Uralistica

Толон, 12-тӥ южтолэзе, Удмуртиын XX Тол гурт спорт шудонъёс кутскизы. Таяз аре соос Балезино ёросын ортчо. 13-тӥ ожтолэзе нырысетӥ ӵошатсконъёс ортчозы ни: баскетболъя, хоккейъя, шахматъя но куасэн бызьылонъя.

Удмуртиысь гурт спорт шудонъёс – Олимпи шудонъёслы зэмос калык альтернатива луо. Олимпи шудонъёсын ӵошатыса, гурт шудонъёс копак калык спортэз азинтонлы сӥземын: вань кылдытэм инфраструктура калык понна лэсьтэмын, выль объектъёсын арбыт профессионал луисьтэмъёс спорт ужъёсын вырыны быгатозы. Со сяна, та шудонъёслэн геройзы – узыр профессионал спортсмен ӧвӧл, валтӥсь фигуразы – огшоры гурт адями, ас улоназ му ужбурчи яке школаын дышетӥсь яке эмъясь яке агроном луыса ужась адями.

 

 

70-80-тӥ аръёсы РСФСРысь куд-ог областьёсын гурт калык пӧлын мугорез кыдатонъя шудонъёс но фестивальёс ортчытъяны кутскизы. Озьы, 1989-тӥ арын Удмуртиын но гуртын ужасьёс понна фестиваль ортчыто (Ижкарысь «Зенит» стадионын ортче, 12 ёрос пыриське). Нош со фестивалез азьланяз радъяны арысь аре ӧз быгатэ.

1992-тӥ арын гинэ Удмурт Элькун Кивалтэт, Ува но Дэри ёросъёслэсь адӟем карыса, спортъя гурт шудонъёсыз быдэс элькунын радъяны малпа (азьвыл уго Уваын но Дэриын ортчытъяло вал ини та выллем районной ӵошатсконъёсты).

Нырысетӥ Элькунысь мугорез кыдатонъя гурт шудонъёс Сарапул ёросысь Сигаево черкогуртын ортчо. Та дырысен спортъя шудонъёсыз кутско котькуд ар ортчытъяны.

Арысь аре шудонъёс умойгес но чебергес радъямын луо, шудонъёсы тросгес но тросгес калык пыриськыны тырше.

Азьланяз гурт шудонъёс Удмуртилэн нимкагазэзлы (визитной карточкаезлы, символэзлы) пӧрмо, Россия кунысь мукет улосвылъёс но элькунъёс та йылолэз адӟем каро.

Дыр ортчыса гурт шудонъёсыз радъян ужъя аспӧртэмлыко система кылдӥз.

  • Шудонъёс ортчо арлы кыкпол: гужем но толалтэ.
  • Котькуд ар шудонъёс пӧртэм ёросъёсын ортчо.
  • Гурт шудонъёсыз радъян понна ёросъёсы выль спортивной базаос пукто. Гужем шудонъёслы - стадион, толалтэ – лыжной база.
  • Элькунысь ӵошатсконъёсы сюрон понна спортсменъёс нырысь ёросазы ӵошатско.
  • Ёрослэн командаяз пырыны быгатэ ньыль студент гинэ, кылемез - гуртъёсысь ужасьёс.
  • Шудонъёслэн нырысетӥ но берпуметӥ нуналъёсаз куноосты пумитась ёрос кыӵе ке лулчеберет программа дася (пусйыны кулэ на, та лулчеберет программаосы ёросъёсысь вань чеберлыко коллективъёс пырисько, нылпиослы нимысьтыз яркыт костюмъёс вуро. Ачим кӧня ветлӥ ини, Дэбес ёросын тужгес но удмурт шӧмо усьтон ужрадзы вал).
  • Котькуд гурт шудонъёслэн вань аслаз талисманзы.
  • Шудонъёсыз усьтон дыръя командаосын парад ортче. Котькуд команды отын мынэ ёроссылэн флагеныз но спортсменъёс дӥсяло аспӧртэмлыко ёрос костюмъёссэс.

Берло аръёсы шудонъёсы ёросъёсын кивалтӥсьёс пӧлын ӵошатсконъёс пыртэмын. Озьы кивалтӥсьёс адзем карымон луо егит муртъёслы, ёросысьтызы спортсменъёсын матэгес луыны быгато, мугорзэс кыдато.

Та нуналлы ортчытэмын ини 19 тол шудонъёс но 22 гужем шудонъёс. Шудонъёслэн программаяз нырысь ик гуртъёсын тужгес но азинскем ӵошатсконъёс пыртэмын вал, нош али спортсменъёс асьсэдыс вольной борьбаын, русской лаптаын, хоккейын но дзюдоын возьматыны быгато ини.   

Таӵе ӵошатсконъёсыз ортчытон понна одно ик трос коньдон кулэ. Ярам, гурт шудонъёсыз Азьмуртмы но Элькунлэн Кивалтэтэз радъяны юртто. Та дыре шаерлэн бюджетаз гурт шудонъёс понна нимысьтыз статья висъямын ини.

 

Сочиысь Олимпи шудонъёслэн азвесь призёрзы Дмитрий Япаров

 

Али спортсменъёс понна гурт шудонъёс валтӥсь ӵошатскон луиз ини, уго отчы пыриськемзы бере, вуоно арлы элькунлэсь огъя (сборной) командазэ кылдыто. Соин ик гуртысь пиналъёс одно ик вормыны тыршо та ӵошатсконъёсын. Озьы шаерамы юн, кужмо куасэн бызьылӥсьёс будӥзы ни: Максим Вылегжанин, Дмитрий Япаров, Константин Главатских, Александр Уткин – соос али Россилэн сборной командаяз кутэмын. Нош бадӟым спортэ асьсэлэсь нырысетӥ вамышъёссэс соос элькунысьтымы гурт ӵошатсконъёсын лэсьтӥзы. 

 

Алина Крестьянинова

Просмотров: 299

Комментарий

Вы должны быть участником Uralistica, чтобы добавлять комментарии!

Вступить в Uralistica

© 2022   Created by Ortem.   При поддержке

Эмблемы  |  Сообщить о проблеме  |  Условия использования