Uralistica

Коса ашезь кула валсь,
тоса тевське нинге ашезь кула
А. Герцен

Финно-угрань нароттнень культураснон и кяльснон ванфтомасна, нароттнень эсь ётковаст ладямасна и фкя-фкянди лездомасна — тя марстонь оцю тевоньке, кона аф кадондови вандыенди и омботенди. Тя стама тев, конань инкса эрти эздонк сединек-ваймонек палозь палома тячи. Тев, конань эзда тейнек маштома няема эряфонь смузь, сай пингоньконь валдонц.


Озафты седи мяльсь, мес мекольдень кизотнень финно-угорскяй мирса-масторса тянкса тиендеви лама пара тевда и лама арьсеф тиемс сай пингонди. Тячи аф аньцек мокшэрзянь масторса, но и сембоц финно-угратнень ёткса лама корхтави национальнай эсь прянь маряманьконь касфтоманц колга. Тонаттама аф виздезь, а, меколанкт, пара мяльхть, гордостень марязь азонкшнема эсь пряньконь мокшекс и эрзякс, удмуртокс и стак тов, кармайхть эряма аф аньцек атянь-атяста моли козя коеньке-крданьке, но и тядянь-алянь кяльхне.


Советскяй пингть кялень тонафнись В.М. Иллич-Святыч тяштсь: «Кяльсь — тя пингонь ляйге ётама. Сон вятьсамазь минь т у ф н е н ь эряма вастозост, но тоза аф ётави ся, кие пели крхка ведьта». Ков сяда крхка ляйсь, тов сяда стака сонь эзганза ётамась. И сядонга стака ётамс сонь ськамот. Сяс тячи финно-угрань сембода смузю и отькорь цёратнень-стирьхнень инголе ащихть и оцю вешфкст: стройсемс пингонь ляйнятнень вельфке кеме седнят, куване эсь мельганк улель кода вятемс сяда пелихненьге. И ков сяда кемоста кармайхть кирдема ня сеттне, тов сяда лама од ломаньда аф эводи лангозост аськолдамаснон…


Тяфтама «седень» стяфтыкс-строяйкс финно-угорскяй тевса арась «Финно-угрань кяльхнень и культуратнень ванфтомаса аф коммерческяй организациятнень вастсна» 2013-2016 кизотненди арьсеф Финляндско-Российскяй проектсь. Сонь ётафтсы «Финляндия—Россия» обществась финнонь «Коne» фондть лезксонц вельде. Тядде ушетф проектсь арась эсь лацонь полатксокс ингольдень кафта проекттненди, конат ётафтфтольхть эряфс тона кизотнень. Сембоц тядде ётасть тонафнемань кафта семинархт, коза терневсь пцтай нильгемонь ломань Финляндияста, Карелияста, Мордовияста, Таймырста, Нижняй Новгородста, Москуста, С.-Петербургста и стак тов. Мордовияста семинарса улеме кафоненк «Якстерь тяштеня» журналть главнай редакторонц Вера Брындинать мархта. Омбоце семинарть ётафтомста проектть эвондаманц колга минь корхнеме проектть вятиенц, «Финляндия-Россия» обществать оцюнянц Рику Савоненонь мархта. Пара мяльса пачфтьсаськ тя корхтамать лувиеньконди.


— Рику, азонтт лувиеньконди, мокшэрзянь од ломаненьконди проектть эвондаманц и эряфс ётафнемань кинц колга.
— Проектсь арьсефоль и васенцеда ётафтфоль эряфс 2006 кизоня. Консультативнай Комитетть и Россиянь организациятнень лезксснон вельде тя тевть вятемонза кярьмодсь покоди ялгазе Сейя Лаало-Ристиля. Сяс тяддень проектсь арась колмоцекс. Колмоцьке проекттне аф фкя лацоннет, синь улихть башка ширесна, но арьсемань туфталсна сембонь фкя и сяка: тонафнемань семинархнень вельде «касфтомс» финно-угрань движенияса од эрек ломатть.


— Мезьса аф фкакс шисна тя и тона кизонь проекттнень?
— Ингольдень кафта проекттнень эряфс ётафтомста сяда оцю мяль шарфневсь башка участникненди и синь проектснонды. Тядде минь арьсеме явомс семинаристтнень мзярошка группава, конат кармайхть арьсема, аралама и, кда удалай, эряфс ётафнема межрегиональнай марстонь проектт.


— Мес арьседе шарфтомс башка мяль регионъётконь проекттненди?
— Туфталда аф фкяль. Ламоц участникнень проектсна улендсть аф кальдяфт и аф кржатне ётафневсть эряфс. Но мзярошка пингонь ётазь фкя сяка мяльхне кармасть азонкшневома нинге и нинге. Эрь кодама региононь участникнень тематикасна ламода фкя лацоннель. Тяфта, ламоцне ёрасть нолдамс кодамовок изданият-месть, шабатненди книганят и стак тов. Кржа кармась азонкшневома сединь таколфты и надиямань канды од мяльда-арьсемада.
Тяда башка, ширде няевсь: участникнень проектсна — культураньконь и кяленьконь ванфтомаса анцяй аськолкскат. Няевикс полафткст марстонь тевсонк пяк ашельхть.


— Рику, кинь ширде участникне мушендозь ярмаконь лезксть, Финляндияста или региоттнень эзда?
— Аньцек васенце кизоть, а тя ульсь пцтай кемонь кизода инголе, участникнень сембода удалаф проектснон эряфс ётафтомаса сембе карьхцнень сявондезень эсь лангозонза проектоньке. Но эстокиге няевсь: кяльть и культурать ванфтоманц коряс смузю мяльхнень-арьсематнень пеже юмафнемс-арафнемс стак, синь нолямат тевс. И ков сяда лама ломаньда тердеви семинарс, тов сяда лама од мяльда азови. Тянкса эрявсь сяда лама ярмакта. Сяс мекольдень вете кизотнень проектоньке сявондьсыне эсь лангозонза аньцек кинь, эрямань, тонафнемань карьхцнень. А башка проекттнень эряфс ётафтомасна ащи сянь эзда, кода кармайхть лездома синць региоттне. Сянкса семинарса од ломаттненди сашендови тонафнемс аф аньцек проектонь тяштема, лац-ряц смекама-арьсема, но и организациятнень, республикань оцюнятнень кядьста ярмаконь лезксонь вешема.


— Рику, тя семинарса колмоцьке группатне анокласть тифтень проект. Койсот, конань эздост ули сай пингоц?
— Колмоцьке проекттне пяк аф фкя лацоннет. Мон арьсян, эрть эздост ули сай пингоц, кда группатне сяда товга кармайхть кирдема фкя-фкянь мархта кеме соткст. Азома сявок, сембода мялень салайкс и тёждяста тиевикс ули кода лувомс «Мульти-бабаня» проектсь. Вдь эряфс сонь ётафтомаса пцтай аф эрявихть ярмакт. Лия проекттнень колга корхтамстовок ули надияма, што синь мусазь эсь вастснон эряфса. Мярьктяма, кялень клупнень пуроптомаснон колга азф мяльське васень пингть анай аф сяшкава лама ярмакта. Тянкса аф эряви вешендемс питни и оцю васта, сатомшка ули ётафнемс васетькшнематнень библиотекаса или вузонь аудиториятнень эса. Но тя проектть эряфс ётафтомаса эряви пяк оцю мяль, вий-эрьгя ся ломанть эзда, кона кярьмоди тя тевти.


— Эрь кизоня финно-угрань нароттнень эзда семинарс сашенды лама асу од ломаньда. Азонтк, кода няфнесазь синь эсь пряснон проектть аделавомда меле, лама ли цебярь тевда тиихть синь финно-угорскяй движенияса? Или ламоцне эздост тячи састь, ванды — тусть?
— Виденц азомс, «тячи сайхнень, ванды туйхнень» инксовок тя проектсь савсь кой-конашкада полафтомс. Ингольдень проекттнень пингста семинарс эрь кизоня терневсь 100 ломань. Кит лац работасть васенце семинарть пингста, терневсть омбоцетивок, кона ётнесь Финляндияса. Кой-конат омбоце семинарсовок няфнезь пряснон цебярь ширде. Но ётксост, ужяленди, улендсь лама «туристтовок». Сяс тяддень семинарти анокламста минь башка мяль шарфнеме сянь лангс, кинь тердемс. Тертьфнень ёткса аш ширдень ломатть, сембонь колга азсть пара валхт организациятне. Группатнень лац работамаснонды лездсь, койсон, сявок, што сембе пуромфне кенерсть содамс и ялгакстомс фкя-фкянь мархта васенце семинарста, кона ётась июнь ковста Карелияса. Сяс ули надияма, што ушетф тевсна удалай.


— Рику, ульсь корхтама сянь колга, што сай кизонь семинарсь ётай минь ширесонк, мокшэрзянь масторса. Мес тяфта ладясть?
— Виде, арьсефтеськ тяфта. Мордовияса тя семинарсь ётай аф васенцеда, тейнек удалась ни улемс Саранск ошсонт 2009-це кизоня. Сай кизоннетьке колга корхтамась мольфтевсь кунара. Азома сявок, проектоньконь вятиензон ёткс сувси мокшень алясь, «Финно-угрань культурань Поволжскяй центрань» оцюнясь и Н.П. Огаревонь лемса МГУ-нь филологическяй факультетонь деканць Юрий Мишанин. Сонь лезксонц вельде национальнайть ванфтомаса-вииямаса тиендеви лама пара тевда. Тяконь лангс, Юрий Александрович Мордовиять лемста кочкась тяддень семинару аф кальдяв ломатть, мезенкса сюконятама теенза.


— Сюкпря пара валонкса, Рику! Пара мяльса учтядязь Саранскяйса!
Сембоц группатнень работасна, арьсеф проекттне петезь мяльцень? Или тянь колга мзярс нинге рана корхтамс?

— Семинарть тиф тевонзон и сатфксонзон няйсаськ мзярошка ковда, а пади, и кизода меле. Виденц азомс, мон надиян, што ня проекттне кармайхть ламос эряма и кандыхть сатомшка лезкс культураньконь и кяленьконь ванфтомаса. Кода тят тиенде, тя кизось — проектть ушетксоц, эряфс васенцеда нолдамац, сяс тя видеса улихть и нинге кармайхть улема кизефкст. Но мзярс мяльне и надиямане валтт.


— Сюкпря, Рику, сембонкса! Сембе надияматне ётаст эряфс!


Кода азфоль ни, васенце семинарсь ётась тяддень июнь ковста Карелияса. Вастсь кочкафоль пяк цебярь, хуш ваймосемс пяк ашезь сашендов. Шобдаваста илядьс семинарс сафненди лувондовсть лекцият, ётафневсть практическяй занятият и эрь кодама тренинкт. Сембе сяка, вирьгучкаса ащи Урозеро эрьхкть маласа эрямась ламода лездсь семинарть лац ётафтоманцты. Тя семинару сашендсть финно-угрань од активисттне. Васенце шинякиге участникне явфтольхть колма группава, конат работасть тяфтама секциява:
Национальнай кяльхне (тяконь ёткса ошса синь ванфтомасна);
Менеджментсь и экономическяй проекттне (тяконь ёткса коренной нароттнень правасна);
Массовай коммунникациянь средстватне (ётксост тяниень пингонь проекттне).


Группатнень вятезь финно-угорскяй тефнень эса шарьхкоди-содай ломатть, конат кошардсть азондомс фкя-фкянди пичефксоньконь-арьсеманьконь и лездсть самс марстонь мяльс. А пичефксоньке сембонь фкя-сяка: кода ванфтомс национальнай кяльхнень, вдь, кода азозе рузонь классиксь А. Куприн, народсь эряй снярс, мзярс эряй кялец. Группатненди эрявсь арьсемс и пачфтемс сембе участникненди марстонь проектнай идеяснон. Сяда крхкаста кяльть и культурать ванфтомаснон коряс мяльхне-проекттне вановсть омбоце семинарса, кона ётась тяддень октябрьста Сыктывкарса. Омбоце васедемать пингста няевсь, проектнай мяльхне аф ламода полафтсть, но смузьсна лядсь сякось. Комиса участникне сяда крхкаста арьсезь-смеказь и аралазь сай пингонь проектснон семинаронь вятихнень и пуромфнень инголе. Эрь группаста азфоль тифтень проектнай идея. Менеджментть коряс группась аралась пцтай анок проект, коса аноконди лемтьфтольхть нльне ярмакса лезды кой-кона организациятне. Проектсь арьсеф сянкса, штоба школаса тонафнихнень эзда касфтомс сай пингонь финно-угорскяй активистт. Шабатне каникуласта кармайхть якама этно-лагери финно-угрань регионга и сотцемост раднянь нароттнень культураснон и койснон-крдаснон.


Кялень группать работаса васьфневсь, улема, сембода лама кизефкста и карань-каршек моли мяльда. Койсон, колмотнень ёткста тя секциясь инь стакась, вдь эрь кодама региоттнень эса кяльть ванфтоманц коряс тефне ащихть аф фкя лаца. Карелияса эряй карелда, кепотьксонди, лядсь сембоц 50 тёжянть малава ломань. Лувкссна мекольдень кизотнень пяк курокста кармась кирема. Кялень содайда ётксост лядонды коль сяда и сяда кржа. Семинарс саф карелсь Егор Карьялайни азсь мяль пуропнемс кяльть тонафнеманц коряс клупт, коса ломаттне тонафнельхть аф аньцек корхтама, но и няфтелезь пряснон народнай ремесласа, морсельхть кантеле народнай инструментса, пуропнельхть клупнень видеса творческяй коллектифт. Тяка мяльть кирдезе саами стирсь Мария Дугина. Мордовияса, Удмуртияса, мярьктяма, тефне аф сяшкава кальдяфт. Миньцонк мокшень и эрзянь кяльхне — государственнайхть, тонафневихть школаса. Афи сёпондсаськ, кяльть юкснемац — миньге седисонк пичефти сарда, но кялень аф содайхненди тяфтама клупнень пуропнемасна кати мусазь эсь вастснон мокшэрзянь масторть эряфса… Сяс меколи группать лемста азфоль мяль пуропнемс клупт интересонь коряс, коса сембонди, кинь мялец тонафнемс кяльть, кармайхть ётафневома урокт, курст, семинархт. Кда тя проектть кармай улема сай пингоц, Саранскяйса пара улель пуроптомс од ломанень литературнай клуб, коза сашендольхть мокшень и эрзянь од авторхне. Тяфтама клубть видеса пароль ба ётафнемс литературнай переводти, тяштемань тевти тонафты семинархт, мокшэрзянь смузю писательхнень и литературоветтень мархта васедемат и стак тов. Сась пинге шарфтомс од тяштиеньконь шири башка мяль. «Од вайгяльхть» рубрикась шурода-весть эвондакшни «Мокша» журналть лопанянзон эса. А вдь тя —литератураньконь и кяленьконь сай пингсна…


«Ыбица» этнокультурнай паркса ётафневи занятияда и круглай шрада башка семинаронь участникне васьфнесть коми гимназиянь тонафнихнень мархта. Няфтьфоль, кода тяса ётафнесазь коми кялень урокнень рузонь шабатненди. Мялень петикс и дивандафтыкс ульсь кулемс ся, што гимназиять аделамс ламоц шабатне сатомшка лац тонаткшнесазь коми кяльть и пара мяльса тя кяльса корхтайхть.
Семинаронь шитнень Сыктывкарса вчёк ётась «Родной язык в современных условиях двуязычия» Международнай колмоце конференциясь, коса тейнек удалась улемс. Мордовияста конференцияс сашендсть «Финно-угрань народонь культурань Поволжскяй центрань» вятись Юрий Мишанин и идень кужеса мокшэрзянь кяльхнень тонафнемаснон коряс координаторсь О.О. Кулаева. Тяда башка, тя конференцияти сашендсь финно-угрань содаф деятельсь, Западно-Венгерскяй университетонь профессорсь Янош Пустаи. Группаньконь вятиец Марина Федина заботендась сянь колга, штоба содаф финно-угроведсь муль пинге васедемс мархтонк, мезенкса астама оцю спасиба. Од ломаттненди, кинь мяльсна ванфтомс масторлангса эсь кяльснон и культураснон, профессорсь азсь тяфтама валхт: «Шумбратада, од ялгат! Пара мяльса тячи васедень мархтонт. Сембонь минь таколфтсамазь фкя и сяка мяльсь: кода тяниень эряфса ванфнемат тядянь-алянь кяленьке. Масторлангса лисенди оцюдонга оцю зиян — ков ши юксневихть, юмсихть кяльхне. Юмсихть сянкса, мес минь лотксетяма эсь кяльсонк мяленьконь-валоньконь азонкшнемда.


Кда кизефтьсамасть, кода, койсон, ванфнемат тячи кяленьке, мон мярьган тяфта: кяльсь аф эряви ванфнемс, тя кяльса эряви корхтамс. Эста сон сонць ванфтови.
Тя конференцияса эсь докладсон сембе сафненди мон максонь тяфтама аф стака кизефкс: «Кельгома ялгат, азость, пожалняста, кодама тяфтама закон кардатядязь тинь эсь кяльсонт корхнемда и эрь шинь эряфса тевс нолямдонза?» Мон аф содан тяфтама закон и государствань вятихнень ёткста аф содан тяфтама ломатть, конат ащельхть каршек. Мес ина аф нолясаськ тевс эсь кяленьконь политикань эряфса? Мес аф азонкшнесаськ шачема кяльсонк эсь мяленьконь-валоньконь эрь кодама мероприятияса?..


Финно-угрань народонь Конгресснень пингста сашендови азонкшнемс тяфтама валхт: «Тейне ужяль, мес тя конгресса мон шарьхкодьса эрь азф валть. А шарьхкодьса сяс, мес финно-угрань оцюдонга оцю пуромксса финно-угратне корхтайхть аф финно-угракс».


Улихть республикат, конатнень эса Конституциясь и государственнай сембе документтне ётафневихть рузоннеста шачема кяльс. Аньцек кинди? Сай пингонь лингвисттненди, конат кармайхть терминологиять тонафнема? Аф? Мле кинди? Вдь сембе содасаськ, политическяй эряфса ня документтне аф мушендсазь эсь вастснон. Тяконь колга корхтайхть синць ётафнихневок: ня тексттне бта аноконди аноклакшневихть архивса ванфтоманди.


Россияса аф рузонь сембе нароттне лувондовихть национальнай меньшинствакс. Тя терминць аф прокс виде. Ломаттне, конат эряйхть историческяй эсь родинасост, эрявихть лувондомс аф национальнай меньшинствакс, а коренной населениякс. Мариецне, конат эряйхть Марий Элса — коренной населения, а мариецне, конат эряйхть, мярьктяма, Башкортостанца — национальнай меньшинства. И кда сембе минь карматама тянь шарьхкодема, тя ули васенце аськолксокс кяленьконь и эсь пряньконь ванфтомаса.
Мезьста ушедомс кяльхнень ванфтомасна? Стака азомс, сяс мес пелькс процессь ушедсь ни. И курокста арды равжа тя шарыть алу повсть аф аньцек финно-угрань нароттне. Мон эрян хорватонь велеса и няйса: од ломаттне аф корхтайхть эсь кяльсост. Мон, венгрсь, сюцян эсост тянкса. Вдь кяльть мархта сотф культураське. Мзярда ошста ётань эряма тя веленяти, оцю мяльса кармань якама тостонь оркестрав. Тонадонь морама народнай инструментсост, кштима синь лацост. Но тянь эзда мон нинге ашень ара хорватокс. Сяс теентьке эряви содамс: тонадомок национальнай моронь морсема и кштима, нинге аш кода сувафнемс эсь пряце тя или тона этности.


Кяльть ванфтомац васендакиге ушеды эсь кудстонк. Тинь нинге оттада. Аньцек Шкайти содаф, кодама ки, кодама эряф учсетядязь инголе. Азолень теенть тяфтама валхт: рьвяямок или лисемок рьвакс аф эсь этносонь ломаненди, шабантень мархта шачемстокиге корхнеда эрсь эсь кяльсонза. Казесть шабантенди эряфса сембода питни казнеть — тядянь-алянь кяльть и культурать. Аф улендихть цебярь и аф цебярь кяльхть, оцю и ёмла культурат — сембе синь фкат и сембе эрявихть.
Оцю и няевикс тев кяльхнень ванфтомаса тиель школась эстокиге, кодак оцюнятне шарфтольхть тянь лангс мяль. Сембе предметтне школаса вятемат эсь кяльсонк. Аф тяфта, кода тя тиендеви тяни — кафтонь част недяляти, да и сявок ланга-лунга, а афкукс мокшекс, эрзякс, удмуртокс и стак тов, кода тя ульсь национальнай школатнень пякстамда инголе! Тяза аш мезенди вихцода панцемс рузонь шабатнень, мон кирдян мяльса эсь кяльсонк корхтай велень шабатнень. Вдь аньцек велеса афкукс аруста и козяста ванфтови кяленьке.


И мекольцесь, ялгат: катк эрь ётафневи илась финно-угратнень эряфса ули аф сянь вастс, кода ванфтомс кяльсь, а полатксокс тя оцю тевти. Кда карматама мархтонт тяфта арьсема, эста ламоксть нинге васеттяма фкя-фкянь мархта».

Аноклазе Марина АНИКИНА

Просмотров: 596

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования