Uralistica

Шаржу пингонь мокшэрзятнень эряфса культовай паршихне и тяштьксне

Сире пингонь калмама васттнень шувондомста муф паршихнень коряс содаф, што мокшэрзятне лама пинге озонкшнесть языческяй шкайхненди. Аф масторлангонь оцю вийхненди азоркс лувондовсь сонць перьфпяльсь — ведсь, толсь, модась, касыксне, жувататне-ракшатне. Мокшэрзятнень религиознай эряфсост оцю васта занцесь атянь-атянь культсь. Тяштькст шаржу пингонь мокшэрзятнень языческяй шкайхненди сюконякшнемаснон колга мушендсть западноевропейскяй путешественникнень, кепотьксонди, Г. Рубруконь, Барбаронь, а сяда меколи — английскяй писательть Дженкинсононь трудстост.

Первобытнай эряфонь койхнень срадомаснон, классовай отношениятнень эвондамаснон-латцевомаснон мархта полафнесь и мокшэрзятнень озондомань-верондамань  эряфсна. Тяфта, эвондасть оцю (Мода ава, Мастор ава, Ведява, Пургине паз), а стане жа сяда ёмла шкайхне.

Сядонга пяк мокшэрзятнень эряфсост ванфтовсть семьянь-юромонь культонь ширетне. Эздост фкясь — кулоф раднятнень ваймоснонды озонкшнемась. Ломаттне верондасть, што тона шис туфне ванфнесазь мода лангса эряй радняснон, мельгаст шачендыхнень и сембоса лезнихть теест. Тя культсь лац няеви семьянь и родонь-плямань поминкань ётафтомань койхнень эзда.

Мокшэрзятнень религиознай эряфсост нинге фкя пяк няевикс ширекс ульсь тотемизмась.  Сон няевсь кудонь жуватань, вирень ракшань и нармонень ликса ваймонь ванфтомкатнень каннемастост. Тя культсь мала аф аньцек мокшэрзятненди, но Волго-Окскяй ляй ётконь ламоц пляматненди и Приуральянь, Западнай Сибирень нароттненди.

Кунардонь пингонь тонафнеф памятникнень эса сатомшка козяста няфтьфт языческяй культонь — алашань, офтонь, ведьбинень*, ведьге уенди нармонень — паршихне; а тяфта жа космогоническяй — шинь, ковонь, тяштю менелень и толонь —символхне. Ня предметтне канневсть повфтамканя-ванфтомканя лаца, кой-конатне эздост нолявсть тевс кода пункстамканят, мяштень мазоптомкат. Амулеттне сяда сидеста тиендевсть бронзаста, ведьбинень пакарьста, офтонь оржа пейста или кенчста.

Алашань и нармонень лаца тиф паршихть

Сембода кунардоннекс и мокшэрзятнень ёткса почитандави жуватакс лувондови алашась. Атянь-атяньконь эзда лятф сире памятникнень эса мушендовсь лама паршида, конат сотфт алашань культть мархта. Нят и весть валозь тиф простой алашанят-амулетт, и авань щамста сяда козя мазоптомкат — мазы пункстамканят-сюлгапт, кальдерди повфтамканят. Алашань ликса повфтамкань козя сюлгам муфоль Журавкинскяй кунардонь  II-це калмама вастста. Тянь лаца повфтамкат васьфневсть мокшэрзятнень сире сембе памятникснон эзда. Сембода оцю алашанясь муф Сире Бадикунь II-це калмама вастста. Сон шарфтсь эсь лангозонза мяль эсь оцюшинц и кучкаса келенянди пяльф варянянц вельде. Тя паршись, улема, канневсь амулет лаца. Пакарьста тиф алашань ликса амулет и тяконь лаца сюрьхцемня муфтольхть Тамбовскяй губерниянь Крюковско-Кужновскяй мокшэрзянь калмолангста. Алашань и ластя арды ломанень символхне няфневсть сёвонень сяканятнень-кядьгонятнень лангса. Тяфтама сяканя ульсь муф Атерь аймаконь Степановкань калмама вастста, кона канневи VIII — XI векненди. Тя культть мархта сотфт алашань муф калмотневок. Сяда сидеста синь васьфневсть ломанень калмотнень мархта ряцок ащезь, кой-коста цють сяда башка здост, васьфневсть стаптка, коса ломанць калмафоль алашанек. Тянь лаца калмамань койхне васьфневсть муромонь памятникнень эзда. Алашань культсь мала и лия нароттнендивок — комихненди, удмурттненди, мариецненди. Мархтонза сотф шкайхненди жертвань кандомань кунардонь койсь, конань тиемда инголе печкомс аноклаф жуватати шарфневсь башка мяль. Тя обрядсь лац няфтьф Иосафат Барбаро венецианскяй путешественникть «Путешествие в Тану» книгасонза. Барбаро купецоль, сон лама киза (1436 — 1452 кк.) эрясь Танаис ошса  Дон  ляйть видеса. Эсь сочинениясонза тяшнесь причерноморскяй степнень и шабрань аймакнень, а стане жа синь эряйснон — татархнень, руснень, мокшетнень колга. Барбаро сёрмадсь, кле, сатомшка лац содасыне мокшетнень, сянкса лама азонкшнесь синь озондомань и эрямань-ащемань койснон колга.

Шинь символхне

Аноконди содаф пингста мокшетне сявондихть алаша, конань нилецьке пильгонзон сотнесазь модати шавф ниле пяльхненди. Прянц сотнесазь башка пяльс. Тяда меле сашенды ломань, арси алашать инголи и налса ляценди седизонза, мзярс алашась аф кулы. Меле шавф жуватать ваткасазь кеденц. Кедть эзда стайхть кяскав, сивольть вельхксса ётафнихть озкс-илат и порендьсазь. Кедть пяшкотькшнесазь шужярьда, да сяшкава маштозь, што сон няеви афкуксоннекс. Пильгонзон вастс латцихть шуфтонь виде олгонят стане, штоба алашась ащеволь пильге лангса, ёфси эрек. Меколи сембе молихть кодамовок оцю шуфта малас, маштозь керсесазь тарадонзон и ацайхть лангозост седяфт, конатнень лангс стяфтсазь алашать. Тяда меле пуромфне сюконякшнихть алашати и каннихть казненди соболень, горностаень, урнянь, келазень и лия зверень кеднят. Семботь тянь повфнесазь шуфта пряс, эхярь стане, кода минь крьвяснетяма штатолнят.

Нармонь мархта бляха

Алашань культть мархта мокшэрзятнень сотфтольхть башка праздниксна-иласна, конат ванфневсть мянь XVIII-це векть самс. Фкя тяфтама илань колга пачфнесь К. Милькович: «Январть ушетксста мокшэрзятнень уленди иласна, конань синць лемнесазь «лишме озксокс». Шапаксста пицихть алашань ликса копшанят, илятемба каннесазь синь калдазу и кадондсазь тозк варьхмодемать самс. Шобдава озонкшнихть и шиньберьф арнихть ластя алашаса, тяконь лангс симондихть шапама ведняда».

Мокшэрзятнень фольклорсост тяфта жа ванфтовсь мзярошка мора, конат сотфт тя культть мархта. Эсост алашась няфневи пленцта од ломанень идикс.

Алашада башка, пяк кунардонь пингста почитандави жуватакс лувондовсь офтсь. Теенза сюконякшнесть аф аньцек минь ширдень, но и Западнай Сибирень эряйхневок. Мокшэрзянь шаржу пингонь калмотнень эзда сидеста мушендовихть амулетт, конат тифт офтонь кенчста.

Мокшэрзянь фольклорсь козя мороса и азксса, конат сотфт тя культть мархта. Вага фкясь эздост.

Нармонь лаца тиф карьхкя

Чукалы велети ванфтыкс-лездыкс кочкафоль офтсь. Ломаттне тя велеса весялатольхть, цёратне стирьхнень кельгозь. А вов офтть мархта ётксна  ашезь латцев. Низовка велети ванфтыкс ульсь атякшсь. Сон аньцек морсесь да сараснень мельге панцесь. Ломаттне Низовкаса нолатольхть, цёратне од стирьхнень мельге пяк ашесть ванонда, кельгозь ярхцамаснон и ламос удомаснон. Васедсть весть офтть мархта атякшсь, кармасть фкя-фкянди пеняцяма. Офтсь корхтай: «Вов эрялень Низовкаса, кодама лац тевозе туль!» «А мон лангозт сельме каян, — корхтай атякшсь, — тонь ломаттне весялат, цёратне стирень кельгихть, мон мархтост ладяволень!»

Офтсь и мярьги: «А мезе тяса арьсекшнемс? Эрь веледа полафттама».

Тянемс низовканнетнень колга пеетькшнемга корхнихть «офтонь пляма», а чукаланнетнень, меколанкт, «атякшень плямакс» лемнесазь.

Пяк почитандавикс лувондовсь ведьбинесь. Аф аньцек мокшэрзятнень, но и лия нароттнень ёткса, тя звернясь занцесь башка васта велень хозяйстваса.  Тянь сюнеда лазксненди путневсть тя животнайть мархта сотф паршихть: ведьбинень пакарьста тиф повфтамканят, кеднят. Ведьбинень кеднятне пяк лац  мишендевсть, сивольсна порендеволь, а вайнясна лезнесь пчкафтомань тевса. Ведьбинеста тиф повфтамкат муфтольхть Журавкинань II-це (Зубу аймаксь), Стёксова II (Нижегородскяй областень Арзамасскяй аймаксь) и мокшэрзянь лия сире калмотнень эзда. Сяда сидеста повфтамкатне канневсть кргать видеса и, улема, ульсть мяштень мазоптомкань пяльксокс. Тянь лаца амулетт каннесть Приуральянь,  Прикамьянь финно-угрань пляматне, а стане жа Равть и Окать ёткса эряйхне.

Христианскяй символ мархта паршихне

Сядонга лама предметта и символда, конат сотфт ведьге уенди нармонень культть мархта. Тяфтама мазоптомкат сидеста васьфневихть мокшэрзянь сире калмотнень эса. Нармонень фигуранятне канневсть мяштьса, а символсна (нармонень пильгонятне) нолявсть тевс кальдерди повфтамкань, цёконянь тиемста.

Тяфта, бронзаста тиф яксяргоня муфоль Сире Бадикунь Омбоце калмолангонь 66-це калмоста. Тяка памятниконь 165-це калмоста муф кальдерди повфтамкань бронзаста валф локстиень фигураня. Минь пингонь II тысячелетияста мокшэрзянь памятникнень эса эвондакшнихть кятькст, конатнень пенясна тифт яксяргонь пря лаца. Тяфтама кятькст сяда сидеста каннесть эрзятне.

Ведьге уенди  нармотть сидеста няфневсть шуфтонь кядьгонятнень (куцюфнень, карьхкятнень) лангса. Тяфта, Нижегородскяй областень Арзамасскяй аймаконь Заречное  велеть маласа мокшэрзянь калмама вастть шувондомста ульсь муф бронзань кядьгоня, конань потмоса ульсть ведьге уенди нармонень прякс ащи кундаманя мархта шуфтонь карьхкя и шава.

Лама тяфтама символда васьфневи композицияса. Кепотьксонди, Сире Бадикунь II-це калмама вастонь фкя калмоста муфоль бляшкаса мазоптф тюремань каркс. Карксса нармоттне мольсть фкя-фкянь мельге и няфневсть мациень или каргонь полгокс. Тяконь ули кода азомс крёскя лацонь повфнемкатнень колгавок, конат ульсть яксяргонь символкс (ваность рисункатнень).

Мокшэрзянь фолклорса ведьге уенди нармонць няфневи модань-масторонь раштайкс-тиикс и занци башка васта. Кой-кона моротнень эса яксяргсь няфневи нармонькс араф ломанькс. Тя стирь, конань сюдозе аф родной тядяц, или од стирь, конань колдубазь и кона ляды нармонькс, мзярс кивок аф сявсы рьвакс («Вирень мазы утканя»).

Ведьге уенди нармонень культсь лац содаф мерянонь модаса и финно-угрань сембе нароттнень ёткса.

Минь эрань II тысячелетиять васенце пяльксстонза мокшэрзянь памятникнень эса эвондакшнихть паршихть, конат сотфт куйть мархта. Сяда сидеста нят кядень мазоптомкат — кятькст, конатнень песна тифт куень пря лаца. Кунардонь пинкнень куйть вельде няфневсь перьфпяльсь и крхка смузь-ёнць.

Масторлангонь фольклорса куйсь тячемс лядонды сембода аф шарьхкотьф-тонафнеф фигуракс. Сонь образоц сотф и толть, и  ведть, и панттнень мархта. Сон няфневи и ломанень    
салайкс, и сивикс и стак тов. Литератураса сидеста азонкшневи мяльсь сянь колга, што куйть мархта тюремань мотифсь пяк кунардонь. Сон пачфни сянь колга, кода шаржу пингонь ломаттне шарьхкотькшнезь перьфпяльть улеманц.

Инголи куйсь ульсь цебярькс, меле арась кяжикс. Зиянонь канды куень образсь эвондась аф эстокиге, сон шачендсь сондедонза инголи эвондаф лия мотифнень эзда. Кода содаф археологическяй материалть эзда, пяльтьф кятькснень эса куень  символсь канневи X—XI веконь мокшэрзянь памятникненди. Сяда од памятникнень эса (XII — XIV вв.) тя символсь васьфневи сядонга сидеста. Куень пря мархта кятькст мушендсть Стародевичьянь, Кельгининскяй, Стёксовань II, Заречнаень II, Барбашинскяй и лия калмотнень эзда.

Куень и ковонь лаца тиф мазоптомкат

Ули кода арьсемс, бта тя культсь эвондась ширесонк мордовскяй государственностть латцевоманц пингста и сотф мокшэрзятнень кодама-повсь врьгятнихнень и сембе кальдявть-кяжть каршес тюремаснон мархта. Тяфтама мазоптомкатнень мокшетне и эрзятне каннекшнезь  зиянда ванфтоманкса.

Менельсь и тяшттне стане жа занцесть оцю васта кунардонь мокшэрзятнень духовнай эряфсост. Сядонга сидеста васьфневи шинь символсь, кона няфнесь пря эсь лацонь тяштьксса. Мокшэрзянь кунардонь калмотнень эзда тяфтамда муф пяк лама. Сяда сидеста синь мазопнезь авань щамть или канневсть ванфтомка лаца. Нят — шарыня лаца кодама-повсь повфнемканят, шарамня лаца мазы пункстамкат и стак тов. Кочкаф паршихнень ёткса ванфневихть мазоптомкат, конат няфнесазь менельть (шить) и мода лангонь толть ёткса соткснень. Тяфтама мазоптомкась няфневи круг потмоса крёзкс. Шинь символхне васьфневихть аф аньцек мокшэрзятнень, но и ламоц лия нароттнень эряфса. Кемоста сотфт синь Севернай Кавказонь и Придоньянь салтовскяй модатнень, а стане жа Прикамьянь и Уралонь финно-угрань пляматнень мархта.

Мокшэрзянь шаржу пингонь памятникнень эзда муф паршихнень ёткса сидеста васьфневихть ков лаца повфнемканя мархта тарвазкс ащи гривнат и лия мазоптомкат. Тя корхтай сянь колга, што мокшэрзятне содазь и почитандазь модать спутниконц —ковть. Тяфтама симфолхне васьфневихть минь эрань VII-це векста ушедозь.

Мокшэрзянь шаржу пингонь калмотнень шувондомста кочкаф паршихнень ёткса пяк мялень салайкс лувондовихть крёзкс ащи мазоптомкатне и символхне. Эрь кодама мифологиятнень эса крёзть вельде няфневи мирть-масторть кучкац или стама васта, коса васетькшнихть сембе китне-яттне и латцевихть ломанень шкайгитне. Кирашкть мархта нинге сотфт аф модалангонь вийхнень улемасна и фкя марс-пусмос кочкавомасна. Лияста крёзть вельде няфневи толсь, кона лувондовсь язычестваса зиянда и урмада аралай, пчкафты-аропты вийкс. Толсь сидеста васьфневи мокшэрзятнень обрядовай эряфсост.

Шарфтома мяль нинге фкя предметть лангс, конац, мяленьконь коряс, сотф ся пингонь ломаттнень Вселеннайть колга арьсемаснон мархта. Тя мазоптомкать археолокне лемдезь мяштьса каннема бляхакс, хуш калмотнень потмоса сон фалу улендсь кулофть пековидесонза. Тя паршись васьфневсь аньцек авань козя калмотнень эса. Тиендевсь сон бронзаста или сияста, ульсь круглай формань и шарсь менельть лангс. Кучкасонза ульсь варя (шинь символ). Тя варясь сёлгондовсь лии нармонь лаца (мифологияса — масторть раштаец) тиф панксса. Панксть эзда сяда ширеса ульсть бугорнят, сяда сидеста эздост лувондовсь кота. Кой-коста перьфкаст тиендевсть покольнянь-покольнянь ащи тяштькст. Тяфтама бугорнят улендсть и панксть лангсовок, композицияса синь няфневсть крёзкс. Крайге бляхась стане жа мазопневсь колмонь-крда моли ёмла бугорняса.

Ули кода арьсемс, што перьфпяльдень мирть-масторть ломаттне шарьхкотькшнезь тяфта. Полусферическяй дисксь няевсь теест менелькс. Бляхать кучкаса варясь — менельса шись. Нармонькс ащи крёз мархта панкссь — тя сембе масторть кучкац. Крёзть сюролданза няфнезь масторть ширензон, а пади, кизонь пинкнень. Сяда оцю бугорнятне, улема, няфнезь тяшттнень. Мезе няфнесть колмонь-крда моли ёмла бугорнятне, азомс стака. Минь мяленьконь коряс, нят ульсть кизонь шитнень лувкссна.

Эряви азомс, што тяфтама мазоптомкат простой ломаттне ашесть канне, а каннезь синь содай аватне обрядонь ётафнемста. Ня аватне занцесть мокшэрзятнень эряфсост башка васта.

Киевскяй Русьса христианствать примаманц мархта (988 г.) мокшэрзянь аймакнень эса кармасть эвондакшнема христианскяй религиянь символхне — мяштьса канневи шкайликонят, крёскат и стак тов.

Христианскяй культонь паршикс лувондови мяштьса канневи шкайликонясь, конань монголда инголень пингонь  Омбоце Заречьянь калмолангть шувондомста музе В.Н. Мартьянов. Шкайликоняса няфтьфоль кядьсонза идня мархта Шкаень тядясь.

М. В. Седовась пачфни, што ликонясь лемтьф «Петровскяй или Корсунскяй Умиленияти», и што тяфтама шкайликонят, Залесскяй Ярополченнеда башка,  муфт нинге сисем вастста. Валфт синь литейнай кафта форманява.  Тянь лаца ликоняда муф сембоц вейхкса. Кафксотне эздост муфтольхть Владимиро-Суздальскяй княжествать аймакса. Тя шкайликонять азороц аваль, но казне лаца сон путфоль алянь калмоть потмос.

«Борисонь и Глебонь» мархта ликоня муфоль Кельгининскяй калмонь монголда ингольдень пингонь культурнай слойста.

Христианствать мархта сотфт монголда ингольдень пингонь и золотоордынскяй пингонь мокшэрзянь памятникнень эзда мяштьса канневи крёскятнень мушендомасна.

Рязанскяй областень Кадомскяй аймаконь Кокуй кунардонь эряма вастонь шувондомста (1983-це кизоня) В.Н. Шитов мусь бронзаста валф крёз. Крёзть кувалмоц 8,2 см, келец — 5,5 см. Крёзть кучкаса — распятиясь, конань инголе озонды Богородицась и Иоанн Богословсь. Вярдень и алудонь медальоннятнень потмоса — архангелхне (пади, Гавриил мархта Михаил), а бокстоннетнень эса — кати-кодама святойхть. М.Д. Полубояриновать мяленц коряс, тяфтама крёсне канневихть XIII—XIV векненди. Ламоц исследовательхне арьсихть, бта тянь лаца крёснень мастярхне  тиендезь Киевса.

Сядонга кунардонь, XI—XII-це веконь крёскясь ульсь муф Мордпаркинань калмама вастть шувондомста алянь калмоста. Тянь лаца крёскятне васьфневсть XI—XIII веконь Древняй Русень памятникнень эса.

Гагинскяй могильникть тонафнемста авань калмоста А.Е. Алиховась мусь ниле ужеса ёмла крёскя. Сон муфоль крганятнень мархта и, улема, эзост и кярьксафоль.

Ламоксть васьфневи крёзсь Барбашинскяй калмотнень эзда пуроптф паршихнень ёткса (XIII—XIV вв.). Сидеста крёзсь васьфневсь кели суркснень лангста.

Кучка веконь мокшэрзянь памятникнень эзда муф христианскяй символхне и паршихне вятьсамазь тяфтама мяльс-арьсемас: славяттнень христианствать примамдост меле, миссионерхнень вельде тя религиясь кармась пачкотькшнема и шабрань нароттнендивок. Тяконь ётксот и мокшэрзянь пляматне — славяттнень сембода маласа эряй шабрасна. Ня предметтнень ули кода лувондомс трофейкс (аф эряви юкснемс, што монголхнень врьгятемдост карша  тяфтама походта ульсь кемоньда лама); тяда башка, ня предметтненди ульсь кода повомс моданьконь лангс мишендемань-рамсемань тефнень вятемаснон вельде. Азома сявок, васень пинкнень синь канневсть  кода мазоптомкат, ломаттне культовайкс синь ашезь лувонда; и, мекпяли, кунардонь памятникнень эзда муф христианскяй культонь паршихне кемокснесазь мокшэрзятнень и рузонь народть ёткса тёжянь кизонь сотксть колга мяльть.

  Иван Петербургский

Просмотров: 446

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования