмурт Википедия пумиське бадӟым шугъяськонэн: тросэз тодос текстъёс но книгаос гожтэмын ӟуч кылын, соин, соосыз статьяын кутон понна, нырысь удмуртэ берыктоно луэ.

Сутом-а башкиръёсыз?

Вераны кулэ, пичи кылъёсын Википедиос ваньзы ик огкадь шуг-секытъёсын пумисько шуыса. Соин радъясько вики-пумиськонъёс. Урал вики-семинар ортчытэмын вал нырысетӥзэ Урал улосэ пырись Википедиослэсь шуг-секытъёссэс сэрттон-пертчон, маин улэмзэс тодон, ог-огенызы кусып юнматон вылысь. Отчы вуылӥзы Удмуртиысь, Башкириысь, Татарстанысь, Марий Элысь, Кировысь, озьы ик Москваысь, Санкт-Петербургысь но Венаысь википедистъёс но тодосчиос.

- Нырысетӥ гожтэмъёс ӟуч Википедие лэсьтэмын вал 2001-тӥ арын Ижкарысен. Озьыен, вераны быгатӥськом, ӵапак Ижын ӟуч Википедилы кутскон сётэмын вал шуыса, - ивортӥз «Викимедиа РУ» огазеяськонлэн директорез Владимир Медейко. – Соин мон туж шумпотӥсько, со дырысен 15 ар ортчыса, Википедиен вырисьёс та городэ люкаськизы шуыса.

Владимир Медейко

Семинар куинь нунал мынӥз. Нырысетӥяз «Викимедиа РУ» огазеяськонысь ужасьёс вуылӥзы Ижысь Дышетонэз азинтонъя институтэ но Удмурт кун университетэ, мадизы проектъёссы но соослэн кулэлыксы, дышетон удысэн герӟаськемзы сярысь.

- Пор Википедие ог 500 статьяез студентъёс гожтӥзы, - ивортӥз пор Википедилэн администраторез Вадим Протасов. – Дышетӥсьёссы но, тодос кивалтӥсьёссы но милемлы со понна тау каризы, угось, Википедие гожъяськыса, дышоно статьяосыз ӟеч оформлять карыны, источникъёсын ужаны.

Со нуналэ ик вуоно журналистъёс дышетскизы «Викииворъёсы» гожъяськыны, нош вуоно филологъёс удмурт Википедие статьяос берыктӥзы.

Бӧрысь кык нуналзэ тунсыко кенешонъёс, котрес ӝӧкъёс радъямын вал, чузъяськизы пӧртэм докладъёс. Семинаре пыриськисьёс трос выльзэ тодӥзы мукет кылъёсын Википедиос, Creative commons лицензия, финн-угор кылъёсъя электрон кыллюкамъёсты но учебникъёсты лэсьтон сярысь.

Вики-ужрадъёс дыръя ӵемысь ортчо вики-экскурсиос. Удмуртъёс кунооссэс М.Т. Калашников нимо но «Лудорвай» музейёсы нулдӥзы. Маин пайдаё луо таӵе экскурсиос? Википедистъёс, кытчы гинэ уг вуыло, асьсэлы вуоно статьяоссылы материал люкало, туспуктэмъёс лэсьто. Тани та ужрад бере но ӟуч но башкир Википедиосын Ижкар но «Лудорвай» сярысь выль статьяос кылдӥзы ни.

Удмурт википедистъёс

Нош удмуртэз Википедия кӧня ке гинэ статьялы йылӥз. Со понна малпаськомы азьланяз вожвылъяськон ортчытыны. Но со югдурез тупатоз меда? Башкир Википедиысь «эксэй» Рустэм Нурыев удмуртъёслы таӵе дэмланъёс кельтӥз:

- тыршоно, толэзяз 10 мурт 10 тупатонлэсь ӧжыт медаз лэсьты шуыса,

- соос пӧлысь витез 100 тупатонлэсь ӧжыт медаз лэсьты,

- элькун газет-журналъёсы википедистъёслэн ужзы сярысь ялан гожъяно,

- Удмурт Википедилэсь валтӥсь бамзэ выльдоно,

- мукетъёслэсь вырӟемзэс возьмано ӧвӧл, аслыд кутсконо, пример возьматоно.

Рустэм Нурыев

Озьы гинэ удмуртъёс башкиръёсыз кутозы, пе. Озьыен, уж ваньмызлы тырмоз. Кин дась басьтӥськыны, ассэ статьяос гожъянын яке берыктонын эскерыны?

Туспуктэмъёсыз Мария Галеевалэн

Просмотров: 60

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования