Uralistica

Flóra Hatvani венгрань тейтересь ды эрзянь келесь

Пшкадинь, а монь эзимезь чарькоде

 

Совась лавкав  тейтерь, васолдо неявиця, эрьва кодамо тюс марто оршамопельсэ,  пшкадсь эрзякс микшницянть туртов, тона каршо каштмольсь. Мейле евтась англакс, те каршовалонть микшницясь  поладызе мекев васов прясо юхаемасо.

Косто?!

Саран ошсо  весе кортыть рузокс. Чуросто марят эрзянь ды мокшонь кельть.

Те мельтнеде-арсематнеде венгрань тейтересь нусмакадсь…

Сави, пшкадемс оятнень туртов. Сюкпря! Тесэ эйстэдест сатышка.

Нилецеде Венгрань тейтересь уш ульнесь  Мордовиясо. Меельце самозо –  кавто иеде седе икеле.

Тувталось – сёрмады диссертация эрзянь келенть коряс, седе домкасто бути меремс: визькс ды ормань валтнэнь коряс.

Зярдо Флора ёвтни  тесэ эсензэ тевденть, марявить анся пейдемкат. Кода истя, эдь, теде минь эзинек тонадо кортамс. Валтнэнь тевс нолдатано, ансяк вана алкуксонь эрзяньсетнень – чуросто. Рузыинек, пачк рузыинек.

 

Велев молян – валт пурнан

 

Отяжбуень Селища велев. Те велесэнть эри Флорань ялгазо – Оля Калугина. Самай тосо сон домкасто кемекстызе Венгриясо тонавтнемадонть мейле эрзянь келензэ. Ней Флора пурнась велестэ диссертациянзо туртов материал. Эрзянь кельсэ ормань ды визькс валтнэньгак тесэ кармасть стувтомо. Савкшнось Флоранень кой-конатне марто содавтомс  эрицятнень. Эдь од учёноесь теевсь мартост содавиксэкс превей, умонь книгатнень лопатне лангсто.

Велесэнть тосонь од ломантне енов а молиця тейтерентень кенярдыть, эдь сон аволь васенцеде сы  инжекс ды важодеме. Кудоютконь тевень теемеяк лезды. Паро мельсэ тейтересь потявты скал, пани эрзянь коень ярсамкат: прякат, сюкорот, каймакт.

Салавачисэ Флора евтнесь,  кода меельце самстонть понгонесь Инечинь тешкстамо. Вана тесэнь кортавкс марто валт савсь марямс, зярс эрицятне кенярксчинть кувалма чапамодонть хрыпадекшнэсть.

Кувать мельс кадовсь оянзо сырькаенть каштомлангозо.

« Те сехте мельстуиця тарка масторлангсонть»  – витьксты Венгрань од тейтересь.

 

Флорань диссертациясто саевкс валт:

путкодевкс-волдырь;

сильге-бородавка;

ривезень тол-краснуха;

кумадонь  тол-ветрянка

Ламо келень содыця  

 

Флорань ванькс эрзянь келезэ. Миненекак бу сонзэ эйстэ тонавтнемс.  Кортат мартонзо ды каштанчи тиринь келенть кисэ сайтянзат. Кода мазыйстэ ды ванькс литературной эрзянь кельсэ корты тейтересь.  А минь… Човорятано, човорятано. Вал эрзякс, кавто рузкс. Теде башка  Флора паросто содасы венгрань, англань, финнэнь, эстононь, удмуртонь кельтнень. Ней бажи тонавтнемс мокшонь ды рузонь кельтнень. Меельцевтементь ковгак. Минек масторсо – коммуникациянь кель.

Зярдо минь вастовшнынек Флора марто, мон дивсинь мазый палянзо кувалма. Тейтересь неень шкань коряс платияванть викшнесь эрзянь мазыльмат. Вечкеви весемесь, мезесь сюлмазь эрзянь  раськенть марто. Сон паро мельсэ якси минек музейтнева ды раськень кенярксчитнес.

 

«Истямо мазычи мон костояк эзинь некшне. Терявтан стамс эстень паля»

Истя мерсь Флора  Маризь Кемаль эрзянь коень-кирдань содыцянть, сермадыцянть марто вастовомадонть мейле. Содавикс эрзявась омбомасторонь тейтеренть туртов невтнинзе эрзянь авань оршамопельтнень, конатнень стынзе ды викшнинзе сонсь. Домкасто евтнесь эрьва тешкскеденть, кодамо смусть канды те эли тона викшневксэсь. Венгрань тейтересь пек бажи стамс эстензэ эрзянь оршамопель. Те вастовомадонть Флора ашти покш мельспаро. Эдь эрзянь сермадыцясь евтнесь ламо эрзянь кельденть, ды Флорань диссертацинзо коряскак  макссь лезкс.

 

Ильтинек Флорань. Туемадонзо икеле аламодо ормалгадсь. Кармавтсь а сэредемс ды эрямс мизолкс марто.

Тунда таго велявты Россияв, тесэ карми студентэнь раськеютконь конференция, косо сон ловны доклад минек эрзянь келенек коряс, конь венгрань тейтересь вечксы прок тириньсенть.

 

Нурькинестэ:

Флора Хатвани  чачсь венгрань Ходмезёвашархей ошсо, прядызе Сегед ошсо университетэнть «Венгрань кель ды литература» специальностень коряс. Ней полады тонавтнеманть Финляндиянь Хельсинки ошсо. Котоце ие тонавтни эрзянь кель. Корты ды ютавты валкс марто. Сермады диссертация эрзянь кельсэ ормань ды визькс валонь коряс. 

Кунсолынк Флорань интервьюнть "Вайгель" радиоканалонть эфирстэ

Valda

Просмотров: 789

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Erush Vezhai, Март 20, 2013 в 8:39pm

Нама, сонсь тейтересь вадря ды мазый!

Комментарий от: Erush Vezhai, Март 20, 2013 в 8:34pm

Вастовкшнынь те тейтеренть марто Шиофок ошсо. Васня лездась тенек. Мейле оргодсь эйстэнек. Мордватне, улема, пек тандавтызь. Улема, мерсть тензэ, ВА ИЛЯ ЛЕЗДА НЕТЬ ЭРЗЯТненень.... Те пек кольстизе мелем сестэ.... Пшкадинь тензэ, Флора, ютавтык минек яволявтоманок эрзянь кельсэ мадъяронь кельс.... Васня ютавтсь... Мейле - сон эйстэденек тусь ве ёнов чиезь.... Я-а.... Тандавтызь тейтеренть.... Ялатеке, минь акциянок ютавтынек. Нама, седе парсте ютаволь, улевельтенек Флора паро нежекс....

Комментарий от: Кувакань Азор, Март 20, 2013 в 10:46am

Мазый ды превей мадьяронь тейтерь Флора.

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования