Uralistica

Эстониысь удмуртъёс: юнма-а удмуртлык кунгож сьӧрын?

Удмуртъёсын пӧртэм улосъёсын пумиськыны луэ: Башкириын, Марий-Элын, Эстониын, Финляндиын… Та список быронтэм. Кыӵе интыез соос тужгес но кельшыто, отын диаспора кылдэ. Кылсярысь, уно удмуртъёс Эстониын интыяськемын. Пӧртэм ужрадъёсы валче пырисько, удмурт кылын верасько - ог-огенызы кусыпъёссэс уг ышто.

- Кызьы Эстон музъемын удмурт диаспора кылдӥз?

Диаспоралэн кылдэмез герӟаськемын луэ историлэн азинскеменыз, адямиослэн улон но ужан инты быръеменызы. Башкорт музъеме вуэм яке Татарстанэ кылем удмуртъёсын ӵошатыса, Эстон кунысь удмуртъёс ас мылкыд каремзыя татчы лыктэм но кылем адямиос луо. Совето вакытэ лыктӥзы уже яке военной адямиослэн кузпалзы луыса, бӧрысь – дышетскыны лыктыса кыльылӥзы. Удмурт шаерлэн тунсыко луэмез бордаз кыскиз эстон воргоронъёсты, соос отысь удмурт кузпалъёсын берытскизы. Удмурт-эстон кусыпъёсълэсь кутскемзэс эскеро тодосчиос, лулчеберет удысын кусыпъёсты эскере, кылсярысь, Светлана Карм. Удмуртъёс татын трос, 1989-тӥ арын переписья 413 адями.

 

 - Кыӵе статуссы удмуртъёслэн, кыӵе шаерлэн кунмуртъёсыз луо?
Эстониын улӥсь удмуртъёс тросэз Россия кунмуртъёс луо, эстон гражданство басьтэмъёс туж ӧжыт. Асьсэлэн но, вордэм нылпиоссылэн но -  «вид на жительство».

 

 - Нош кыӵе семьяосты кылдыто? Калыккуспо-а (интернациональной)?

Семьяос пӧртэмесь. Котьку сямен соос луо суро семьяос. Огзэ гинэ тодӥсько, кытын кузпалъёс кыкназы но удмуртъёс. Мӧйыосызгес ӵемгес  удмурт кышномурт – украин яке ӟуч пиосмурт семьяос, егитъёсызгес  удмурт кышномуртъёс – пор, коми, эстон яке ӟуч пиосмуртлы быземын. Удмурт пиос татчы вуыса кузпалъясько эстон, латвия, ӟуч нылъёсын, - огъя тенденциез шедьтыны шуг. Нылпиос тросаз семьяосын трос кылын вераськись луыса будо: верасько анай, атай кылъёсын, ӵемысь ветло эстон нылпи садъёсы, ӟуч кылэз но валаса будо. Азьвыл татчы улыны лыктэм  семьяосын нылпиоссы удмурт кылэз уг тодо - яке ӟучомемын, яке эстон луэмын;  ӵемысь кошкемын улыны кунсьӧры: Германие, Англие, Австралие.

 

- Мар ужало Эстониысь удмуртъёс? 
Туж пӧртэмесь ӧръёс кин мар каре. Ваньмыз кытын ке но ужало, ужтэк пукисьёс ӧвӧл. Пенсие потэмъёс но – 73, 75 аресъем удмуртъёсмы – тэк уг пуко, ветло пенсионеръёслы радъям эстон яке англи кылъёсъя курсъёсы.

- Кыӵе мер ужъёсы пыриськиськоды?

1997-тӥ арын регистрировать каремын «Ошмес» эштос, кудӥз радъя удмуртъёслэсь лулчеберет улонзэс. Тартуын 16 ар ӵоже ужа ини «Юмшан гур» ансамбль, Таллиннын кылем арын коньывуон толэзе кылдӥз «Ошмес» ансамбль. Пыриськытэк уг луы «Фенно-Угрия» обществоен радъям ужрадъёсы, озьы ик луиськомы «Эстониысь калыкъёслэн огазеяськонзылэн» ёзчиосыз. Милемыз пӧртэм ужрадъёсы ӧтчало.  Кун праздникъёсы пыриськиськом, кылсярысь, Калыккуспо анай кыллэн нуналазе асьме калык сямъёсын, кылынымы тодматӥм.  Соос эстон сямен ортчо, нош ми удмурт шӧм пыртӥськом. Кылем арын нырысьсэ Гербер радъям, туэ пор эшъёсынымы валче – Вӧйдырез.

- Кызьы удмуртлыкез утиськоды?

Арнялы быдэ ансамблен репетициосы люкаськиськом, удмурт кырӟанъёсты но эктонъёсты дасяськом. Йылолъёсты, чакланъёсты тодамы ваиськом, анай кылын вераськиськом. Вераськон манерен но туж асьме куспын висъяськиськом: Совето вакытэ вуэмъёс азьвыл конструкциосты, формаосты куто, кылъя реформаос соос понна ӧй вал. Алигес Эстоние вуэмъёслэн вераськон сямъёссы мукет ни, соос трос выль удмурт кылъёсты уже куто.

Оштолэзе Эстониын удмурт кылъем "Ошмес" нимо газет потыны кутскиз. Сое Муш Нади дася. Куартолэзе кыкетӥ поттонэз потӥз ни. Та газетысь Эстониысь удмуртъёслэн улэмзы-вылэмзы сярысь тодыны луэ. Со сяна, со выль эстон литератураен лыдӟисьёсты тодматэ, огъя эстон-удмурт лулчеберет вӧлмет кылдытэ.

 

 

Материалэз дасяны юрттӥзы Надежда Пчеловодова но Николай Анисимов.

 

 

Надежда Пчеловодова (Муш Нади)

2005-тӥ арын кылысь кылэ берыктӥсьлы дышетскыны Таллиннэ вуиз. Йылпумъяз эстон филология магистратураез, докторантураын ужез гожтон но защита кылемын. Али ужа Эстон кыл институтын, эстон-удмурт кыллюкам бордын тырше. Ваньмыкуз эстон литератураез удмурт кылэ берыктэ, удмуртсэ эстон кылэ берыктыны юрттэ.  Эстониысь писательёслэн огазеяськонлэн членэз луэ, Финн-угор Литератураослэн Ассоциацизылэн правленияз пыре. Удмурт кылын потэмын 3 кылбур книгаез. Кылбуръёсыз но выжыкылъёсыз берыктэмын эстон, финн, венгер, пор, мокша, коми, карьяла, немец, француз, англи кылъёсы. 
«Эстония мыным кельше аслаз историеныз, вашкала каръёсыныз, удмурт сямо калыкеныз. Нырысь туж чебер потэ вал зарезь но со вылтӥ ветлӥсь вулэйкыос, али дыши ини» - мылкыдзэ усьтэ Нади.  

Николай Анисимов

Тодмо удмурт кырӟасьали Эстониын дышетске. 2012 арын Удмурт кун университетэз йылпумъяз (Удмурт кылосбуръя факультетэз). Taрту университетлэн докторантураяз со кыкетӥ арзэ визь люка. Кырӟасьлэн нимыз калыклы тодмо луиз Ижкарын дышетскыкыкуз ини. Бигер кылысь  берыктэм кырӟанъёсыз кылзӥсьёслы  туж яразы, удмуртъёс пӧлы вӧлмизы. 2012 арын  «Зарни Перепеч-2012»  премилэн лауреатэз луиз. Туннэ но кырӟанъёс гожъямысь уг дугды, со сяна научной ужзэ но азинтэ.

 

 

Юалляськиз Мария Золотарева

Просмотров: 473

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Май 13, 2014 в 11:10am

Эстониысь парламентлэн депутатъёсыныз удмурт диаспоралэн кусыпъёсыз вань-а?

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования