Мазы кяленьке, пяк мазы...

Мазы кяленьке, пяк мазы,

Тундань варьхмодема лаца,

Кода питни, питни казне,

Кода марлю панжи садса…

Сёрмадсь мокшень поэтсь. Ужяленди, лемоц теень аф лятфтави, но стихотворенияц  ашезь юкстав. И марнек масторонь шачема кялень шиста (21-це февральста) ня валхне тага састь прязон. Тячи,  мъзярда мокшекс аф корхтайхть миллиотт ломань, мъзярда сон ноляви тевс пъцтай аньцек кудъёткса, арьсезевонь, а мезе теень мокшень кяльсь? Мон эряван соньфтомонза? Эряван. Монцьке лия кяльхть содан и перьфкан ломаттневок аф аньцек мокшекс корхтайхть.  Афолень юма мокшень фкявок валнянь апак содаковок…

Но ваймось и седись ащихть каршек тяфтама мяльхненди.  «Аф аньцек кшиса эрек ломанць» мярьгфоль кунардонь пингста. Тяфта ульсь и тяфта латцеви тячимс. Аф аньцек пеконь топафтомать къвалма эряви арьсемс, но и ваймонь пяшкодематьке аф юкснема. А ваймозе монь – мокшенне. И  кяльсь, конань теень максозе тядязе, эряви аф сяшкава сянди, штоба корхнемс лиятнень мархта, конашкава эсь потмаёжезень, эсь ваймозень и атянь атятнень мархта сотксозень маряманди.  Мокшень кяльсь мярьги теень: мон аф ськамонан  тя эряфса, тя шиса, монь улихть юроне и синь кемот.  

Тяфтапт  монь мялене арьсемане эсь шачема кялезень колга. А вов мезе азсть теень лия ломаттне «Мезе тееть мокшень кяльсь?» кизефксть лангс.

Марина Аникина – од сёрмады.

Мзярда мон васенцеда молень Эстонияв, содань тоса удмурт цёра мархта, конац аф фкя киза ни тонафнесь Тартуса, а сяс сатомшка лац корхтась эстикс.  «Кода шарьхкодьсак, што тон тонадыть ни кяльть» - кизефтине сонь. Цёрась аф ламос арьсесь и мярьгсь теень: «Кяльть эста содасак,  мъзярда ушедат арьсема лангсонза». И вов эстоньбере мон кармань шарфнема мяль сянь лангс, кодама кяльса арьсян.  Лиссь стане: тевонь- покодемань квалма мялезе моли рузокс, а вов мала ломанень колга арьсян аньцек мокшекс. Тя кяльсь тядязенне. А тя ломанць макссь теень эряф, ужяльдема и кельгома, и  сяс, улема, кялецка лятфнесы теень сембе  лемботь, конац моли эздонза.  Кяльть вельде мон ёран пачфтемс семботь тянь  эсь семьязтивок. Тячи мокшекс корхтайхнень лувкссна, ужяленди, кири, а сяс, коса ба афолине куле эсь валоньконь, мон марян кенярдема седисон. И меколанк колави мялезе, мъзярда кулян тяфтама корхтамат: мокшень кяленьке и эрзяннеське  киндивок аф эряви.  Школаса иттненди сонь прокс аш мезенди тонафнемс. Ну кода ся стане! Въдь ня шабатнень оцюшкаснон тядясна –алясна, щятясна-щавасна синць мокшэрзят.  А сяс кинди, къда аф теест ванфтомс минь мазыдонга мазы мокшень валоньконь.  Вдь кяльсь – тя соткс атятнень-бабатнень мархта, эсь кодяма якорь, кона кирди эсонк эряфонь океанца. А сяземок сонь, юкстамок мокшень кяльть, минь саласамазь эрямань варматне и эста ни афкукс юмафтсаськ эсь шаманьконь и эсь пряньконь тя пефтома мирса.

Василий Немечкин МАФУНонь президентсь.

Теень мокшень и эрзянь кяльхнень фкя питнесна. Нят монь шачема кялене, конань кулендине идькспингстакиге  Сире Шайгавонь  Вертелим тядязень мокшень вялесонза и Пенза аймаконь Сире Захаркинаса – алязень эрзянь велесонза. Нят кяльхть,  конань мон надиян максомс сай пингста эсь идененди. 

Екатерина Кирдяшкина - журналист.

Мокшень кяльсь тя эсь прязе. Въдь аньцек тядянь-алянь кяльса минь арьсетяма эсь пачканк.  Мокшень кяльсот инь седиваксстонь эняльдеманьке -озондоманьке Шкайти. Мокшень кяльсь – тя инь лямбе лятфнематне, конат лядсть теень идькспингстон, тя мон тячизе и надиян вандыезе, монь полатксозе шабанень эса.  Теест мокшень кяльть вельде мон ёран максомс эсь кельгомазень.

Раиса Шичкина – эряфкшу мокшава.

Афи содаса мезе азомс. Мон кодак шачень кулян перьфкан мокшень кяль. Тятфта ульсь эряфоньберьф. Лисенди мокшень кяльсь – тя ся, мезть вельде мон азондыне вакссон эряйхненди эсь  мяленень и ся, мезть вельде шарьхкотькшнине синцень. Мокшень кяльса мон сюцень иденень, къда синь аф лац вятезь пряснон, тонафтонь эсост эряфти; мокшень кяльса морсень нюрямонь морот эсь уноконенди, азондонь теест ёфкст.  И надиян мокшень кяльсон и явсесамазь, мъзярда сай пингозе.