Uralistica

Мадьяр нуналъёс Удмурт шаерын

Кема возьмам Мадьяр нуналъёс ортчизы. Киновозьматонъёс но йылпумъяськизы.
Куд-ог минутъёсы малпалляй вал, та ужрадмы ноку но улонэ уз пыӵа, дыр, шуыса, уката ик берпуметӥ политика воштӥськонъёс сэрен.

Татарстан пыр ортчыкумы, нӧдыны но кемдӥм, нап бус пӧлтӥ но мыноно луиз. Удмурт шаере пырыса нош бусмы чиптэм-чаптэм ышиз. Ас поннам малпай ай, вот та бигеръёс, туранистъёс, вожъясько, луоз, мадьяръёсты Удмуртие лэземзы уг пот.

Удмуртъёс, конешно, куно карыны но сюлмысь пумитаны быгато.

Программа пумысен нимысьтыз куд-ог учыръёсты пусъеме потэ.
Та нуналъёс нырысь ик удмурт-мадьяр нуналъёс шуыса радъямын вал, соин ик вераськемын вал, быгатэммые мадьярысь удмуртэ берыктом шуыса.
Жаляса верано, удмуртэн валасьтэмъёс удмурт кыллэсь тыллэсь я черлэсь кадь кышкало.
"Чипчирганэн" но крезьгур колледжысь ансамблен пумиськонысен куамын минутъёс пала мадьярысь удмуртэ берыктэме бере кылзӥсьёслэн куременызы ӟуче выжоно луиз.
Ымнырме кырыжтэмысьтым адскиз, дыр, макем мыным та куронзы ӧз яра.
Но, жаляса верано, мон сётски, кӧня ке малпаськеме берегес ке но. Туж толерантоесь ми, малпасько. Бигерез шуысал, ну уд ке валаськы, тӥляд ужды. Дышетэ, мукет кылэз тодон, уга, выль луонлыкъёс, выль ӧсъёс усьтэ.


Эктон корка ӝытысен нош программа куинь кылын чузъяськиз ини. Юн лачак калык лыктэм. Ижысь чиновникъёс но, соосын артэ Посол но, одӥг круге, киосазы кутскыса эктӥзы. Юн шулдыр вал.
Барысен нош ӝыт бере ни шумпотымон учыр вал. Серекъяса гинэ мадьяр но удмурт сямен вераськемысьтымы официантлы но удмурт сямен вазиськи “кельты” шуыса. Пияш нош берен вазиз удмуртэн. Алнашысь пияш вылэм. Собере нош удмурт сямен гинэ вераськиз ни милемын, солэсь азьпал нош анай кылзэ кылыса но ачиз удмуртэн чик ӧз вазьылы ми пала. Потыкум нош солы верай, удмурт кылыдлэсь эн возьдаськы шуыса. Сётаки Алнашысь пияш ук.

Лекциысеным но удмурт сямен вераськонме кутски, куд-ог студентъёс чарка пасьта синъёссэс золтӥзы, буйгатыны дыртӥ соосыз, ӟучен верасько шуыса.

Мон, зэмзэ вераса, ӧй чидасал, дыр. Кужмо, котькуд нунал нюръяськыны, ас культураед понна дурбасьтыны, “мукет”, куддыр “мурт” но луыны, “le a kalappal” мадьяр сямен вераса (шляпаме кылисько).

Быгы, конешно, паймытӥз. Кык пумогес малпан йырам берга. Мон нырысь ик клубын ужасьёслэн задорзылы но ужаны мылкыдзылы абдрай, гуртысьтым клубен ӵошатонэз ик ӧвӧл. Сцена вылэ 3 поколение потаз, сое нимаз мадьяръёс но пусйизы.
Ческыт зэмос удмурт сиёнъёсын, варсен но турынэн чаен милемыз куноятӥзы. Сомында удмурт сиёнэз одӥз азьысь адӟеме но веръяме но ӧй вал на. Удмурт сиён ачиз удмурт кадь ик востэм ке но, юн ческыт йӧтэ мыным.
Ачим но гужем быгылес картошкаез чырс йӧлын но вож сугонэн сиыны сокем яратӥсько! Солэсь ческыт вань меда мар ке?
Татын но озьыгес ик. Со калягалэсь, сопалъёс калюга шуо вылэм, паронка но дотово ческыт, коньытэз но кузьытэз но - ваньмыз кем гинэ.

Чылкак мукетсэ возьмасько вал сцена вылысен. Нокудмы но со сярысь мылкыдзэс сӧронтэм вылысь быгиослы ӧм поттылэ но, концерт ӝожомытӥз асьмемыз, мадьяръёсты но монэ но. "Чюррентоос" мыным берло кӧткуректонзэс дурыен кадь кисьтӥзы ни.
Льӧль айшетъёсын арлыдо апайёс“Березка” ансамбльысь эктӥсьёсыз выллем сцена вылтӥ юсьёс кадь уяса ветлӥзы. Йырзэс учкисьёс пала берыктыса, киоссэс чорк но пыдъёссэс балетын кадь золъяса. Ну чисто Моисеевлэн школаез. Вылаз ик плюсэн кырӟазы!!!
Сыӵегес ик егитъёсынызгес но учыр, возъетъёс нош усьтӥськемлэсь азьпал зэмос лазер шоу радъямын вал.
Гуртын мадьяръёс но, ма мон но чылкак мукетсэ адӟыны дасяським вал.
Городын, “Чипчирган”, “Эктон корка” но “Чебеляй” шоры учкыса, сокем утё бере аутентичной, зэмос удмурт культураез, соку гуртын, кытын со культура улӥсьёслэн куазы-виразы пыӵамын бере, со котькытын но луыны кулэ кадь.
Сцена вылысен егит нылашъёс “Эмезе” кырӟанлэн поп чузъяськемез улсын эктӥзы.
Сцена вылысь нош васькыса пересьёс удмурт тыпыртонъёсын но ас гуртысьтызы такмакъёсынызы шулдыртӥзы асьмемыз.
Вот соиз мон понна чылкак валантэм. Ведь Быги фольклор - тани мар бордын гуртлэн узырлыкез, кулэ ӧвӧл укыр гольтыръяськыны но палэнысь мае ке асэстыны. Та гуртын данъяськымонэз, ушъямонэз - ваньмыз вань ини! Мар мукетъёсызлы тодмотэм, соиз ик тунсыко ини, мон сямен, бордаз кыскись.
Мадьяръёс но я мыным, я асьсэлы та юанэз сёто.
Мода, медам, бырымтэ на Моисеевлэн дышетэмезлы яке татчыозь но училищеын солы дышето но гуртазы бертыса ужасьёс сое пыӵато гуртын. Гуртэ аутентичнойлы мода вуымтэ на, дыр.


Андрей Смирнов но Ижысь киноклублэн радъясез туж валаса ужа. Учконо ке, солэн вань ини ас огинэз, со борды кыстӥськись муртъёс. Мынам сыӵе йӧндырись, кино возьматонъёсты, табыш понна ӧвӧл, со ужез яратэмысьтыз радъясь муртэз адӟеме ӧй вал на.
Удмурт кыл ласянь нош. Медам со вылтӥяськем кадь чузъяськы, но мынам зэм но кӧты куректэ, куке егит гуртын быдэ вуэм удмуртъёс уг тодом “куро” кылэз, ог-огенызы “знаешь” шуыса верасько. Ведь со ини сокем капчи кылъёс. Мон ачим но “мышкам”, “алыны”, “сеськыны” кылъёсыз уже уг кутӥськы, но вожъяськисько со удмуртъёслы, кинъёс со ас кылазы капчиен гинэ пырто.

Та нуналъёсты радъяны юрттэмзы понна нимысьтыз тау вераме потэ Андрей Прокопьевлы сюлэмзэ но вань кӧнарзэ та ужлы понэмез понна но Эктон коркалы задор эктэмзылы, Юрий Перевозчиковлы юрттэмез но кенешъёс сётъямез понна, Натӥ Дмитриевалы но Гердысь дышетӥсьёслы но дышетскисьёслы тыршемзы понна, Быги гурточиослы но клубын Алена но Жанна ужасъёслы куно каремзы но асьмедыз шулдыртэмзы понна но ваньзылы-ваньзылы, кин ужрадъёсыз улонэ пыӵатыны юрттӥз но пыриськиз!

Мон со нуналъёсы юн данъяськиськи но али но данъяськисько, асьмелэн сыӵе удмуртъёсмы вань шуыса!

Просмотров: 336

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Zangarik, Март 25, 2014 в 12:03pm

Ленчик, баре ветлытэк уз луы табере)

Комментарий от: Лена Рябина, Март 25, 2014 в 10:55am

Лукина Снежана - одноклассницае но однокурсницае. Нош двоюродной братсэ уг тодиськы, эх ма(

Комментарий от: Oli, Март 25, 2014 в 10:48am

Кружка за кружкой. 

ДДН-лы ик матын. 

Пияшлэсь нимзэ уг тодӥськы, но Лукина Снежаналэн (сое но уг тодӥськы) двоюродной братэз, пе.

Комментарий от: Лена Рябина, Март 25, 2014 в 10:43am

Оли, нош кыче баре ветлиды (кытын официантэз Алнашысь)?))

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования