Uralistica

Вуоноез — умой вунэтэм вашкалаез

"Уралистика" Андрей Болтачев удмурт программистэн вераськиз. Али со "Коми Элькунысь кун служба но кивалтон академи бордын кылдытэм Финн-угор кылъёслэн кутӥськемзы ласянь ивор вӧлмытонъя улоскуспо лаборатори"-ын практиказэ ортче. Вуж текстъёсты туала компьютеръёсы пыртыса, Андрей выль кыллюкамъёс лэсьтон бордын тырше. Солэн юрттэменыз вотэсын удмурт-ӟуч электрон кыллюкам кылдӥз ни. 

 


- Андрей, мон тодэмъя, тон али ужаськод Сыктывкарын. Кызьы отчы сюрид но маин выриськод?

Бен, мон али Сыктывкарын. Ужасько лабораториын. Ӟуч-удмурт яке ӟуч-коми переводчик лэсьтэме потэ. Куартолэзьысен ик малпасько ни вал татчы кариськыны, малы ке шуоно татын ужа аспӧртэмлыко лаборатория. Юаськи Чемышев Андрейлэсь, яра-а, уг-а мыным практикаме доразы ортчыны,но мар со понна кулэ луоз. Тӥни озьы 25-тӥ инвожое мынам практикае кутскиз. Кӧснуналъёсы но арнянуналъёсы мон гуртам бертасько, нош мукет нуналъёсы татын ужасько.

- Иське, тынад отын практика? Со кызьы ке дышетсконэныд герӟаськемын, шонер-а мон валасько?
Бен. Таиз практикае — диплом ужме йылаз-пумаз вуттон азьын практика. Али практикалэн 1-тӥ ӝыныез, нош толалтэ 2-тӥ люкетэз луоз. Та практикаме ортчем бере, диплом ужелы ним быръёно луоз ни. Мон кемалась малпасько ни вал дипломме компьютер лингвистикаен герӟаны, нош татын кылдӥз сыӵе бадӟым луонлык. Диплом уже понна вал на мукет малпанъёсы — веб-технологиос, микропроцессор системаос, но али тӥни татчы практикае сюри бере — уг пегӟы ни.

 

- Нош кызьы тон вазиськид Сыктывкарысь лабораторияын ужасьёслы? Соос тонэ капчиен бордазы кутӥзы? Кинэн ӵош отын ужаськод?

Лабораториын мон сяна ужало Андрей Чемышев (Йошкар-Олаысь программист), Ӧньӧ Лав (Перм шаерысь тодмо филолог, коми-перм кылъя специалист) но кивалтӥсьмы — Марина Федина (но со али отпуске кошкиз). Нимаз пусйыны кулэ, милям лабораториямы "Коми Элькунысь кун служба но кивалтон академи бордын кылдытэм Финн-угор кылъёслэн кутӥськемзы ласянь ивор вӧлмытонъя улоскуспо лаборатори (ӟ. Лаборатория информационной поддержки функционирования финно-угорских языков при Коми республиканской академии государственной службы и управления) нимаське. Практикаме татын ортчыны луонлык сярысь Андрей Чемышев академилэн ректорезлэсь, Нина Александровна Нестеровалэсь, юаз. Со ачиз коми, азьло нош МАФУН ассоциацилэн кивалтӥсез вал. Лабораториын мон сяна луыло мукет студентъёс, но шер. Соослэн практиказы куарусён толэзе гинэ кутске. Лабораториысь ӧнерчиосын ӵош туж умой ужаськом, малы ке шуоно ваньмынызы мон тодмо ни вал.

- "Лаборатория" кыл ас понназ туж аспӧртэмлыко, сое кылыку, тодэ лыкто пудо-животъёсын экспериментъёс яке химической арбериосын вырон, нош тӥляд кызьы ваньмыз отын радъямын но лэсьтэмын? Кыӵегес лабораториды?

Али ми ужаськом печатья коркаын, татын ик интыяськемын газетъёслэн редакциоссы. Школаын дышетскыкум, "лаборатория" кыл сярысь мон но озьы ик малпасько вал. Но, университетэ компьютер специальносте пырыкум, пырак валай — лаборатория — со сыӵе инты, кытын мар ке выльзэ лэсьто яке тодмотэмзэ эскеро. Соин ӵемысь отын вань компьютер ӝӧкъёс но пуконъёс, тужгес но аспӧртэмлыкоез арбери — сервер шкаф. Таӵе лаборатория котькуд туала адямилэн комнатаяз луыны быгатэ, кытын вань компьютер но вотэс. Милям ӵош ужмы емыш но вае ни — Андрей Чемышевен ми ужаськом электрон удмурт-ӟуч кыллюкам бордын, нош Ӧньӧ Лавен — коми кыллы морфоанализатор бордын, кудӥз коми-ӟуч автомат переводчиклэн дӥнез луоз. Милям бадӟым проектмы но вань — коми кыллы корпусэз лэсьтон. Ӧньӧ Лав та "процессэн"кивалтэ, нош мон но мукет студентъёс пӧртэм амалъёсын солы юрттӥськом. мон корпус люканы юрттӥсь компьютер программаос гожтӥсько, нош мукетъёсыз вуж книгаосысь текстъёсты компьютере печатлало.

- Туж тунсыко ужаськоды! Нош азьланяз кыӵе малпанъёсты? Тон та уждэ азьланьтод-а? Мукет адямиосты бордады уд кыскиське-а?

Лаборатория сярысь ке верано, азльаньын трос малпан вань. Лаборатория дась мукет улосъёсысь та ик проблематика бордын ужась огазаяськонъёсын но адямиосын ужаны, соин ик со улоскуспо (межрегиональной) нимаське но. Мынам но туж потэ та ужме азьланьтэме. Мон нош ик вуо Сыктывкаре толалтэ, куке практикаелэн 2-тӥ люкетэз кутскоз. Куарусёнэ практиказэс ортчозы Сыктывкарлэн университетъёсысьтыз мукет студентъёс, соос, нырысь ик, юрттозы корпусъя уж лэсьтыны. куд-огъёсыз, мынам малпамея, та практикаез ортчыса, мон кадь диплом ужъёссэс но гожтозы.

- Нош али дырлы маин тон ушъяськыны быгатӥськод? Мар лэсьтӥд ни?

Нырысь ик, Молодцовлэн вуж коми алфавитэзлы FineReader текстъёсты лыдӟись программалы инъет лэсьтӥ. Со туж кулэ луись вуж (1920-тӥ аръёсысь) книгаосысь текстъёсты компьютере пыртон понна. Со сяна, Андреен ӵош лэсьтэм удмурт-ӟуч электрон кыллюкаммы ӝоген быдэсмоз, али солэн тестовой версиезлы эскерон мынэ.

- Нош компьютере вуж текстъёсты пыртыса, мар соин берло кариськоды? Кызьы со ужады юрттэ?

Калыклэн верамзыя, вуоноез — умой вунэтэм вашкалаез.Та текстъёс но ваньмыз коми кылъя статистика, выль кылъёсты малпаллян понна кулэ луо. Малы ке шуоно, та дырысь коми кыл туж паськыт вӧлмемын вал, солэн, вераны луэ, «зарни дырыз» вал. Соку трос выль кылъёс кылдытӥськизы.

- Кема на отын практикаед кыстӥськоз? Нуналаз кӧня час ужаськоды? Кин чакла лэсьтэм уждэс, кинэн кенешиськоды?

Лыктэмысьтым чик уг жаляськы. Каллен коми кылэз дышетӥсько. Практикае кыстӥськоз 5 гудырикошконозь, быдэсак — 6 арня. Нуналаз ми ужаськом 7 час, 9-ысен 17-озь, (1 часъем обедлы вис). Вань компьюьтеръёс вылесь, ваньмызлэсь тросгес пуктэмын Linux операцонной система. Уж бере дорам уг ужаськы, малы ке шуоно, со — урод сям. Ужме Андрей но Ӧньӧ Лав чаклало, нош куддыр ачим но эксперт луылӥсько, мар ке компьютерен герӟаськемез сярысь юало ке.

- Нош Удмуртие вуыса, татын сыӵе ик лаборатория усьтэмед уг поты-а? Сыӵе ик уж радъясалыд, удмуртъёсты кыскысалыд? Яке удмуртъёс асьсэос Сыктывкаре мед вуозы-а?

Ачим лаборатория усьтон сярысь уг малпаськы, вазь на мыным сыӵеез сярысь малпаськыны. Но туж шумпотысал, Удмуртиын сыӵе ик лаборатория усьтӥськысал ке. Но со понна, оло, кивалтэтысь адямиослэн косэмзы кулэ. Али Коми элькунын коми кылзэс туж зол азинтыны малпамын. Кивалтэтлэн косэмезъя, 1-тӥ куарусёнысен сое элькунысь котькуд дышетскисьлы 1-тӥ классысен дышетыны кулэ.

- Малпаськод, со умой малпан? Удмуртие но со катэз кутӥзы ке, удмурт кылэз тодӥсьёс йылозы? Пумит луисьёс уз сюре-а?

Малпасько, пумит луисьёс одно ик сюрозы. Но кыл медаз быры шуыса, та катэз Удмуртиын но кутоно вал. Валамон, кылэз дышетон ваньзылы капчиен уг сётӥськы, но со понна кулэ выль рос-прос дышетон программаос.

- Сыктывкарын тон быдэсак ужад выемын кадь, ялан коми кыл гинэ йырад улэ, дыр. Нош коми лулчеберетэн тодматскыны вуиськод-а?

Уж бордын тросгес пукисько, но шумпотыса ветлысал на комиослэн паськыт музъемтӥзы. Али со луонлык ӧвӧл на. 5-тӥ инвожое Сыктывкарын ортчем конференция бере, коми лулчеберетъя центрын милемыз шумпоттӥзы шулдыр коми коми кырӟанъёсын, эктонъёсын. Туж шулдыр вал. Но аслам уже коми кылынгес герӟаськемын, соин йырын ялан уж.

- Комиослэн кылзы ласянь югдур удмуртъёслэн кадьгес яке пырак мукет? 

Кыл ситуация Коми Элькунын мыным таӵе ик потӥз, но пусйи гинэ, коми кылын выль кулэ луись удысъёслы терминъёс малпало но улонэ пыӵато. Коми кылын вераськись адямиос ульчаосын ӧжыт. Ужало коми огазеяськонъёс, но соос, валамон, юри лэсьтэмын. Малпасько, коми кылэз школаосын дышетскыны кутскемен югдур умой пала берытскоз.

Вераськиз Лукерья Шихова

Просмотров: 372

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Shkljaev Aleksej, Июль 25, 2012 в 6:00am


- Нош компьютере вуж текстъёсты пыртыса, мар соин берло кариськоды? Кызьы со ужады юрттэ?


Калыклэн верамзыя, вуоноез — умой вунэтэм вашкалаез.Та текстъёс но ваньмыз коми кылъя статистика, выль кылъёсты малпаллян понна кулэ луо. Малы ке шуоно, та дырысь коми кыл туж паськыт вӧлмемын вал, солэн, вераны луэ, «зарни дырыз» вал. Соку трос выль кылъёс кылдытӥськизы.

Комментарий от: Niimshur, Июль 22, 2012 в 1:02pm

kun varnan; varany – as eriktek ugosj

Комментарий от: Ortem, Июль 22, 2012 в 12:30am

кун служба - кун варан, кун ужан - озьы шуысал

Комментарий от: Ortem, Июль 22, 2012 в 12:30am

ӧй вала, малы вуоноез - со вунэтэм вашкалаез мар ке

компьютер технологиос Герд дыръя чик ӧй вал уга!

Комментарий от: Ortem, Июль 20, 2012 в 9:25pm

туж шумпотисько, Онди ас калыкез сярысь уг вунэты шуыса. удмуртлыклы юрттэмез потэ шуыса. мед ассэ удмуртгес шøдоз)

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования