Uralistica

Иворъёс сярысь. Кин соосты азьланяз волмытоз?

Потозы на-а газетъёс, коня ке ар ортчыса? Нош телевизорез учкисьёс луозы на-а? Иворез портэм сямен волмытон, сое азинтон сярысь "Таврида" форумын вераськизы кунысьтымы тодмо журналистъёс.

Газетъёс бырозы шуыса, ог дасо аръёс талэсь азьло но вераськизы ни. Соку котькудизлэн телефонэз, компьютерез кылдиз уго. Тросэз зымизы Интернетэ, ивор отысь утчаны кутскизы. Со улонмес трос поллы каньылгес кариз: кыти ке ветлытозь, юанъёслы валэктонъёс, возад кылдись югдурез тодыны луиз ини, коня ке кнопкае зибылыса гинэ. 

- Ми 10 ар пала газетъёсыз ватиськом ини, нош соос ялан оз на ватиське, - шуэ "Россия-24" каналлэн валтись редакторез Евгений Бекасов. 

Е. Бекасов, О. Носова, А. Сулейманов

- Мон газетэз киям ой кутылы, дыр... ноку, - серекъя Sputnik но RT каналъёслэн валтись редакторзы Маргарита Симоньян. - Мон лыдзисько мер вотэсъёсты, асьме иворъёсмес но иворъёссэс конкурентъёёсмылэсь. Интернетын 100 пала ивор волмытисьёслы гожтиськемын. Но вераме потэ тани мае: мон туннэ лыкти "Тавридае" чебер машинаен. Сюрес вылти милемын огвакытэ ширтизы трос портэм мукет машинаос, автобусъёс но... уробоен вал. Транспорт азинске, озьы ке но валъёсын ветлисьёс но быремын овол. Ноку номыр номыре пумозяз воштыны уг быгаты.

М. Симоньян

- Нош мон малпасько, газетъёс воксё уз кыле, - шуэ "News Media" медиахолдинглэн редакционной директорезлэн нырысети воштисез. - Ма, мар газет гинэ, сайтъёсыз но лыдземысь дугдозы. Али но калык шергес но шергес вотэс бамъёсы пыра ни. Малы отчы пыралод, иворез лыдзыны луэ ке мер вотэсъёсысь? Сайтъёс интые калык тросгес лыдзе ни блогъёсты. Блогер - со уж, оло, трудовой книжкае но сое пыртозы. милемлы соосын яке эшъяськоно, яке чошатсконо.

- Мон соглаш овол, газетэз лыдзисьёс уз кыле ни шуыса, - вера "Комсомольская правда" газетлэн редакторезлэн воштисез Олеся Носова. - Ми рекламалы луыса улиськом, быдэсак асьмеос чотын. Газетэз лыдзисьёс оз луысалзы ке, реклама сётисьёс но оз луысалзы. Нош милям тиражмы арысь аре будэ. Бен, мар веранэз ини, лыдзисьёслэн куронъёссы воштисько шуыса, ми соосъя кариськиськом.

О. Носова

-Соиз зэм, - итиське Анатолий Сулейманов. - Калыклы тунсыко ке лыдзыны О. Бузовалэн сюанэз сярысь, малы ми со сярысь ум ивортэ? Нялтас вераса, Бузовалэсь Инстаграмзэ учке 10 миллионлэсь уно мурт. Кин эшшо сомында лыдзисьёсыныз ушъяськыны быгатэ на? Туж ожытэз! Тунсыко ой луысал ке, гожтиськисьёсыз но ой луысалзы. Ми быгатысалмы рос-прос, "визьмо" иворъёс гинэ лэсьтыны, но куро бере огшоры иворъёсты но, сооссэ но дасяськом.

А. Сулейманов

- Озьы ке но аудитория сьоры гинэ мыныны уг луы, - шуэ Евгений Бекасов.- Бузова но кочышъёс сярысь иворъёс полы политика, экономика сярысь но пыртано. 

- Ми иворъёсмес лыдзон пумысен 3 бадзым рейтингъёс дасяськом: тужгес трос пыранъёсъя, тужгес кема лыдземъя но коня ке пол одиг иворез учконъя, - шуэ Ольга Носова. - Тунсыко, но куиняз ик рейтингын выли чуре одиг ивор уг поты! Нырысетияз вормо Бузовалэн улонысьтыз выллем иворъёс, кыкетияз - политика но экономика удысъёсысь, куинетияз - портэм статистика. Но вератэк уг луы тазэ но: азьвыл лыдзисьёслы тырмыт вал текст, нош табере соос возьмало ни видео трансляция, субтитръёсын видео. Та курон тужгес зол шодиськиз туэ.

- Кузь, малпаськытись ивор - улэп арбери овол ни, - шуэ Маргарита Симоньян. - Тунсыкогес но капчигес лыдзыны вакчиоссэ. Но лыдзисьёс ожытгес но ожытгес оско иворъёслы, - шуэ Маргарита Симоньян. - Азьвыл поколение кинэ ке оскытон вылысь шуоз вал: мон со сярысь лыдзи газетысь! Али поколенилы озьы шуизы ке, ми вазём: ну и мар? Нош вуоноезлы поколенилы газетысь ивор лыдземзы сярысь веразы ке, со поколение юалоз ни: кы-ы-ытысь?! Малы иворъёслы оскон быре? Одигез муг - соослэсь шонерзэс эскерыны дыр овол, соин пояськонъёс но луо. Кылсярысь, туэ волмиз ивор Светлана Алексиевичлэн кулэмез сярысь. Кыче ке супыльтисьёслэсь оз волмы - со сярысь Твиттерысь бамаз гожтиз Францилэн культурая министрез. Вань СМИ-ос иворез гожтизы, нош собере ваньщы чушылизы. Эскерысалзы ке, шонер-а со ивор, трос дыр ортчысал: герзаськоно вал министрен, со жог гинэ валэктон оз ыстысал. Со дыр чоже ивор вужмысал. Профессионалъёс озьы уг ужало.

- Ивор дасякуды, ти сое яратыса лэсьтыны кулэ, сюлэмдэс поныса. Зеч-а со, урод-а - ти бордысь потэ, кызьы со шоры учкоз калык, кызьы со учкоз газеттыя каналды шоры, - шуэ Евгений Бекасов. - Соин мон курисько тиледыз палэнтиськыны малпанлэсь, газетъёс яке сайтъёс жоген бырозы шуыса. Эн малпаське со сярысь, зеч лэсьтэ уждэс. Улонын портэм сямен луыны быгатэ, улонэз лэсьтиськом ми асьмеос.

Туспуктиз Илья Ишмуратов.

Просмотров: 50

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования