Uralistica

ЭРЗЯНЬ ТЕНСТЬ

(неень шкань эрзянь ёвкске)

 

   Телесь сась! Исяк ульнесь сёксень чопода-потмура чи. Веть пувазевсь чивалгома ёндо кельме варма. Менелесь оложавсь раужо-сэнь пельсэ. Вачкодсь буря. Вень перть вармась увнось-ирнэсь кудо конятнесэ, утом прятнесэ, вешксь пирявксонь трокскетнесэ-ологатнесэ, кельмевтезь чувтонь тарадтнэсэ… Ловсо ёртнесь менельстэнть, кандсь ловонть кельмевтезь моданть велькска, каворьксэв китнень велькска, вельтясь начко ловсонть пиретнень, паксятнень, китнень, виртнень-васолкстнэнь.

Валскес канды бурясь оймась. Ашолгадсь. Менелесь ванькськадсь. Чизэ невтизе чама паензэ Покш пандонть томбальде ды сырнень чи валдосо валдомтызе сельмень кери ашо перть пельксэнть. Кодамо ваньксчи масторонтень Вере Пазозь  казсь! Весе ашо, весе валдо, весе – ванькс! Коштось экше-шожда! Од эрзянь телесь азорокс арась Эрзянь Масторонть велькссэс. Сон - ней перть пелькссэнтень азор тундонь видьс!

   Шумбра чи, эрзянь теле! Шумбрасто пачкодемат-самот марто! Кецявт эрзянь раськенть эсь самосот, эсь ванькс якшамосот, ашо ловсот. Кадык кизэсь ульнесь пек паро. Эрзятне ялатеке пек тошнакадсть, теле,  кисэть! Тошнакадсть телень читнень кисэ, цят якшамотнень кисэ, нурдсо ардтнематнень кисэ, салазкесэ кирякстнематнень кисэ, сокссо яксема-чийнематнень кисэ…

Эрзятне таргизь утомстост, кудопотмарстост кендень кемест. Улить сынь пандозь, улить – одт. Улить ашот, улить раужот, улить човат, улить эчкть. Седе паро карсемкат тельня а муят! Цёратне келей, чувтонь, коймсэ урядыть кудыкелькс икелькстнэнь. Теить ютамо янт кардтнэс, утомтнес, мацтнэс. Цёрынетне тенст лездыцят.

   Вана мезе а стувтомс таргамс эрьва эрзянь кудосонть ней. Эрьва эрзянь кудосонть ней кудыкеле, эли кузтимпесэ эряви тенсть. Удалць кудос совамодо икеле, кузтимпесэ ашти тенсть. Совамодо икеле эрзятне васня весе тенсесызь кендекемест теньстсэ.

  Кодамо сон ульнесь, эрзянь тенстесь? Сон теезель сеньстэ, мезесь эрзянь веленть перькава касы: цилигасто, эрьбань илёвсто, пекшень тарадкестэ, килеень тарадкестэ, нартемксстэ. Сеньстэ, мезень тарадкетне-цёкинетне седе кувать цидярдыть, ды а синтревить. Эрьва кудосонть тенстесь эряви. Парсте теньсесыть кендекемтнень, сестэ сынь кудосо а начкить ловонть соламсто. Васня тенсевить пильге прятне, мейле – пильге бокатне, мейле – кочкарятне. Ней весе. Совак кудос, эрзя! Совак лембес. Эжнек.

Эрзянь тенстесь теть маштовсь.

***

Эрюш Вежай. 2016 ие, ацамков.

Просмотров: 13

Эта запись блога закрыта для комментариев

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования