Шуварфальхть, Ригась и инголи молемась: латышень рэпть комболдомац и ритманза

Шумбраши, ялгат. Тячи "Мокшень валгярьксса" минь ёратама содафтомс тинь латвиянь хип-хопть мархта.

Тяфта ни лиссь, латышнень и мокшетнень промозса-эряфса лама марстонь ширеда. Модань сокай-види юропт конань лангс семебе пингть вииста люпштасть сяда оцю, сяда эрьгав шабратне: тевтоттне, германецне, русне. Латышне, хушь и пуроптсть эстеест эсьотям мастор – государства, сякокс синь таколфтыхть демографиянь прябалатне, кяльснон вандыень шиц. Тяфта ни ладявсь: изь удала латышень кяльти, кода и мокшеннетивок, келемомс, кепотьксонди, рузонь кяльть лаца. Интернеста, да и тязк, Уралистикасовок, аф весть кулендевсь: мокшень и эрзянь кяльхне кайгомас коре инь малат балтика ваксонь кяльхненди.

Рэпсь лезды лац кулемс латышень кяльть аньцяй мяньцефканзон, пукшензон и санонзон, марямс малаксшинц мокшень и эрзянь кяленьконди. Латвиянь рэп-морайхне пяк кельгихть перьфпяльть и тналть колга азондомать, улема сяс оцюведь тървась, шувар дюнатне, вирьхне и семьянь – тналонь пуромксне клипсост няфневихть ламода сяда сидеста ошень трущобатнень и мегаполисонь пульхки куротнень коряс. А ня васттнень фольклорснон эзда морамань тя промозсь мъзярда бъди и лись.

Васенцекс ули вов тя – латышень кяльса мораф  Chris Brown-онь и  Chipmunk-ть "Champion" моросна.

Хушь латышень морсь и аф оригиналсь, сонь эсонза лама кемамада цебярьти. Од морайхне азондыхть, конашкава тя эрявикс кирдемс инголет цель, молемс теенза аф макссемок пря сталмотненди и прябалатненди, кемамс эсь вийхненди и аф шарфнемс мяль перьфкат улихнень бязердемаснон лангс. Тя эсь кодяма гимна покодемати и эсь прянь аф ужяльдемати, нарьдешити и протестантонь эсьлацонь шити.

Мик Дукурсонь и Fakts рэперть шкамань сюлмосна лац няфтьсь пря нинге фкя марстонь моросост.

Микссь сиводсь колма «Жигулит» и арни шава китнень ланга коса бди Елгавать и Екабпилсть ёткса. Ару пинге, варма, конац сязи клянцекнень и ломань, кона лии вандыенц каршес. Тяса и тячи.

Минь фалу ульхтяма тяфтамокс. Минь вестевок аф васькафтьсаськ эсь пряньконь. Пачкат ётай иляднятне, паньцематне аньцек вармада вишкста, кельги стирьда пяшкотьф кудтне. Весь нюрьхкяня, минь эрятама мяльце путьконяти самс.

Gacho рэперть клипса тихтетькшнихть эрь кодама ломатть (Латвиянь содаф модельсь Гринта Лапиня, ушень фотографсь, велосипедса панцихне, нармонень кардайхне)- роликть пря танадоц – эрь ломанць питни. Тянь мархта Гачо няфни: эрьти кочкама эсь кинц, кельгома сянь мезсть лангса покоди, мезе тиенди и апак потнек молема путф цельти.

Skutelis – тя амбиция мархта асу репер. Сон луви шкамань эсьотямшить, кштиматнень колга, сянь квалма, кода хип-хопонь ритматне съргозьфтихть онда. Эсь стиленц сон лемнесы «ошень тяниень пингонь фольклорокс».

Satin Pasauli шкамань марстомомась, конань мархта тяшкава козя латвиянь рэпсь, луви сянь колга, кода ванома эсезот, кода няема эсь цильфцень васенцеда васедемок эсь пряцень мархта.

Melikols-сь «мекпяльхть молезь инголи» трексонза пшкяди эсь тналонцты, эсь мала ломанензонды, конат тонафтозь сонь кельгома и макссть вийхть молемс инголи.

Вов тяфтама инь оцю пялькстомасна латвиянь хип-хопонь од морайхнень, Ritms un Plusma фестивальсь, коса синь касфнесазь профессионалшиснон. Тяса мушендовихть инь маштыхне и асуфне. Тяса кайги пачкат ётай лувомась.

Rays - Par Latvisku Latviju роликсь политикань танад мархта.

Тиезе сонь Rays рэперсь референдумть карша, конац лемтьфоль Латвияса рузонь кяльти государствань статусонь максомати. Ульсь тя 2012 кизонь февральста. Роликть ванозь пяк лама ломань и сон сёлкфоль мяльполатксонди. Эрьгярьксти тяшксса Райс мярьгсь: сон аф ащи каршек русненди и рузонь кяльти, аф кирди лангозост кяж, аф лувондсыне руснень оккупантокс и, нльне, арьси: синь – аф аерфтови пялькс Латвиять эзда. Но рузонь кяльти аш кода улемс государстваннекс, сяс мес Латвиясь – латышень мастор. Мороса тага и тага весть кайги:

«Тяса вестевок аф ули Россия,// Тясть юксне Абренеть,// Сась пинге мезе-бди тяса полафтомс//- Фкя гимна, фкя флаг, фкя кяль».