Uralistica

Кызьы утьыны удмурт кылан-буранэз

 - Вай сосекта сумкадэ нуо, юртто ӧжыт. 

- Эшшо маке, уг сёты. Мынам отын удмурт дэреме, нош сое мон нокинлы уг оскиськы.

Муское вуылыкум, таӵе вераськемез кылэме бере, мон бакоми. Собере мыняй. Берло малпаськонэ уси. Удмурт дэремзэ сокем чакласез ныл - Света Пудова. Ачиз со Кизнер ёросысь Вичурка гуртысь. Дышетскиз Ижысь крезьгуръя колледжын, али тодон-валан люка Мускоын. Кырӟаны но арганэн шудыны быгатэм сяна, Света туж сюлмаське удмурт кылан-буран (фольклор) понна.

 

- Света, кемалась-а крезьгурен эшъяськиськод?

- Крезьгурен тунсыкъяськыны кутски школаын. Арганэн шудыны дышетскон понна, юри кружоке ветлӥ. Собере котькуд арнянуналэ Кизнерамы вуылӥ. Татын туж трос тодон-валан басьтӥ. Кылсярысь, нотной грамота сярысь тодӥ. Берло Ижысь крезьгуръя колледже сюри. Пыри вал баянэн шудыны дышетскыны, нош монэ калык кырӟанэ кутӥзы. Шуизы, тон удмурт бере, соку ёросысьтыд но гуртысьтыд йылолъёсты, кырӟанъёсты люкалод но быдэстод.

- Трос-а люкад? Кин юрттӥськиз та ужад?

- Мыным ӟучсэ но удмуртсэ люкано ке вал, мон удмуртаз дугдӥ. Со бичам-люкам материалме берло аслым ик кырӟано вал. Соин мон ӟучъёссэ эшъёсылэсь быдэсъяй, нош удмуртсэ Бодья воршудысь люкай, азьло соя Римма Аркадьевна Чуракова выриз.
Гуртам бертӥсько но песяйёс дортӥ ветлӥсько. Капчи вал мыным. Одӥг кыл шедьтылӥм. Вунонтэм экспедициосы озьы огнам потай.

 

- Люкам материалэд диплом ужад мынӥз-а?

- Бен. Сцена вылын люкам йылолъёсме возьматоно луиз. Татын ачим ик режиссёр но, артист но, дышетӥсь но… кин но ӧй вал! Колледжын пӧртэм ёросъёсысь дышетско ук, мон соосты аслам диалектэлы дышетоно луи. Кылсярысь, «вау, скау, сыуау» шуыны. Нош ӟучъёсты эшшо но секыт дышетыны вал. Но табере соос но куд-ог удмурт верамъёсты валало.

- Тон дышетскыкуд, трос-а ӟучъёс вал колледжын?

- Нырысетӥ курсын дыръям, быдэс 4-тӥ курс ӟуч вал. Собере соос кошкизы но колледж удмуртомизгес. 60%-озь!

- Со люкам материалэд диплом сяна, мар тыныд сётӥз?

- Школаын мон удмурт кылэз туж ик уг яратӥськы вал. Но гуртын анай-атаен котьку удмурт сямен вераськи. Экспедициосы потаме бере шӧдыны кутски, удмуртлыкез гажанэ будэ шуыса. Валай, мынам гуртам кыӵеосыз йылолъёс тодмо луо, соос ик сьӧр гуртын ӧвӧл ни. Нош туала улонын зэмос кылан-буран воксё но ӧвӧл. Егитъёслы тунсыко удмурт попса. Нош фольклорез кытын ке кырӟам каро ик ке, со зэмос фольклор ӧвӧл. Ваньмыз сурамын. Калык мынэ филармоние, нош отын минусовка улын кырӟало… Тӥни сыӵе макеосты валаны кутски.

- Тон туж гажаськод удмурт кылан-буранэз, нош кызьы малпаськод, мар кароно сое утён понна?

- Кулэ фольклор ансамбльёс бичаны.

Радиотӥ но телевидение пыр йылолъёсты возьматъяны, вашкала кырӟанъёсты лэзьяны. Мед кылан-буран пель сьӧрын чузъяськоз.

Возьыт ук, куке пияшез армие келяло, нош эшъёсыз нокыӵе келян гуръёсты уг тодо но «В лесу родилась ёлочка…» кырӟаны кутско. Сыӵезэ пересь песянайёс кызьы валалозы? Возьыт!

Эшшо дэмласал гурт клубъёсын кылан-буран кырӟанъёсъя кружокъёс усьтылыны. Аслам гуртам мон та ужез мытӥ ни.

Пичи дыдыосын но экеосын кылан-буран кырӟанъёсты дышетыны. Туж узыр ук нылпи фольклормы! Со ик «Кешыр, кешыр, кубиста» шудон но.

Пересьёс улонысь кошко но кошко, сюлмы ик висе соос понна. Сьӧразы сомында кылан-буранъя тодонъёсты нуо. Пиналъёссы юаськысалзы ке, дышетысалзы ке соослэсь кырӟанъёссэс… Оло асьсэос но валасалзы, кыӵе тунсыко удмуртъёслэн фольклорзы…

- Нош тӥляд гожтэм диплом ужъёсты колледжлы кылё? Соосты лыдӟиськнниысь басьтыны луэ?
- Бен, луэ. Но соосты лыдӟисез луэ меда.

- Кызьы тон учкиськод «Воршуд» выллем фестивальёс шоры? Берло дыре коллективъёс ӵемгес фольклор пала берытско.
- Мон уг валаськы, куке вылазы удмурт дэрем дӥсяло, нош йыразы чик но тупасьтэм маскаос поно. Со фольклор ӧвӧл ни.
Собере литературной кылын вераськыны кутско. Нош гуртысь коллективъёс сцена вылын кесясько, черекъяло. Сое ик каньыл гинэ вераны луэ ук.

Ваньмыз кивалтӥсьсы бордысь потэ. Со кылан-буранъя валась мурт ке, коллектив но фольклор кырӟанэз усто быдэстоз.

- Табере кемалась дасям юанме сёто ни. Тон удмурт дэремдэ туж эскерыса улӥськод, сумкадэ  гинэ но нокинлы уд сётӥськы. Ыштэмедлэсь-а сокем кышкаськод?

- Дэреме мыным туж дуно. Монистозэ ачим вури. Вуж манетъёсты бабуэлэн ваткосъёсысьтыз бичай. Нош ассэ дэремме юри мон понна вуризы. Дас вить сюрс манет тыри.
Гуртам кык вуж дэреме вань на, но соосты уг дӥсяськы, туж вужесь но жаль пото. 

- Нош кызьы учкиськод туала атласной дэремъёс шоры? Соос тынадэзлэсь трослы дунтэмгес но ук. 
- Ой, мынам со дэремъёсты адӟем уг лу! Эшшо мылкыдме куашкатэ, куке удмурт дэремез дӥсяло но йырсиоссэс лэзьяло, нош пыдазы ӝужыт бервыло катаос (туфлиос) кутчало. Вашкала йылолъёсты серекъяло кадь, озьы йӧтэ. 

Просмотров: 331

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования