Uralistica

Сёрмадомань тевса аш кода каннемс пряцень вярьгак

Велень эряфсь тячи аф пяк «моднай». Од  ломаттнень аш мяльсна аф аньцек соксемс атянь  модаснон, касфнемс жуватат, но и нъльне содамска мезевок тянь квалма. Рынкань койхне казямот: вешемась раштай максома, а сяс афкуксонь велеть колга тячи аф тиендихть фильмат, аф сёрматкшнихть  бестселлерхт. А велеряйхнень эряфсна въдь тянь эзда ашезь ашулгода. Эсонза станяк лама пичефкста и кенярьдемада, аварьдемада и рахамада. Сонь ули  эсьлацонь «таньфоц», конань улема кържа кие  машты шарьхкодема, а няфтема да азома  - пъцтай кивок аф.  И вов тяфтама шуроста васьфневи ломаттнень ёткс, апак сёпт, ули кода кандомс асу мокшалять Илья Вешкинонь, конац эряй Атерьса и вов ни комозьда лама киза покоди «Мокшень правда» газетати эсь корреспондентокс ся аймакса.

Сёрмадома Илья Петрович ушедсь нинге ёмла школаса. Кода азондозе сонць, васенце тяштьфкац эвондась райононь газетаса нилеце класса тонафнемстонза. Сембонь мяльс тусь. И редакторсь тердезе фалу кирдемс соткс изданиять мархта. Пинге ётазь Вешкин варжазень виензон стихотворениянь сёрмадомасовок. Вов кодамоль васенце аськолксоц тя видеса:

Монь велезе

Ащи ичкоздень ки лангса

Мазы оцю веле.

Куттнень ломанькс валдот ванфсна,

Ваныхть ниле пяли.

Касыхть шуфтонят кить крайге.

Пижелготкшни нарнясь.

Менелец прокс кайги пайге,

Ваноманякс нарнеф.

Панжи велезе и касы

Канды цебярь слава.

Эрь велеряйсь тянкса шнасы,

Тянкса аф юкстави.

Стихотворениянзон кучезь мокшень содаф поэтти Сергей Кинякинонди. Ся шназе цёранять, мезть мархта макссь вийхть сяда товонь творчестванцты. И Илья кармась сёрмадома аф оцю азкскт и пеетькскат.

Ашезе када сёрмадома тевонц армиясовок. Семипалатинскяйса служамста тяшнесь «Боевое знамя» газетати. Кошарязь лядомс тозк, но шачема ширсь тердезе меки. И Вешкин мърдась Атери. Кармась покодема «Мокшень правда»-ти эсь корреспондентокс Зубунь, Торбеюнь и Атерень аймакова. Комозь кизотнень пингста, конань сон сотозень тя газетатать мархта,  лемоц арась содафокс марнек республикать келес. Улихть лувиенза Москуса, Рязаньца и лия вастса. Синь гайфнихть теенза, азондыхть сюкпря творчестванц инкса, пачфнесазь мяльснон-арьсемаснон сёрматфонц квалма.

Улема, ламоцненди кельговикс Вешкинонь творчествац васендакиге сяс, мес тяшти сон идькспингстакиге содаф и шарьхкодеви велень эряфть колга. И ся, апак сёпт, эрь мезне венепни теенза мялень салай сюжетт, конань вакска прокс аш кода ётнемс. Илья Петрович нъльня вяти журнал, коза сёрматкшнесыне валхнень и рахафты тефнень, конатнень теенза азондсазь велеряйхне.  Сембось тя ули кода мумс пеетькссонза. И тяштьфт синь сяшкава ару мокшень кяльса, конань лувомста ваймоце эжи. Мярьгат: эрек нинге ся валсь, конань максозь тееньк атянь атяньке;  тяфта корхнихть мокшетне.

Мокшалять мялезонза, мес сонь сёрматфоц токси ломанень седихть. Пеетьксонзон тонафнесазь школаса, кой - конатнень коряс путнихть сценкат. Творчестванц мельге ванцть и ваныхть мордовиянь содаф сёрмадыхне, шнакшнихть эсонза. Но Вешкин аф оцюлгофни пря. «Сёрмадомань тевса аш кода каннемс пряцень вярьгак», - мярьгонди сон,  - «Мъзярос эрятама, снярос и тонафнетяма, а питне сёрматфоньконди максы аньцек лувись. Пяк оцю сёрмадытьке тевонцты эряви пети. Пара, што улихть ломатть, конат няфнесазь тееньк афсатыксоньконь и лездыхть касомс сяда вяри. И кафтоньгърда сяда пара марямс шнама валхт эзрай и содаф сёрмадыхнень эзда».

Илья Петрович фалу пара мяльса васьфни лувиензон мархта. Къда тердьсазь школав, вестевок аф атказай. Сон ётафни творчествань илятть, лувондсыне пеетьксонзон радиваса и телевиденияса, лезды мезьса машты сёрмадома ушеткшни асу иттненди.

 

Аудиофайланень ёткса ули кода кулхцондомс Илья Вешкинонь кафта пеетьксонзон. Лувись сёрмадысна сонць. И. Вешкин - Мациень штайхть by jorgi


И. Вешкин - Учань салай by jorgi

 

Просмотров: 363

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования