Uralistica

Кивалтэм потон мылкыд уг тӧлӟы вылэм 72 аресын но. Та туж умой адӟиськиз «Удмурт кенеш» огазеяськонлэн Ижысь Индустриальной ёрослэн отчётно-выборной конференцияз.
Ужрадэ люкаськемъёслэсь мылкыдзэс юазы: кинэ адӟиськоды ёросысь «Удмурт кенешен» кивалтӥсеныз. Дэмлам кандидатъёс пӧлын вал: К. Герд гимназиысь дышетӥсь О. Ведрова, тодосчи А. Разин, «Пичи кенешысь» Алевтина Поткина. Берлоез самоотвод басьтӥз. Залын пукисьёс ӟырдазы. Арлыдоосызгес Разин понна дурбасьтыны кутскизы, егитъёсызгес - Ведровалы. Зэм, Альберт Алексеевич удмурт движениын ас вакытаз бадӟым уж лэсьтӥз. Кылсярысь, удмуртъёслэсь нырысетӥ Ӧтчамзэс люказ, «Удмурт кенешлы» устав гожтӥз. Но туннэ, мар ватонэз, солэн пельыз но секыт кылэ ни. Арлыдыз но пинал ӧвӧл. Ма, куд-огез меӵак шуиз уго: Альберт Алексеевич, ми тӥледыз туж гажаськомы, но тӥ туннэ пересь ни. Тае кылыса, Разин пурӟиз. Мон, пе, 4 книга гожтыны малпасько ай. Нош сомындазэ печатлай ни. Кыӵе, пе, мон пересь! Мон туж трос лэсьто на.
Ведровалы куд-огез вазиськылӥз: ужа, опыт люка, собере удмуртъёсты валтод. Пересьмемез бере кивалтоз шат? 
Котьма ке но бератаз Ведрова вормиз ик. Со понна ваньзыгес ик куаразэс сётӥзы. Малы соку калыклы час ӵоже сурым-бурым ӝутонэз вал?

О. Ведровалэн мылкыд задор. Со Индустриальной ёросын оло зэмен ик быгатоз удмуртъёсты вырӟытыны. Мукет ёросъёсын ӵошатыса, татын уго золгес ик бабо соос, ужрадъёсы уг пырисько, кылзэс уг верало. 
Но тужгес бугыръя на тани ма. «Удмурт кенешлэн» Ижкарысь ёзэныз кивалтӥсь Пётр Бобров куд-огзэ куртчыны «выриз» ик: докладдэс кылзӥсько но, сюлэмы позырске - котькытын кылӥське кырӟамы но эктӥмы. Нош «Гербер», «Виль» праздникъёсты ортчытэм сяна, мар лэсьтэ на «Удмурт кенеш»? Ку, пе, со удмуртъёс понна зэмос висьыны кутскоз? Ку бырись удмурт школаос понна дурбасьтоз? Но Бобровлэсь ымзэ пытсасьёс сюризы. Тӥ, пе, Индустриальной ёросын уд улӥське, татчы лыктыны праводы но ӧй вал. Озьыен, ӟучъёс верамъя, правда колит глаза?
Кӧтӝож. Сюлэм пӧзе. Вань со отчётно-выборной конференциос — спектакль, комедия. Калыклэсь дырзэ юнме быдтыса, мылкыдзэ пожаса люкало, фарсэз учкыны косо. Аслэсьтыд ужан программадэ вераны 3 минут сёто. Зэм, таиз ласянь А. Разин шаплы кариськиз: мыным, пе, котьку 3 минут дыр висъяло. Но туннэ, пе, кемагес верасько ай. Озьы ик кариз. Оло, быдэс час но вераськысалыз. Но сое сцена вылысь кунултыса нуизы. Ма, вылӥынгес пукись кивалтӥсьёс кемалась бырйизы ни ук правление О. Ведроваез. Озьыен, кулэ вал меда нимыз понна гинэ конференция радъяны?

Просмотров: 205

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования