Uralistica

Эшъёс!

25-тӥ тулыспалэ, Кун Кенешлэн 10-тӥ сессиез ортчыку, депутатъёс Удмурт Кенешлэсь удмурт кылэз дышетон ласянь поправказэ эшшо огпол эскеремзы бере сое ӧз юнматэ. Та воштэмез катэ пыртон понна 7 мурт куаразэ сётӥз, нош 57 депутат пумит луиз, эшшо 1 адями куаразэ чик но сётымтэ. Дышетонъя комиссилэн тӧроез Наталья Сударикова та поправкаез кутыны ӧз ӵекты. Игорь Семёновлэн депутатъёс азьын вераськемез бӧрсьы со валэктӥз, выль катлэн текстэзъя нокыӵе школаын удмурт кылэз дышетон алэмын ӧвӧл (не запрещено). Алымтэ ке но, луонлыкъёс сое дышетон понна туж ӧжыт.


Озьыен, выль дышетскон ар умой пала воштӥськонъёстэк кутскоз. Али удмурт кылэз школа программаосы пыртыны ӧз пишмы. Со дыре ик, ваньмылы валамон, школаосын удмурт кылэз дышетонлы нокыӵе дурбасьтон яке юрттэт чакламын ӧвӧл. Азьланяз но пичи школаосыз ворсаны турттозы но удмурт кыл урокъёсты нуон яке программаысь куштон - котькуд школалэн ас ужез гинэ луоз.
Инициативамес улонэ пыӵатыны али ӧз пишмы ке но, пусйыны кулэ, асьмелэн шансъёсмы вань на. Та кампания дыръя трос адями удмурт кыл понна нюръяськыны дась вал. Тросэз удмурт луисьтэмъёс пӧлысь но. Ваньмыз, мар вал, юнме ӧӥ вал.


Удмурт кыл понна кампание пыриськеменымы Удмуртиысь тӧрлыклы но мерлы (уката ик Удмуртиысь удмурт луисьтэмъёслы) мыло-кыдо луэммес но удмурт кыл понна нюръяськыны дась луэммес возьматӥмы. 1990-тӥ аръёсысен та вакытозь удмуртъёс ноку но сокем зол политика юанъёсын ӧз тунсыкъяське. Татчыозь удмуртъёс ас позицизэс политика удысын возьматымтэ. Табере милесьтым гожтэтъёсмес, вазиськонъёсмес басьтыса, депутатъёс, Кивалтэтысь ужасьёс но мер азьветлисьёс тодозы ни, удмуртъёслэн зол позицизы вань, сое копак лыдэ басьтытэк улыны уг пишмы ни.


Вуонояз но асьмелы та ужмес азьланьтоно.


Малпаськом, вуоно Кун Кенешын эскеронлы инъет кылдытоно шуыса: мерлы удмурт кылэз дышетонлэсь пайдазэ но кулэлыксэ валэктыны кулэ, ёросъёсын удмурт кыл урокъёслэсь нуиськемзэс, лыдзэс чаклано, удмурт кылэз Элькунысь мер улонэ мыло-кыдогес пыртыны тыршоно.

Соин ик “Кун Кыл” нимо огин уг ворсаськы. Ӧтиськом ваньдэсты выль ужъёсамы.

Тау кариськом ваньдылы! Али ӧм на ворме, нош вамыш лэсьтӥм ни. Азьлань гинэ!

http://vk.com/kunkyl

http://kunkyl.udmurtlyk.ru/

Просмотров: 146

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования