Uralistica

Пенза ёнкссо панжозь эрзямокшонь раськень-культурань автономия

Якшамковонь 25-це чистэ Пенза ёнксонь Малосердобинской районсо Старое Славкино велесэнть ютась промкс, косо ваннозель эрзямокшонь раськень-культурань автономиянь теемадонзо-чачомадонзо кевкстемась. Вастомась пурнынзе Малосердобинской райононь Старое Славкино ды Новое Дёмкино велетнень эрицятнень. Промкссонть кочказель тевень ветицянь правлениясь, козонь совасть вете ломанть: С.В. Бабурина, Л.И. Литяева, Е.П. Святкина, В.А. Петкилев, Л.А. Талалаева. Прявтокс кочказель  Любовь Алексеевна  Талалаева. Теде башка Любовь Алексеевна важоди Старославкинской школань прявтокскак.

Теде башка вастомантень тердезельть областень эрзямокшонь автономиянь лия важодицятнеяк:
В.Я. Прошкин – Пенза ёнксонь раськень-культурань автономиянь прявтось,  А.В. Макушкин – Малосердобинской райононь администрациянь прявтось, В.А. Сорокина  –   Малосердобинской райононь администрациянь прявтонть полавтыцязо. Теде башка тердезельть инжеть Саран ошсто.

Автономиянть икеле аштить истят путовкст:

 - ванстомс мокшэрзянь раськенть келензэ, культуранзо ды  койтнень-кирдатнень, содамс историянть, кастомс эсь масторонь вечкиця ломанть;

- ванномс кевкстематнень, конатне аштить региононь прявттнэнь икеле, лездамс райононь эрицятненень, кемекстамс сюлмавомат рузонь, эрзятнень ды мокшотнень ютксо.

Школатнесэ улить этнографической ансамблят, школань музейтнесэ эрсить эрьва кодат невтевкст, конат сюлмазь мокшэрзятнень культуранть марто. Районсонть раськень-культурань автономиянь теемась седеяк пек лезды кастомс эрзятнень ды мокшотнень ютксо эсь тиринь раскькентень вечкеманть.

Малосердобинской райононь эрзямокшонь раськень-культурань автономиянь прявтось Любовь Алексеевна  Талалаева покш мельсэ макссь интервью минек сайтонтень. «25-це чистэ минь ютавтынек покш промкс, – корты Любовь Алексеевна. – Вастомась пек кенярдовтымизь. Сакшность инжеть Саран ошстояк. Минь кочкинек ломанть, конатне кармить топавтомо минек вейсэндявксонь тевтнень».

- Ёвтынк, зяро ломанть эрить Старое Славкино ды Новое Дёмкино велетнесэ?

- Неть кавто велетнесэ весемезэ эрить малав 800 ломанть. Весе сынь бажить содамс тиринь келенть ды койтнень-кирдатнень.

- А зяро весемезэ эрзямокшонь раськень-культурань автономиятнеде Пенза ёнкссо?

- Весемезэ минек областьсэ 19 районт. Малосердобинской районось кармась 8-цекс, косо теезь истямо автономия. Лиси, пелест районтнэсэ важодить истят автономият. Миньгак карматано молеме икелев.

- Мезе вейсэндявксось арси теемс малавикс шкасто?

- Покш вийть путозь школасо кельтнень коряс факультативень теемантень-арсемантень. Те канды покш лезэ тонавтыцятненень ды тонавтницятнененьгак. Школасонок ули ансамбля, конасонть морыть морот тиринь кельсэ. Факультативесь лезды ламотнень седеяк пек содамс те сюпав, мазый ды гайгиця кельтнень! Теде башка аштемковсто эсенек районсо минь арсетяно ютавтомс мокшэрзянь культурань чить. Садо миненек инжекс.

- Сюкпря тердеманть кисэ. Любовь Алексеевна, кодатт асатыкст. стакачить улить автономиянь важодемасонть?  

- Неень шкасто миненек асатыть тиринь кельсэ эрьва кодат книгат, журналт ды лия лездамопельть. Саран ошонь инжетне усксть тенек ловномань журналт ды газетат. «Масторава» вейсэндявксось казсь миненек дискть. Покш мельсэ сынст кунсолотано. Вадря улевель, бути эйкакштнэнь туртов усковольть эрзянь ды мокшонь келень тонавтомань учебникть ды валкст. Ули мелем ёвтамс сюкпря Мордовиянь инжнтенень. Карматано ютавтнеме эрьва кодат промкст ды вастомат.

- Садо тешкстамо Саран ошов мокшэрзянь раськенть Россиянь лия раськетнень марто 1000 иетнень.

- Сатано покш мельсэ! Минь пек кенярдтано эсенек тиринь раськенек кисэ. Карматано важодеме, ютавтнеме промкст ды покш чить. Карматано сакшномо тыненк инжекс. 1000 иень тешкстамось ашти покш таркасо, секскак миньгак арсетяно тешкстамс покш читнень лия раськетнень марто!

                                                                                                                                     

 


                                                                                                           Зинёронь Сантяй

Просмотров: 253

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Numulunj pilgä, Февраль 8, 2012 в 4:42pm

минь тесэ эрзямокшот арасть.

Комментарий от: Erush Vezhai, Февраль 5, 2012 в 9:57pm

Цёра, те вейсэндявксось эрзянь, эли мокшонь? Кить эрить те велесэнть? Эрзят эли мокшот? Эли човор эрить эрзятне мокшотнень марто?

Кие те - "эрзямокшо"? Мень раське? Кодамо кельсэ сон корты?

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования