Uralistica

АСЬМЕОС #9: Елена Никитина, "Удмурт Дуннеысь" газетчи

"Асьмеос" нимо рубрикамы ивортэ тӥледлы тунсыко фин-угор егитъёс сярысь. 9-тӥ поттонмылэн героез - Лена Никитина. Со журналист луыса шор удмурт газетын ужа. Лена  милемлы удмурт политико журналистикалэн кылдэмез  но туала удмурт лулчеберетысь трендъёс  сярысь мачкиз.

Кыӵе инэтын али удмурт журналистика? Мар берпуметӥ аръёсы воштӥськиз?
- Удмурт журналистика та вакытэ егитъёс пала берытскыны кутскиз ни, шуыны луоз. Кылсярысь, тани «Мынам Удмуртие» телекомпаниысь егит журналистъёс басьтӥськизы «Мон егит!» передачаез пуктон борды. Удмуртъёслэн валтӥсь газетсы но (нялтас вераса, туэ со пусйиз кылдэмез дырысен 96 арес тырмонзэ) егитомиз, шуыны луоз. «Удмурт дуннелэн» бурд улаз толэзьлы огпол потыны кутскиз егитъёслы сӥзем «Дарт» (возьматэ «азарт, вдохновение» шуэмез) приложение. Пусйыны кулэ: отчы гожъясько егитъёс - шараяло асьсэлэсь мылкыдъёссэс, малпанъёссэс, быдэс удмурт дуннелы возьмато туспуктэмъёссэс. Малпасько, «Дарт» приложение, озьы ик «Мон егит!» передача выллем проектъёс удмурт кыллэсь данзэ ӵапак егитъёс пӧлын ӝуто. Вылаз ик, соослы тупась но кельшись амалъёсын.

 

Ку удмурт вотэс-журналистика кылдоз ини?
- Малпасько, со чик ӧвӧл шуыны уз луы. Кылсярысь, тани «Удмурт дунне» газетын потӥсь иворъёсты, материалъёсты шедьтыны луэ ни Интернетысь - газетмылэн сайтысьтыз (udmdunne.ru). Но радио, телевидение сярысь ке верано, удмурт передачаосты Инетысь быдэсак шедьтыны уг луы - куд-ог сюжетъёсты, радиоверанъёсты ке шат. Удмурт интернет-журналистикалэсь кылдонзэ, малпасько, кема возьмано уз луы.

Кинлэсь удмурт журналистикаын Тон адӟем кариськод?

- Мыным кельше Иван Лебедевлэн («Удмурт дунне» газетлэн редакторезлэн азьвыл воштӥсез, али «Удмуртская правда» газетлэн редакторезлэн воштӥсез) удмурт кылын гожъяськон стилез. Со малпанъёссэ лулъяны быгатэ. Материалзэ лыдӟыса, малпан кылдэ: тон соин улэпкын вераськид-кенешид шуыса - сокем лякыт гожтэмын. Со сяна, аслам гожтэмелы йыръян сётонын, солы йылпумъян малпанын адӟем карисько редактормылэсь Зинаида Вахрушевалэсь. Та ласянь шӧдонэз солэн бадӟым но ушъямон.

Кызьы-о суоми-угыр газетчиослэн валчеужанзы радъямын? Мае быдэстыны пишме?
- Мон малпамъя, фин-угор выжыысь журналистъёсын кусып возён, мон понна, нырысь ик пыкъяськыны кулэ пайдаё проектъёсты улонэ пыӵатон вылэ. Угось удмурт журналистъёслэн но, мукет улосъёсысь фин-угор СМИ-ослэн но сюлэмшугъяськытӥсь ужпумъёссы огкадесьгес: кызьы утёно кылэз, кыӵе амалъёсын ӝутоно анай кылынызы лыдӟиськисьёслэсь (TV учкисьёслэсь, радио кылзӥсьёслэсь но) лыдзэс.

Мар со фин-угор дунне тон понна?

- Фин-угор дунне мон понна тунсыколэсь но тунсыко дунне. Шумпотымон, асьмеос ог-огенымы кусыпъёсмес ум ыштӥське шуыса, пыриськиськом пӧртэм ужрадъёсы, ог-огмес куное ӧтчаськомы. Таӵе эшъяськонмес синйылтӥзы ни, лэся, мукет выжыысь калыкъёс но. Соин но, лэся, туала вакытэ паймонэз ӧвӧл ни, шуом, удмурт кылэз дышетыны мылкыд карись немецъёслы, итальянецъёслы но мукетъёсызлы. Эшшо но умойгес луысал, фин-угор дунне борды егитъёсты ке кыскысалмы. Соослы сӥзем нимаз газет, оло нош Интернет-журнал потысал ке, туж ушъямон луысал. Отчы гожъяськысалзы быдэс фин-угор дуннеысь егитъёс.


Кыӵе суоми-угыр кылъёсты тон дышетысал но малы?
- Луонлык ке кылдысал, вань кылъёсты дышетысал, дыр. Поръёс, комиос вӧзамы уло бере, соослэсь кылзэс пичи-пичи валаны дышетскиськод ик ай. Мукет ужпум, шуом, саамъёслэн кылзы ласянь - соос Удмурт шаерлэсь кыдёкын. Вылаз ик, саам кыллы дышетӥсез но вӧзысьтыд уд шедьты ай. Та ласянь юрттысал, дыр, Интернет. Но улэп вераськонтэк кылэз дышетэмед огпалдуро луоз. Синмаськыса учкисько «Узы-боры» киноез пуктэм поляк режиссёр Петыр Палган шоры: макем вольыт вераське со удмурт кылын! Фин-угор выжыысь но ӧвӧл ук ай со, нош куд-ог удмуртъёслэсь чебергес лабыртэ! Сое бен нокин но кужмысь ӧз косы ук удмурт кылэз дышетыны! Ваньзэ лэсьтӥз ас мылкыд каремезъя. Но со Европаысь адями, отын улӥсьёслэсь виразы пыӵамын трос пӧртэм кылъёсты ас мылкыдыдъя дышетон. Малпасько, та туж ушъямон. Асмье дорын улӥсьёслы но, оло, куке-соку сыӵе валан пыӵалоз…

Кыӵе тужгес но тунсыко учыръёс но трендъёс алиала удмурт лулчеберетын вань?
- Туала удмурт культурае кӧня ке ар талэсь азьло выль шӧм пыртӥз егит продюсер Павел Поздеев. Солэн кичӧлтэмез улсын ортчылӥзы но али но ортчыло пӧртэм тунсыко проектъёс. Кылсярысь, Ижысь «Авиатор» клубын ортчись ӝытъёс. Али Поздеевез, оло, пыкылӥсьёс но сюрозы, малы весь огкадь шулдыръяськонэз, одӥг интыын люкаськонэз. Но мон малпамъя, солэн кичӧлтэмезъя ортчем ужрадъёс-проектъёс дырлэн куронэзлы туж тупазы: удмурт гуртъёсысь вуэм егитъёс шоркарын огазеяськыны быгатӥзы, огшоры тапыртэм интые, тунсыко ужрадъёсы пыриськыны кутскизы. Но тужгес но кулэез - асваланзы, асьсэды дунъян мылкыдзы будӥз. Эшшо огпол пусйисько: соос будӥзы. Табере дыр вуиз асьсэ сярысь мукетъёсызлы ивортыны, огъя дунне мылкыдэ-ӧре пырыны. Маин пӧртэмесь асьмеос быдэс дуннелы тодмо луэм финнъёслэсь: удмурт егитъёс но, шуом, синмаськымон шудозы рок.



Ку удмурт уж но политико журналистикалэсь кылдэмзэ витёно?
- Политикая но деловой журналистикалэсь ку кылдэмзэ вераны, малпасько, капчи ӧвӧл. Солэн кылдэмез-азинскемез, малпасько, герӟаськемын калыклэн кулэяськонъёсыныз.

Яратоно лыдӟонэз

Интернет-сайтъёс сярысь ке верано… Нунал куспын кыч:е гинэ сайтъёсы пырано уг луиськы! Ваньзэ уд но вера! Ужакум, мынам одно ик усьтэмын луэ «ВКонтакте» (таиз соц. сеть пыр но ивор утчан уже радъяське), Яндекс, Википедия, Лента но интыысь (Ижысь) иворъёсъя сайтъёс.

Лыдӟыны кутски "Метро" сериысь книгаосты (проектлэн авторез Д. Глуховский). Алигес лыдӟи англи классиклэсь Дж. Брейнлэсь "Путь наверх" книгазэ. Уг вунэтӥськы классика сярысь. Туж кельшо вакчи веросъёс. Кылсярысь, И. Бунинлэн, А. Купринлэн, А. Пушкинлэн. Кельше аудиокнига амал: произведениез но кылзӥськод, эшшо кыӵе ке киужен (шуом, дӥсь вуронэн) выриськод на. Кызьы шуо, кык лудкечез кутӥськод.
Специализированной сайтъёс сярысь ке верано, нимысьтыз одӥгзэ гинэ уг учкылӥськы. Куке экономикалы сӥзем сайтъёсын бугыръяськисько, куке культуралы чакламъёсаз. Пӧртэм сямен луэ...

Яратоно крезьгурез

А кырӟанъёс сярысь ке, яратоноосыз мынам трос. Кылсярысь:
- "Мон бакчаям мертто тӧдьы льомпу..."
- "Ой, тӥ чебер нылъёс!"
- "Зарни зундэсъёс" (быдэстэ А. Катков);
- "Мемие но, дядие но" (быдэстэ Н. Уткина, кылъёсыз Э. Батуевлэн);
- "Мон кошкисько..." (быдэстэ Н.Уткина, кылъёсыз П. Захаровлэн)
- "Шедьтӥ-а мон мужик" (быдэстэ Н. Уткина);
- "Берытскы" (быдэстэ Н. Чушъялова);
-  "Синъёстэ эн ват пумиськыкум" (быдэстэ А. Катков);
- "Ой, тӧл, тӧла..." (калык кырӟан).

Материал дасямын 2011 аре.

Просмотров: 1049

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования